ଭୁବନେଶ୍ୱର, ୨୭/୦୨: ଅଁଳାବେରେଣୀ ଗ୍ରାମ ମେଡିକାଲ ଛକ ନିକଟସ୍ଥ ଗୋପୀ ଭାଇ ସୁନା ଦୋକାନର ସଟର ତାଡି ଲୁଟ କରାଯାଇଥିବା ଅଭିଯୋଗ ହୋଇଛି । ଲକ୍ଷାଧିକ ଟଙ୍କାର ସୁନା ଓ ରୂପା ଅଳଙ୍କାର ଲୁଟ୍ ହୋଇଥିବା ସୁନା ଦୋକାନର ମାଲିକ ଗୋପୀନାଥ ପୃଷ୍ଟି ଅଭିଯୋଗ କରିଛନ୍ତି । ଢେଙ୍କାନାଳ ଜିଲ୍ଲା ତୁମୁସିଙ୍ଗା ଥାନା ଅନ୍ତର୍ଗତ ଅଁଳାବେରେଣୀ ଗାଁରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବୁଧବାର ବିଳମ୍ବିତ ରାତିରେ ସୁନା ଦୋକାନରୁ ଦୁର୍ବୁତ୍ତ ମାନେ ଲୁଟ୍ କରିଥିଲେ । ବୁଧବାର ଶିବରାତ୍ରୀ ଥିବାରୁ ଗୋପୀନାଥ ଅପରାହ୍ନ ୫ଟାରେ ଦୋକାନ ବନ୍ଦ କରି ଘରକୁ ଯାଇଥିଲେ । ଏହାର ଫାଇଦା ଉଠାଇ ଦୁର୍ବୃତ୍ତମାନେ ଦୋକାନର ସଟର ତାଡ଼ି ଲୁଟ୍ କରିଥିଲେ । ଗୁରୁବାର ସକାଳୁ ଆସି ଦୋକାନ ଖୋଲିବାକୁ ଯାଉଥିବା ବେଳେ ଦୋକାନର ସଟର ତାଡି ହୋଇଥିବା ଦେଖିବାକୁ ପାଇଥିଲେ ଗୋପୀନାଥ । ଏହା ଦେଖି ସେ ତୁରନ୍ତ ତୁମୁସିଙ୍ଗା ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପହଞ୍ଚି ତନାଘନା ଆରମ୍ଭ କରିଛି ତୁମୁସିଙ୍ଗା ପୋଲିସ । ଦୋକାନରୁ ପ୍ରାୟ ୫ ଲକ୍ଷ ଟଙ୍କାର ସୁନା ଓ ରୂପା ଅଳଙ୍କାର ସହିତ ୧ ହଜାର ଟଙ୍କା ଲୁଟ୍ ହୋଇଥିବା ମାଲିକ ଗୋପୀନାଥ କହିଛନ୍ତି । ଏହି ଘଟଣା ପରେ ସ୍ଥାନୀୟ ବାସିନ୍ଦା ଆତଙ୍କିତ ହୋଇ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି।
