ବୁର୍ଲା,୦୨/୦୨ ଶିକ୍ଷାନୁଷ୍ଠାନର ନାକ୍ ମାନ୍ୟତା ବୃଦ୍ଧି କରିବାକୁ କହି ଲାଞ୍ଚ ନେବା ଘଟଣାରେ ୧୦ ଜଣଙ୍କୁ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଗିରଫ କରିଛି । ଗିରଫ ଅଭିଯୁକ୍ତଙ୍କ ମଧ୍ୟରେ ପ୍ରଫେସର ବୁଲୁ ମହାରଣା ମଧ୍ୟ ଅଛନ୍ତି । ଶ୍ରୀ ମହାରଣାଙ୍କ କାର୍ଯ୍ୟାଳୟ ଓ ବାସଭବନରେ ସିବିଆଇ ପକ୍ଷରୁ ଚଢ଼ଉ ହୋଇଛି । ଗୋଟିଏ ଟିମ୍ ୨ଟି ସ୍ଥାନକୁ ଯାଇ କାଗଜପତ୍ର ଯାଞ୍ଚ କରିଛି ।
ସିବିଆଇ ସୂଚନା ଅନୁସାରେ, ଆନ୍ଧ୍ରପ୍ରଦେଶ ଗୁଣ୍ଟୁର ସହରରେ ଥିବା ଏହି ଶିକ୍ଷାନୁଷ୍ଠାନକୁ ନାକ୍ ପକ୍ଷରୁ ପରିଦର୍ଶନରେ ୬ ଜଣିଆ ଟିମ୍ ଯାଇଥିଲା । ଏଥିରେ ପ୍ରଫେସର ମହାରଣାଙ୍କ ସହ ୬ ଜଣ ପ୍ରଫେସର ସାମିଲ ଥିଲେ । ସେହି ଅନୁଷ୍ଠାନର ରେଟିଂ ବୃଦ୍ଧି କରିବାକୁ ଏହି ଟିମ୍ ଲାଞ୍ଚ ଦାବି କରିଥିଲେ । ସେମାନଙ୍କୁ ସୁନା ଓ ମୋବାଇଲ୍ ଫୋନ୍ ଲାଞ୍ଚ ଭାବେ ଦିଆଯାଇଥିଲା । ଏନେଇ ସୂଚନା ମିଳିବା ପରେ ସେମାନଙ୍କୁ ଗିରଫ କରାଯିବା ସହ ୩୭ ଲକ୍ଷ ଟଙ୍କା, ୬ଟି ଲାପଟପ୍ ଏବଂ ଆଇଫୋନ୍ ୧୬ ପ୍ରୋ ମୋବାଇଲ୍ ଜବତ କରାଯାଇଛି । ଏହି ଲିଙ୍କ୍ରେ ଦେଶର ୨୦ଟି ସ୍ଥାନରେ ଚଢ଼ଉ ହେଉଛି । ସମ୍ବଲପୁର ସମେତ ଚେନ୍ନାଇ, ବେଙ୍ଗାଳୁରୁ, ବିଜୟୱାଡା, ପାଲମୁ, ଭୋପାଳ ଏବଂ ଦିଲ୍ଲୀରେ ସିବିଆଇ ରେଡ କରିଛି । ଗିରଫ ହୋଇଥିବା ଅନ୍ୟ ଅଭିଯୁକ୍ତ ହେଲେ ଜିପି ସାରଥୀ ଶର୍ମା, ରାଜା ହରିନ, ଏ ରାମକୃଷ୍ଣ, ସମରେନ୍ଦ୍ର ନାଥ ସାହା ଏବଂ ଗାୟତ୍ରୀ ଦେବରାଜ ।
