ନୂଆଦିଲ୍ଲୀ,୦୮/୦୪: ଜରୁରୀକାଳୀନ ଅବତରଣ କଲା ଇଣ୍ଡିଗୋ ଏୟାରଲାଇନ୍ସର ଏକ ଘରୋଇ ବିମାନ। ଗତକାଲି ରାତିରେ ବିମାନଟିକୁ ମୁମ୍ବାଇର ଛତ୍ରପତି ଶିବାଜୀ ମହାରାଜା ଅନ୍ତର୍ଜାତୀୟ ବିମାନବନ୍ଦରରେ ଜରୁରୀକାଳୀନ ଅବତରଣ କରାଯାଇଛି। ଫ୍ଲାଇଟ୍ 6E5324 ଜୟପୁରରୁ ମୁମ୍ବାଇ ଆସୁଥିଲା । ସେହି ସମୟରେ  ବିମାନରେ ବୋମା ଆଶଙ୍କା ଥିବାରୁ ଜରୁରୀକାଳୀନ ଅବତରଣ କରାଯାଇଥିବା କୁହାଯାଉଛି। ପାଇଲଟ୍ ଧମକପୂର୍ଣ୍ଣ ବାର୍ତ୍ତା ପାଇବା ମାତ୍ରେ, ସେ ଏଟିସି ସହିତ ଯୋଗାଯୋଗ କରିଥିଲେ ଏବଂ ବିମାନର ଜରୁରୀକାଳୀନ ଅବତରଣ କରିଥିଲେ।

ଏହା ମଧ୍ୟ ପଢନ୍ତୁ- Rafale M: କେନ୍ଦ୍ର ସରାକରଙ୍କ ବଡ ନିଷ୍ପତ୍ତି; ଭାରତୀୟ ନୌସେନା ପାଇଁ କିଣାଯିବ ୨୬ଟି ରାଫେଲ୍-ଏମ୍ ଯୁଦ୍ଧ ବିମାନ

ପ୍ରୋଟୋକଲ ଅନୁସାରେ, ବିମାନଟିକୁ ଆଇସୋଲେସନ ବେକୁ ନିଆଯାଇଥିଲା। ଜରୁରୀକାଳୀନ ଗେଟ ଦେଇ କ୍ରୁ ସଦସ୍ୟ ଏବଂ ୨୨୫ ଜଣ ଯାତ୍ରୀଙ୍କୁ ଉଦ୍ଧାର କରାଯାଇଥିଲା। ଏହା ପରେ ତାଙ୍କ ଲଗେଜ୍ ଯାଞ୍ଚ କରାଯାଇଥିଲା। ବିମାନର ପ୍ରତ୍ୟେକ କୋଣ ଯାଞ୍ଚ କରାଯାଇଥିଲା, କିନ୍ତୁ କିଛି ସନ୍ଦେହଜନକ ମିଳିନଥିଲା। ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ବିମାନ କମ୍ପାନୀ ଘଟଣାର ନିଶ୍ଚିତ କରି କହିଛି ଯେ ବିମାନରେ ଥିବା ସମସ୍ତ ଲୋକ ସୁରକ୍ଷିତ ଅଛନ୍ତି। ପିଟିଆଇର ଏକ ରିପୋର୍ଟ ଅନୁଯାୟୀ, ପୋଲିସ ସୂଚନା ପାଇଥିଲା ଯେ ଇଣ୍ଡିଗୋର ବିମାନ 6E 5324 ଏପ୍ରିଲ ୭ ତାରିଖରେ ଜୟପୁର ବିମାନବନ୍ଦରରୁ ମୁମ୍ବାଇ ଅଭିମୁଖେ ଉଡ଼ାଣ ଭରିଥିଲା। ଏହି ବିମାନରେ କ୍ରୁ ସଦସ୍ୟଙ୍କ ବ୍ୟତୀତ ୨୨୫ ଜଣ ଯାତ୍ରୀ ଥିଲେ। ବିମାନଟି ଯାତ୍ରା କରୁଥିବା ସମୟରେ, ଜଣେ ବ୍ୟକ୍ତି ବିମାନର ଶୌଚାଳୟରେ ଏକ ଚିଠି ପାଇଥିଲେ। ସେହି ନୋଟରେ ଲେଖାଯାଇଥିଲା ଯେ, ବିମାନ ଭିତରେ ଏକ ବୋମା ଅଛି ଏବଂ ଏହା କିଛି ମିନିଟ୍ ମଧ୍ୟରେ ବିସ୍ଫୋରଣ ହେବ। ଯାହାପରେ ପାଇଲଟ୍ ବିମାନଟିର ଜରୁରୀକାଳୀନ ଅବତରଣ କରିଥିଲେ। ଏହି କାରଣରୁ ମୁମ୍ବାଇ ବିମାନବନ୍ଦରରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଥିଲା।