ଭୁବନେଶ୍ୱର,୧୫/୦୩: ସାଇକେଲ୍ରେ ହାଟକୁ ଯାଉଥିବା ବେଳେ ଅଘଟଣ । ପଛପଟୁ ଧକ୍କା ଦେଲା ଟ୍ରକ୍ । ଚାଲିଗଲା ବ୍ୟକ୍ତିଙ୍କ ଜୀବନ । ମୃତକ ଗୋପପୁର ଅଞ୍ଚଳର ୫୧ ବର୍ଷୀୟ ମୋହନ ଚରଣ ଦାସ ବୋଲି ଜଣା ପଡ଼ିଛି । କଟକ ଜିଲ୍ଲା ନିଶ୍ଚିନ୍ତକୋଇଲି ବଜାର ନିକଟସ୍ଥ ୮ ନମ୍ବର କେନାଲ ପୋଲ ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ଗୋପପୁର ଅଞ୍ଚଳର ମୋହନ ଚରଣ ଦାସ ନିଶ୍ଚିନ୍ତକୋଇଲି ହାଟକୁ ସଉଦା କରିବାକୁ ଆସୁଥିଲେ । ସାଇକେଲ୍ରେ ଯାଇଥିବା ବେଳେ ବଜାର ନିକଟ ୮ ନମ୍ବର କେନାଲ ପୋଲ ନିକଟରେ ପଛ ପଟୁ ଏକ ଟ୍ରକ୍ ଆସି ତାଙ୍କୁ ଧକ୍କା ଦେଇଥିଲା। ସେ ତଳେ ପଡ଼ି ଯାଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ନିଶ୍ଚିନ୍ତକୋଇଲି ମେଡିକାଲକୁ ଆଣିଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଜନଗହଳିପୂର୍ଣ୍ଣ କେନାଲ ବନ୍ଧ, ରାସ୍ତା ଖରାପ, ବେପରୁଆ ଗାଡି ଚାଳନା ଯୋଗୁଁ ଏଭଳି ଅଘଟଣ ହୋଇଥିବା ଯୋଗୁଁ ଅକାରଣରେ ଏକ ଜୀବନ ଚାଲିଗଲା ବୋଲି ଅଭିଯୋଗ ହୋଇଛି। ଦୁର୍ଘଟଣା ସ୍ଥଳରେ କିଛି ସମୟ ଉତ୍ତେଜନା ସହ ଗାଡି ଚଳାଚଳ ବନ୍ଦ ଓ ରାସ୍ତା ଜାମ୍ ରହିଥିଲା । ଖବର ପାଇ ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କଲାପରେ ରାସ୍ତାରେ ଗାଡ଼ି ଚଳାଚଳ ସ୍ୱାଭାବିକ ହୋଇଥିଲା । ଏହି ଦୁଃଖଦ ଖବର ପାଇ ମେଡିକାଲରେ ପୂର୍ବତନ ବିଧାୟକ ପ୍ରତାପ ଜେନା ପହଞ୍ଚି ମୃତକଙ୍କ ପରିବାରକୁ ସାନ୍ତ୍ୱନା ଦେଇଥିବା ଜଣାପଡ଼ିଛି ।
