ଭୁବନେଶ୍ୱର, ୨୭/୦୯: ଓଡ଼ିଶାରେ କମିବ ରେଳ ଦୁର୍ଘଟଣା । ସେଥିପାଇଁ ରାଜ୍ୟର ବିଭିନ୍ନ ରେଳ ରାସ୍ତାରେ ଲାଗିବ କବଚ ସୁରକ୍ଷା ପ୍ରଣାଳୀ । ତେବେ ପ୍ରାଥମିକ ଭାବେ ଖଡ଼ଗପୁରରୁ ରାଣୀତାଲ ଓ ଭଦ୍ରକରୁ ପଲାସା ରୁଟ୍ରେ ଏହି କବଚ ସୁରକ୍ଷା ନେଇ କାମ ହେବ । ଏହା ସହିତ ହାଓଡ଼ା-ମୁମ୍ବାଇ ମୁଖ୍ୟ ଲାଇନରେ ଖଡ଼ଗପୁରରୁ ଝାରସୁଗୁଡ଼ା ମଧ୍ୟରେ ବଣ୍ଡମୁଣ୍ଡା ଓ ରାଉରକେଲା ଷ୍ଟେସନ ମଧ୍ୟରେ ବି କବଚ ସୁରକ୍ଷା ପ୍ରଣାଳୀ ରହିବ । ଆଗାମୀ ଦିନରେ କବଚ ଯୁକ୍ତ ରେଳ ଲାଇନ ହେବ ଓଡ଼ିଶାର ଅଧିକାଂଶ ରେଳରାସ୍ତା ।
ରେଳରେ କବଚ ସୁରକ୍ଷା ବ୍ୟବସ୍ଥା ଏକ ସମ୍ପୂର୍ଣ ସ୍ୱଦେଶୀ ଟ୍ରେନ୍ ସୁରକ୍ଷା ପ୍ରଣାଳୀ । ଏହା ଲାଗିବା ଦ୍ୱାରା ଗୋଟିଏ ଟ୍ରେନ୍ ସାମ୍ନାକୁ ଆଉ ଗୋଟେ ଟ୍ରେନ୍ ଆସିଗଲେ ଆପେ ଆପେ ବ୍ରେକ ଲାଗିଯିବ । ସେହିପରି ଟ୍ରାକ୍ର ଗତି ସୀମାଠାରୁ ଅଧିକରେ ଟ୍ରେନ ଚାଲୁଥିଲେ ତାକୁ ମଧ୍ୟ କମାଇ ଦେଇଦେବ । ଲେଭଲ୍ କ୍ରସିଂରେ ଆପେ ଆପେ ହର୍ଣ୍ଣ ବାଜିବ । ଟ୍ରାକ୍ରେ କିଛି ବାଧା ଥିଲେ ଟ୍ରେନ ଅଟକି ଯିବ । ଟ୍ରାକ ଚେଞ୍ଜ କଲେ, ଗତି ଧୀର କରିବା ସହ ସବୁ କବଚ ଦ୍ୱାରା ହେବ । ଏହା ପ୍ରତି ଇଞ୍ଜିନ୍, ଟ୍ରାକରେ ଲାଗେ ଏବଂ ଜିପିଏସ ସହ ଲିଙ୍କ୍ ରହେ । ଚଳିତ ଆର୍ଥିକ ବର୍ଷରେ ଭାରତୀୟ ରେଳ ମନ୍ତ୍ରଣାଳୟର ବଜେଟ ୨ ଲକ୍ଷ ୫୫ ହଜାର ୩୯୩ କୋଟି ଟଙ୍କା ଥିବା ବେଳେ ସେଥିରୁ ୪୦ ପ୍ରତିଶତ ଅର୍ଥାତ ୧.୦୮ କୋଟି କେବଳ ରେଳ ସୁରକ୍ଷା ପାଇଁ ବଣ୍ଟନ କରାଯାଇଛି ।
ସେଥିରେ ଗୁରୁତ୍ୱପୂ୍ର୍ଣ୍ଣ କବଚ ଟ୍ରେନ ସୁରକ୍ଷା ପ୍ରଣାଳୀ ଲଗାଇବା ରେଳ ମନ୍ତଣାଳୟ ପାଇଁ ବଡ଼ ଆହ୍ୱାନ ଭାବେ ଉଭା ହୋଇଛି । ତଥାପି ଭାରତୀୟ ରେଳବାଇର ୬୮ ହଜାର କିଲୋମିଟର ଟ୍ରାକ୍ରୁ କେବଳ ୧୪୬୫ କିମି ଏବେ ପର୍ଯ୍ୟନ୍ତ କବଚ ଯୁକ୍ତ ହୋଇପାରିଛି । ଏବେ ଯୁଦ୍ଧକାଳୀନ ଭିତ୍ତିରେ ଦେଶର ଅତ୍ୟଧିକ ଟ୍ରାଫିକ ଥିବା ରୁଟ୍ଗୁଡିକରେ କବଚ ପାଇଁ ଟେଣ୍ଡର ଆହ୍ୱାନ କରାଯାଉଛି । ଦେଶର ଅନ୍ୟ ରୁଟ୍ ଭଳି ଓଡ଼ିଶାରେ ଆସୁଥିବା ସ୍ୱର୍ଣ୍ଣିମ ଚତୁର୍ଭୁଜ ରୁଟ୍ରେ ମଧ୍ୟ କବଚ ଲାଗିବ । ଦକ୍ଷିଣ ପୂର୍ବ ରେଳପଥ ଅନ୍ତର୍ଗତ ଖଡ଼ଗପୁରରୁ ରାଣୀତାଲ ପର୍ଯ୍ୟନ୍ତ ଏବଂ ପୂର୍ବତଟ ରେଳପଥ ପକ୍ଷରୁ ରାଣୀତାଲ, ଭଦ୍ରକରୁ ପଲାସା ପର୍ଯ୍ୟନ୍ତ ଏହାର କାର୍ଯ୍ୟ କରାଯିବ ବୋଲି ବିଶ୍ୱସ୍ତ ସୂତ୍ରରୁ ସୂଚନା ମିଳିଛି ।