ବେଙ୍ଗାଲୁରୁ,୨୮/୦୧: ଅତୁଲଙ୍କ ପରେ ଆଉ ଜଣେ ନିର୍ଯ୍ୟାତିତ ସ୍ବାମୀ । ସହି ପରିଲେନି ସ୍ତ୍ରୀର ନିର୍ଯ୍ୟାତନା । ବାପାଙ୍କୁ ଚିଠି ଲେଖି ଭୁଲ ମାଗିବା ସହ ଜୀବନ ହାରିଛନ୍ତି କର୍ଣ୍ଣାଟକର ଜଣେ ୪୦ବର୍ଷୀୟ ବ୍ୟକ୍ତି । ସ୍ତ୍ରୀର ନିର୍ଯାତନା ସହି ନପାରି ଦୁନିଆକୁ ଛାଡି ଚାଲି ଯାଇଛନ୍ତି କର୍ଣ୍ଣାଟକ ଚାମୁଣ୍ଡେଶ୍ବରୀ ନଗରରର ପେଟାରୁ ଗୋଲାପାଲି । ଗତବର୍ଷ ଡିସେମ୍ବରରେ ବେଙ୍ଗାଲୁରୁର ଜଣେ ଆଇଟି ଇଞ୍ଜିନିୟର ଅତୁଲ ସୁଭାଷଙ୍କ ଆତ୍ମହତ୍ୟା ଘଟଣା ଚହଳ ପକାଇଥିବା ବେଳେ ଆଉ ଜଣେ ନିର୍ଯ୍ୟାତିତ ସ୍ବାମୀ ଜୀବନ ହାରିଥିବା ସାମ୍ନାକୁ ଆସିଛି ।
ବାପା ମୋତେ କ୍ଷମା କରିଦେବ...ଆଉ ସହି ପାରୁନାହିଁ.. ମୋ ସ୍ତ୍ରୀ ପାଇଁ ଆତ୍ମହତ୍ୟା କରୁଛି….ସେ ମୋ ମୃତ୍ୟୁ ଚାହୁଁଥିଲା… ମୁଁ ଜୀବନ ହାରିବାକୁ ବାଧ୍ୟ ହେଉଛି । ଏମିତି କିଛି ଯନ୍ତ୍ରଣାଭରା ଚିଠି ଲେଖି ଦୁନିଆକୁ ଛାଡି ଚାଲି ଯାଇଛନ୍ତି କର୍ଣ୍ଣାଟକ ଚାମୁଣ୍ଡେଶ୍ବରୀ ନଗରରର ୪୦ ବର୍ଷୀୟ ପେଟାରୁ ଗୋଲାପାଲି । ଘଟଣା ପରେ ଏବେ ପେଟାରୁଙ୍କ ପରିବାର ନ୍ୟାୟ ଅପେକ୍ଷାରେ ପୋଲିସର ଦ୍ବାରସ୍ଥ ହୋଇଛନ୍ତି ।
ପ୍ରାଥମିକ ତଦନ୍ତକୁ ଜଣାପଡିଛି କି, ମୃତ ପେଟାରୁ ଗୋଲାପାଲି ଦୁଇବର୍ଷ ତଳେ ବିବାହ କରିଥିଲେ । ବିବାହର ୩ମାସ ପରେ ସ୍ବାମୀ ସ୍ତ୍ରୀଙ୍କ ସମ୍ପର୍କରେ ତିକ୍ତତା ଆସିଥିଲା । ଆଉ ଏହି ଝଗଡା ଛାଡପତ୍ର ଯାଏ ପହଞ୍ଚିଥିଲା । ମୃତ ବ୍ୟକ୍ତିଙ୍କ ପତ୍ନୀ ପିଙ୍କି ଛାଡପତ୍ର ପାଇଁ ଆବେଦନ କରିଥିଲେ । ଭରଣପୋଷଣ ପାଇଁ ୨୦ ଲକ୍ଷ ମାଗିଥିଲେ । ପେଟାରୁ ଗୋଲାପାଲି ଏକ ପ୍ରାଇଭେଟ କର୍ମାନୀରେ କାମ କରୁଥିଲେ । ସମ୍ପର୍କରେ ତିକ୍ତତା, ଛାଡପତ୍ର ଘଟଣାକୁ ସେ ସହି ପାରିନଥିଲେ ।
ଗତ କିଛି ମାସ ହେବ ତାଙ୍କର ଚାକିରି ଚାଲି ଯାଇଥିଲା । ସେ ବେରୋଜଗାର ହୋଇଯାଇଥିଲେ । ତଥାପି ତାଙ୍କ ସ୍ତ୍ରୀ ଟଙ୍କା ମାଗିବା ସହ ଧମକାଉଥିଲେ । ଅତ୍ୟାଚାର କରୁଥିଲେ । ଫଳରେ ଜୀବନ ହାରିବାକୁ ଚରମ ନିଷ୍ପତ୍ତି ନେଇଥିଲେ ସେ । ପୁରା ପରିବାର ଘରେ ନଥିବା ବେଳେ ପେଟାରୁ ଗୋଲାପାଲି ଆତ୍ମହତ୍ୟା କରିଥିଲେ । ଘରକୁ ଫେରିବା ପରେ ପୁଅର ଝୁଲନ୍ତା ମୃତଦେହ ଦେଖିଥିଲେ ପରିବାର । ଏହା ସହିତ ତାଙ୍କ ହାତ ଲେଖା ସୁଇସାଇଟ ନୋଟ୍ ବି ମିଳିଥିଲା । ପୋଲିସ ଆତ୍ମହତ୍ୟା ପାଇଁ ଉସକାଇବା ଭଳି ମାମଲା ଦାୟର କରି ତଦନ୍ତ ଆରମ୍ଭ କରିଛି ।
କହି ରଖୁଛି କି, ଗତବର୍ଷ ଡିସେମ୍ବରରେ ପତ୍ନୀ ଓ ଶାଶୂଙ୍କ ଅକଥନୀୟ ନିର୍ଯାତନା ସହି ନ ପାରି ଝୁଲିପଡ଼ିଥିଲେ ଯୁବ ଏଆଇ ଇଞ୍ଜିନିୟର ଅତୁଲ ସୁଭାଷ । ଆତ୍ମହତ୍ୟା ପୂର୍ବରୁ ୨୪ ପୃଷ୍ଠାର ଚିଠି ଏବଂ ୧.୨୦ ଘଣ୍ଟାର ଭିଡିଓ ମେସେଜରେ ନିଜ ଦୁଃଖ କାହାଣୀ ବଖାଣିଥିଲେ । ଏହି ଘଟଣା କର୍ଣ୍ଣାଟକ ସମେତ ଦେଶରେ ଆଲୋଡ଼ନ ସୃଷ୍ଟି କରିଥିଲା । ଚିଠିର ପ୍ରତି ପୃଷ୍ଠାରେ ନ୍ୟାୟ ମାଗିଥିଲେ ଅତୁଲ । ନ୍ୟାୟ ନମିଳିରେ ମୋ ମୃତଦେହକୁ କୋର୍ଟ ପାଖ ଡ୍ରେନକୁ ଫିଙ୍କି ଦେବ ବୋଲି କହିବା ସହ ମୃତ୍ୟୁ ପରେ ତାଙ୍କ ଶରୀରକୁ ପତ୍ନୀଙ୍କୁ ଛୁଇଁବାକୁ ନ ଦେବାକୁ କହିଥିଲେ ।
