ବେଙ୍ଗାଲୁରୁ: କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟା ଶୁକ୍ରବାର ୨୦୨୫-୨୬ ପାଇଁ ରାଜ୍ୟ ବଜେଟ୍ ଉପସ୍ଥାପନ କରିଛନ୍ତି । ରାଜ୍ୟ ବଜେଟର ଆକାର ୪,୦୮,୬୪୭ କୋଟି ଟଙ୍କା ରହିଛି । ବଜେଟ୍ରେ ଆର୍ଥିକ ସ୍ଥିରତା ସୁନିଶ୍ଚିତ କରିବା ସହିତ ଭିତ୍ତିଭୂମି ବିକାଶ, ମନୋରଞ୍ଜନ, ସଂଖ୍ୟାଲଘୁ କଲ୍ୟାଣ ଏବଂ ମହିଳା ସଶକ୍ତିକରଣ ଉପରେ ଗୁରୁତ୍ୱ ଦେଇଛନ୍ତି ସରକାର । ସବୁଠାରୁ ଉଲ୍ଲେଖନୀୟ ଘୋଷଣାଗୁଡ଼ିକ ମଧ୍ୟରୁ ଗୋଟିଏ ହେଉଛି ରାଜ୍ୟବ୍ୟାପୀ ଚଳଚ୍ଚିତ୍ର ଟିକେଟ୍ ମୂଲ୍ୟର ସୀମା ୨୦୦ ଟଙ୍କା ଧାର୍ଯ୍ୟ କରାଯାଇଛି । ସାଧାରଣ ଲୋକଙ୍କ ପାଇଁ ସିନେମାକୁ ଅଧିକ ସୁଲଭ କରିବାକୁ ସରକାରଙ୍କ ଏହା ବଡ଼ ପଦକ୍ଷେପ ବୋଲି କୁହାଯାଉଛି ।
ମଲ୍ଟିପ୍ଲେକ୍ସ ସମେତ ରାଜ୍ୟର ସବୁ ସିନେମା ହଲରେ ଟିକେଟ୍ ମୂଲ୍ୟ ୨୦୦ ଟଙ୍କାରୁ ଅଧିକ ହୋଇପାରିବ ନାହିଁ ବୋଲି ସରକାର କହିଛନ୍ତି । ଏହି ନିଷ୍ପତ୍ତି କର୍ଣ୍ଣାଟକର ଚଳଚ୍ଚିତ୍ର ଶିଳ୍ପରେ ଏକ ଦୀର୍ଘକାଳୀନ ସମସ୍ୟାର ସମାଧାନ କରିବ ବୋଲି ଆଶା କରାଯାଉଛି । ରାଜ୍ୟରେ ମଲ୍ଟିପ୍ଲେକ୍ସଗୁଡ଼ିକ ପ୍ରିମିୟମ୍ ସ୍କ୍ରିନିଂ ପାଇଁ ୫୦୦ ରୁ ୧୦୦୦ ଟଙ୍କା ପର୍ଯ୍ୟନ୍ତ ଟିକେଟ୍ ଫି’ ଆଦାୟ କରିଆସୁଛନ୍ତି । ୨୦୧୭ ରେ ସମାନ ପଦକ୍ଷେପ ଆଇନଗତ ଚ୍ୟାଲେଞ୍ଜର ସମ୍ମୁଖୀନ ହୋଇଥିଲା । କିନ୍ତୁ ବର୍ତ୍ତମାନ ସରକାରଙ୍କ ଏହି ନଷ୍ପତ୍ତି ଜନସାଧାରଣଙ୍କ ଚାହିଦା ଅନୁଯାୟୀ ନିଆଯାଇଛି ।
କନ୍ନଡ ଚଳଚ୍ଚିତ୍ର ଶିଳ୍ପକୁ ଆହୁରି ପ୍ରୋତ୍ସାହିତ କରିବାକୁ କର୍ଣ୍ଣାଟକ ସରକାର ରାଜ୍ୟ-ସମର୍ଥିତ OTT ପ୍ଲାଟଫର୍ମ ଆରମ୍ଭ କରିବାର ଯୋଜନା ଘୋଷଣା କରିଛନ୍ତି । ଏହା ସହିତ ମହୀଶୂରରେ ୧୫୦ ଏକର ଜମିରେ ଏକ ଆନ୍ତର୍ଜାତୀୟ ମାନର ଚଳଚ୍ଚିତ୍ର ନଗରୀ (ଫିଲ୍ମ ସିଟି) ନିର୍ମାଣ କରିବାକୁ ସରକାର ଘୋଷଣା କରିଛନ୍ତି । ଏଥିପାଇଁ ବଜେଟ୍ରେ ୫୦୦ କୋଟି ଟଙ୍କା ନିବେଶ କରାଯିବ । ସରକାରୀ-ଘରୋଇ ସହଭାଗୀତା (PPP) ମଡେଲ ଅଧୀନରେ ବିକଶିତ ହେବ ଏହି ଫିଲ୍ମ ସିଟି ।
