ପାଟକୁରା,୧୦/୦୨: ଚର୍ଚ୍ଚିତ ଆଇଟମ୍ ଗାର୍ଲ ନିଶା ମହାରଣାଙ୍କ ନୃତ୍ୟକୁ କେନ୍ଦ୍ର କରି ଗତକାଲି ରାତିରେ ସ୍ଥାନୀୟ କୁଦାନଗରୀ ଅପେରା ପେଣ୍ଡାଲ୍ରେ ତୁମୁଳକାଣ୍ଡ ଘଟିଛି । ଛୁରାମାଡ଼ରେ ଯାତ୍ରା କମିଟିର ଦୁଇ ଜଣ ସଦସ୍ୟ ଆହତ ହୋଇଥିବା କୁଦାନଗରୀ ଥାନାରେ ଅଭିଯୋଗ ହୋଇଛି । ଶାନ୍ତିଶୃଙ୍ଖଳା ବଜାୟ ରଖିବା ପାଇଁ ଅପେରା ପରିବେଷଣକୁ ବନ୍ଦ କରି ଦିଆଯାଇଛି । ସ୍ଥିତି ଏମିତି ହୋଇଥିଲା ଯେ ଧସ୍ତାଧସ୍ତି ଓ ଚେୟାର ଫୋଫଡ଼ାଫିଙ୍ଗାରେ ବହୁ ଦର୍ଶକ ଛିନ୍ଛତ୍ର ହୋଇ ଘଟଣାସ୍ଥଳରୁ ପଳାଇଥିଲେ । ନିଶା ମଧ୍ୟ ଅଧା ନୃତ୍ୟରୁ ପେଣ୍ଡାଲ୍ ଛାଡ଼ି ପଳାଇଥିଲେ । ଦର୍ଶକ ନାଟକ ନଦେଖି ଅଧରାତିରେ ଘରକୁ ଫେରିଥିଲେ ।
ମିଳିଥିବା ସୂଚନା ମୁତାବକ, କୁଦାନଗରୀ ଥାନା ଅଧୀନ କୁଦାନଗରୀ ଶୁକପରୀକ୍ଷିତ ଗାଦି ପର୍ଯ୍ୟଟନସ୍ଥଳୀରେ ପ୍ରତିବର୍ଷ ଭଳି ଏଥର ମଧ୍ୟ ମାଘ ସପ୍ତମୀ ମେଳା ଅବସରରେ ଅପେରା ପରିବେଷଣ ହେଉଥିଲା । ଏକ ସମୟରେ ଶୁକପରୀକ୍ଷିତ ଗାଦି ଯାତ୍ରା ପେଣ୍ଡାଲ ଓ ଏଠାରୁ ପ୍ରାୟ ୧୦୦ ମିଟର ଦୂରରେ ମା’ ଦକ୍ଷିଣକାଳୀ କମିଟି ପକ୍ଷରୁ ଅନ୍ୟ ଏକ ପେଣ୍ଡାଲରେ ଅପେରା ହେଉଥିଲା । ଅଧିକ ଦର୍ଶକ ହେବା ପାଇଁ ଶୁକପରୀକ୍ଷିତ ପରିଷଦ କମିଟି ନିଶାଙ୍କୁ ଷ୍ଟେଜ୍ ସୋ’ ପାଇଁ ଆଣିଥିଲେ । ତେବେ ନିଶା ନୃତ୍ୟ ଆରମ୍ଭ କରିବାର କିଛି ସମୟ ମଧ୍ୟରେ କେତେକ ଦର୍ଶକ ନିଜ ଆସନରେ ଠିଆ ହୋଇ ଏହାକୁ ବିରୋଧ କରିବା ସହ ନୃତ୍ୟ ବନ୍ଦ କରିବା ପାଇଁ ହୋହଲ୍ଲା କରିଥିଲେ । ଅନ୍ୟପକ୍ଷରେ ଯାତ୍ରା କମିଟି ଓ କିଛି ଦର୍ଶକ ନିଶା ନୃତ୍ୟ କରନ୍ତୁ ବୋଲି ଜିଦ୍ ଧରିଥିଲେ । ଫଳରେ ଉଭୟପକ୍ଷଙ୍କ ମଧ୍ୟରେ ବଚସା ଓ ଧସ୍ତାଧସ୍ତି ଆରମ୍ଭ ହୋଇଥିଲା ।
ସେପଟେ ନିଶା ତାଙ୍କ ନୃତ୍ୟ ଜାରି ରଖିଥିଲେ । ନୃତ୍ୟକୁ ବିରୋଧ କରୁଥିବା କିଛି ଦର୍ଶକ ଉତ୍ତ୍ୟକ୍ତ ହୋଇ ନିଶାଙ୍କ ଉପରକୁ ସିଗାରେଟ୍ ଟାଣି ଫୋପାଡ଼ିଥିଲେ । ଫଳରେ ନିଶା ବାଧ୍ୟ ହୋଇ ପେଣ୍ଡାଲ୍ରୁ ଚାଲିଯାଇଥିଲେ । କିନ୍ତୁ ଗଣ୍ଡଗୋଳ ଥମିନଥିଲା । ଉଭୟ ଗୋଷ୍ଠୀଙ୍କ ମଧ୍ୟରେ ଚେୟାର ଫିଙ୍ଗାଫିଙ୍ଗି ଚାଲିଥିଲା । ଯାତ୍ରା ପଡ଼ିଆ ଯୁଦ୍ଧକ୍ଷେତ୍ର ପାଲଟି ଯାଇଥିଲା । ଦର୍ଶକ ଛତ୍ରଭଙ୍ଗ ଦେଇ ପଳାଇ ଯାଇଥିଲେ । ଗୋଟିଏ ଗୋଷ୍ଠୀର ଉତ୍ତ୍ୟକ୍ତ ଲୋକଙ୍କ ଛୁରାମାଡ଼ରେ ଯାତ୍ରା କମିଟିର ଦୁଇ ସଦସ୍ୟ ସ୍ୱପ୍ନଜିତ୍ ମହାପାତ୍ର ଓ ଜିତେନ୍ଦ୍ର ସାହୁ ଗୁରୁତର ହୋଇଥିଲେ । ସେମାନଙ୍କୁ ନିଶ୍ଚିନ୍ତକୋଇଲି ମେଡିକାଲକୁ ନିଆଯାଇଥିଲା । ଯାତ୍ରା କମିଟି ଓ ଆହତ ଜିତେନ୍ଦ୍ର, ସ୍ୱପ୍ନଜିତ୍ଙ୍କ ପକ୍ଷରୁ ଥାନାରେ ଏତଲା ଦିଆଯାଇଛି ।
