ନୂଆଦିଲ୍ଲୀ: ଆସନ୍ତା ଏପ୍ରିଲ୍ ୨ ତାରିଖରେ ଆମେରିକା ନୂଆ ଟିକସ ନୀତି ଲାଗୁ କରିବାକୁ ଯାଉଛି। ଏହି ପରିପ୍ରେକ୍ଷିରେ ଉଭୟ ଭାରତ ଓ ଆମେରିକାର ଅଧିକାରୀମାନେ ପରସ୍ପର ସହ ଆଲୋଚନା କରିଛନ୍ତି। ଏହି ଆଲୋଚନାରେ ଭାରତ ହାର୍ଲେ-ଡାଭିଡସନ ମୋଟରସାଇକେଲ, ବରବନ ହ୍ୱିସ୍କି ଓ କାଲିଫୋରନିଅନ ୱାଇନ ଉପରୁ ଟିକସ କମାଇବାକୁ ନିଷ୍ପତି ନେଇଥିବା ଜଣାପଡିଛି। ଉଭୟ ଦେଶ ପରସ୍ପର ଉପରେ ଟିକସ କମାଇ ବାଣିଜ୍ୟିକ ଅଭିବୃଦ୍ଧି ହାସଲ କରିବାକୁ ଏହି ନିଷ୍ପତ୍ତି ନେଇଥିବା ଜଣାପଡିଛି।
ଆପଣଙ୍କୁ ଜଣାଇରଖୁ ଯେ, ଭାରତ ସରକାର ପୂର୍ବରୁ ହାର୍ଲେ-ଡାଭିଡସନ ମୋଟରସାଇକେଲ ରପ୍ତାନୀ ଉପରେ ଟିକସ ୫୦ ପ୍ରତିଶତରୁ ହ୍ରାସ କରି ୪୦ ପ୍ରତିଶତ କରିଦେଇଥିଲେ। ବର୍ତ୍ତମାନ ହୋଇଥିବା ଆଲୋଚନାରେ ଏହି ଟିକସକୁ ଆହୁରି କମାଯିବ ବୋଲି ଆଲୋଚନା ହୋଇଛି। ଯାହାଫଳରେ ଏହି ପ୍ରିମିୟମ ବାଇକ ସୁଲଭ ମୁଲ୍ୟରେ ବଜାରରେ ଉପଲବ୍ଧ ହୋଇପରାରିବ।
ସେହିଭଳି, ପୂର୍ବରୁ ବରବନ ହ୍ୱିସ୍କି ଉପରେ ଭାରତ ସରକାର ୧୫୦ ପ୍ରତିଶତ ଟିକସ ଲଗାଉଥିଲେ। ତେବେ କିଛିଦିନ ତଳେ ଏହାକୁ କମାଇ ୧୦୦ ପ୍ରତିଶତ କରିଦିଆ ଯାଇଥିଲା। ତେବେ ଆମେରିକା ପକ୍ଷରୁ ଏହି ଟିକସକୁ ଆହୁରି କମ କରିବାକୁ ଭାରତକୁ କହିଥିବା ଜଣାପଡିଛି। କାଲିଫୋରନିଅନ ୱାଇନ ଉପରୁ ମଧ୍ୟ ଟିକସ କମାଇବାକୁ ଉଭୟ ଦେଶ ମଧ୍ୟରେ ଆଲୋଚନା ହୋଇଛି ବୋଲି ଜଣାପଡିଛି। କେବଳ ଏହି ୩ଟି ଉତ୍ପାଦ ଉପରୁ ଟିକସ କମାଇବା ପାଇଁ ଆଲୋଚନା ହୋଇନାହିଁ। ଆମେରିକାରୁ ଭାରତକୁ ଆସୁଥିବା ଔଷଧ ସାମଗ୍ରୀ ତଥା ରସାୟନ ଦ୍ରବ୍ୟ ଗୁଡିକ ଉପରେ ମଧ୍ୟ ଟିକସ କମେଇବାକୁ ଆଲୋଚନା ହୋଇଛି।
ଯଦି ଭାରତ ହାର୍ଲେ-ଡାଭିଡସନ ମୋଟରସାଇକେଲ ଉପରୁ ଟିକସ କମ କରେ ତେବେ ଏହା ଭାରତୀୟ ଗ୍ରାହକଙ୍କ ପାଇଁ ଆହୁରି ସୁଲଭ ହୋଇଯିବ। ଏହା ସହ ବରବନ ହ୍ୱିସ୍କି ଓ କାଲିଫୋରନିଅନ ୱାଇନ ମଧ୍ୟ ଭାରତୀୟ ଗ୍ରହକଙ୍କ ପାଇଁ ଶସ୍ତାରେ ଉପଲବ୍ଧ ହେବ। କିନ୍ତୁ ଆମେରିକୀୟ ଔଷଧ ଉତ୍ପାଦ ଗୁଡିକ ଉପରୁ ଟିକସ କମିଲେ ଭାରତୀୟ ଔଷଧ ଶିଳ୍ପ ଗୁଡିକୁ ଅନେକ କ୍ଷତି ସହିବାକୁ ପଡିବ।
ସୂଚନା ମୁତାବକ, ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆସନ୍ତା ଏପ୍ରିଲ ୨ ତାରିଖରେ ଏକ ନୂଆ ଟିକସ ନୀତି ଆଣିବାକୁ ଯାଉଛନ୍ତି। ଯେଉଁଥିରେ ଆମେରିକା ଉତ୍ପାଦ ଗୁଡିକ ଉପରେ ଅପର ପାର୍ଶ୍ୱର ଦେଶ ଯେତେ ପରିମାଣର ଟିକସ ଲଗାଇବେ ଆମେରିକା ସେହିଦେଶର ସମାନ ଉତ୍ପାଦ ଗୁଡିକ ଉପରେ ସେତିକି ପରିମାଣର ଟିକସ ଲଗାଇବାକୁ ଯାଉଛି। ଏମୁ ଏହି ନିୟମ ଆସିବା ପୂର୍ବରୁ ଭାରତ ଏ ଆମେରିକା ଅଧିକାରୀମାନେ ପରସ୍ପର ସହ ଆଲୋଚନା କରିଥିବା ନେଇ ଇଂରାଜି ଗଣମାଧ୍ୟମ ସଂସ୍ଥା ଇଣ୍ଡିଆ ଟୁଡେ ରିପୋର୍ଟ ପ୍ରକାଶ କରିଛି।
