ବ୍ରହ୍ମବରଦା, ୦୨/୧୧:  ଘରେ କଳା କନା ବୁଲାଇଲେ ଦୁର୍ବୃତ୍ତ । ଘର ଭିତରେ ପଶି ଆଲମିରା ଭାଙ୍ଗି ଲକ୍ଷାଧିକ ଟଙ୍କା ସହ ସମସ୍ତ ସୁନା ଗହଣା ଲୁଟ୍‌ କରି ନେଇ ଯାଇଥିବା ଜଣାପଡିଛି । ଯାଜପୁର ଜିଲ୍ଲା ବ୍ରହ୍ମବରଦା ଥାନା ଅନ୍ତର୍ଗତ ବାଲିଗୁଡା ଗ୍ରାମର ଚନ୍ଦ୍ରମଣି ରାଉଳଙ୍କ ଘରୁ ଏହି ଲୁଟ୍‌ ହୋଇଛି ।  

ସୂଚନା ମୁତାବକ, ଶୁକ୍ରବାର ଚନ୍ଦ୍ରମଣି ରାଉଳ ତାଙ୍କ ପରିବାର ସହ ଖାଇ ପିଇ ଶୋଇ ପଡ଼ିଥିଲେ । ବିଳମ୍ୱିତ ରାତିରେ କିଛି ଦୁର୍ବୃତ୍ତ ସିଡି ଘର ଦେଇ ଘର ଭିତରେ ପଶି ଆଲମିରା ତାଲା ଭାଙ୍ଗି ଲକ୍ଷାଧିକ ଟଙ୍କା ସହ ସୁନା ରୂପା ଗହଣା ଲୁଟି ନେଇଥିଲେ । କେବଳ ସେତିକି ନୁହେଁ, ଗହଣା ବାକ୍ସକୁ ନିକଟସ୍ଥ ନଦୀ କୂଳରେ ଭାଙ୍ଗି ଭିତରେ ଥିବା ଗହଣା ନେଇଯାଇଥିବା ଦେଖିବାକୁ ମିଳିଥିଲା । ଅନ୍ୟ ପକ୍ଷରେ ଚୋରମାନେ ଏହି ଗ୍ରାମରେ ଅନ୍ୟ ଦୁଇ ଜଣଙ୍କ ଘରେ ଚୋରି କରିବା ବିଫଳ ହେବାପରେ ଚନ୍ଦ୍ରମଣିଙ୍କ ଘରୁ ଚୋରି କରିବାରେ ସଫଳ ହୋଇଥିଲେ । ଚୋରି ହୋଇଥିବା ଜାଣି ଚନ୍ଦ୍ରମଣି ଥାନାରେ ଅଭିଯୋଗ କରିଥିଲେ । ହେଲେ ଅଭିଯୋଗ କରିବାର ୫ ଘଣ୍ଟା ପରେ ମଧ୍ୟ ପୋଲିସ ଘଟଣାର ତଦନ୍ତ କରିବାରେ ବିଳମ୍ବ କରିଥିବା ଦେଖିବାକୁ ମିଳିଛି । ଏହି କାରଣରୁ ଗ୍ରାମବାସୀ ଅସନ୍ତୋଷ ପ୍ରକାଶ କରିଛନ୍ତି ।