ଶ୍ରୀନଗର,୨୯।୯: ଜମ୍ମୁ-କଶ୍ମୀର ବିଧାନସଭା ନିର୍ବାଚନ ପ୍ରଚାର ପାଇଁ କଠୁଆରେ ପହଁଞ୍ଚିଥିବା କଂଗ୍ରେସ ଅଧ୍ୟକ୍ଷ ମାଲିକାର୍ଜୁନ ଖଡଗେ ମଞ୍ଚରେ ଭାଷଣ ଦେବାବେଳେ ହଠାତ ଅସୁସ୍ଥ ହୋଇ ପଡିଛନ୍ତି। ଏହାପରେ ଭାଷଣକୁ ଅଧାରେ ରୋକି ପାର୍ଟି ନେତା ତାଙ୍କ ହାତ ଧରି ଚୌକି ଉପରେ ବସାଇଥିଲେ। ଦଳର ନେତା କହିଛନ୍ତି, ଏବେ ତାଙ୍କର ସ୍ଥିତି ସ୍ଥିର ରହିଛି ଓ ଡାକ୍ତରଙ୍କୁ ତାଙ୍କ ଚେକଅପ୍ କରିବା ପାଇଁ ଡକାଯାଇଛି। ଖଡଗେ କଠୁଆରେ ଆତଙ୍କବାଦୀଙ୍କ ସହ ଚାଲିଥିବା ଅପରେସନ୍ରେ ଶହୀଦ ହୋଇଥିବା ଏକ ହେଡ୍ କନଷ୍ଟେବଳଙ୍କୁ ଶ୍ରଦ୍ଧାଞ୍ଜଳି ଦେଉଥିଲେ। ଏହି ଘଟଣାରେ ଅନ୍ୟ ଦୁଇ ପୋଲିସ କର୍ମଚାରୀ ମଧ୍ୟ ଆହତ ହୋଇଥିଲେ ଓ ଜଣେ ଆତଙ୍କବାଦୀ ନିହତ ହୋଇଥିଲେ।
କଂଗ୍ରେସ ମହାସଚିବ ଗୁଲାମ ଅହମ୍ମଦ ମୀର ପିଟିଆଇକୁ କହିଛନ୍ତି, ସେ ଜସରୋଟାରେ ଏକ ଜନସଭାକୁ ସମ୍ବୋଧିତ କରୁଥିଲେ, ସେତେବେଳେ ତାଙ୍କ ଦେହ ଖରାପ ହୋଇଯାଇଥିଲା। ତାଙ୍କର ସହଯୋଗୀ ତାଙ୍କୁ ଚୌକିରେ ବସାଇବାରେ ସାହାଯ୍ୟ କରିଥିଲେ।’ ସେ କହିଛନ୍ତି, କଂଗ୍ରେସ ଅଧ୍ୟକ୍ଷଙ୍କ ସ୍ଥିତି ସ୍ଥିର ରହିଛି। ଖଡଗେ ବିଧାନସଭା ନିର୍ବାଚନରେ ଦଳୀୟ ପାର୍ଥୀଙ୍କ ପାଇଁ ସମର୍ଥନ ଏକାଠି କରିବା ପାଇଁ ଏକ ରାଲିକୁ ସମ୍ବୋଧିତ କରିବା ପାଇଁ ଜରସୋଟ୍ ଯାଇଥିଲେ। ତାଙ୍କର ଉଧମପୁର ଜିଲ୍ଲାର ରାମନଗର ଜନସଭାକୁ ସମ୍ବୋଧିତ କରିବାର ମଧ୍ୟ କାର୍ଯ୍ୟକ୍ରମ ଥିଲା।
ଦେହ ଖରାପ ହେବା ପୂର୍ବରୁ ରାଲିକୁ ସମ୍ବୋଧିତ କରି ଖଡଗେ କହିଛନ୍ତି, ଜମ୍ମୁ-କଶ୍ମୀର ଲୋକ ନିଷ୍ପତ୍ତି ନେଇ ସାରିଛନ୍ତି, ଏଥର କଂଗ୍ରେସ ଓ ଏନ୍ସିର ମେଣ୍ଟ ସରକାର ହିଁ ଆସିବ। ବିଜେପିର ଲୋକ ଏଠାକୁ ଆସି ଉତ୍ତେଜନା ସୃଷ୍ଟିକାରୀ ଭାଷଣ ଦେଉଛନ୍ତି। କିନ୍ତୁ ତାଙ୍କୁ ଜଣା ରହିବା ଦରକାର ଏହାଦ୍ବାରା ଦେଶର ଲୋକଙ୍କୁ ବିଶେଷ କରି ଗରିବ ଏବଂ ଆମର ମା-ଭଉଣୀଙ୍କର ହିଁ କ୍ଷତି ହେଉଛି। ବିଜେପି ଜମ୍ମୁ-କଶ୍ମୀରର ଲୋକଙ୍କୁ ଅନେକ ପ୍ରତିଶ୍ରୁତି ଦେଇଛି, କିନ୍ତୁ କିଛି କରିନି।
