ଇନ୍ଦୋର: ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ଗଭର୍ଣ୍ଣର ସଞ୍ଜୟ ମଲହୋତ୍ରା ଶନିବାର ଦିନ କହିଛନ୍ତି ଯେ ଭାରତ ଶୀଘ୍ର ବିଶ୍ୱର ତୃତୀୟ ବୃହତ୍ତମ ଅର୍ଥନୀତି ହେବାର ପଥରେ ଅଗ୍ରସର ହେଉଛି। ଏହି ଅଭିମତ ସେ ଇନ୍ଦୋରର ରଙ୍ଗୱାସା ଗାଁରେ ସରକାରୀ ବ୍ୟାଙ୍କମାନଙ୍କ ଦ୍ୱାରା ଆୟୋଜିତ ଏକ ଆର୍ଥିକ ସମାବେଶୀକରଣ ଅଭିଯାନ ‘ସନ୍ତୃପ୍ତି ଶିବିର’ରେ ବ୍ୟକ୍ତ କରିଥିଲେ। ସେ ଏହି ଅଗ୍ରଗତିର ଶ୍ରେୟ ପ୍ରଧାନମନ୍ତ୍ରୀ ଜନ ଧନ ଯୋଜନାକୁ ଦେଇଛନ୍ତି। ଯାହା ଗତ ୧୧ ବର୍ଷ ଧରି କେନ୍ଦ୍ର ସରକାର ଏବଂ ଆରବିଆଇ ସହଯୋଗରେ ବ୍ୟାଙ୍କମାନଙ୍କ ସହିତ କାର୍ଯ୍ୟ କରି ଦେଶର ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି।

ମଲହୋତ୍ରା କହିଛନ୍ତି ଯେ ଜନ ଧନ ଯୋଜନା ଅଧୀନରେ ୫୫ କୋଟିରୁ ଅଧିକ ବ୍ୟାଙ୍କ ଖାତା ଖୋଲାଯାଇଛି। ଯାହା ସମାଜର ସମସ୍ତ ବର୍ଗର ଲୋକଙ୍କୁ ଦେଶର ଅର୍ଥନୈତିକ ଅଗ୍ରଗତିରେ ଅଂଶଗ୍ରହଣ କରିବାକୁ ସକ୍ଷମ କରିଛି। ଏହି ଖାତାଗୁଡ଼ିକ ମାଧ୍ୟମରେ ସଞ୍ଚୟ, ପେନସନ, ବୀମା, ଋଣ ଏବଂ ଅନ୍ୟାନ୍ୟ ଆର୍ଥିକ ସେବା ପ୍ରଦାନ କରାଯାଉଛି। ସେ ଆହୁରି ମଧ୍ୟ ଖାତାଧାରୀମାନଙ୍କୁ ନିୟମିତ ଭାବେ ନୋ ୟୋର କଷ୍ଟମର (KYC) ବିବରଣୀ ଅପଡେଟ୍ କରିବାକୁ ଏବଂ ଡିଜିଟାଲ ଆର୍ଥିକ ସାକ୍ଷରତା ବୃଦ୍ଧି କରି ଠକେଇରୁ ନିଜକୁ ସୁରକ୍ଷା ଦେବାକୁ ପରାମର୍ଶ ଦେଇଛନ୍ତି।

ଏହି ପ୍ରସଙ୍ଗରେ ମଲହୋତ୍ରା ମହିଳାମାନଙ୍କର ଗୁରୁତ୍ୱପୂର୍ଣ୍ଣ ଅଂଶଗ୍ରହଣକୁ ପ୍ରଶଂସା କରିଛନ୍ତି। ଯେଉଁମାନେ ଆର୍ଥିକ ସମାବେଶୀକରଣ ଏବଂ ଦେଶର ବିକାଶରେ ମୁଖ୍ୟ ଭୂମିକା ନିର୍ବାହ କରୁଛନ୍ତି। ସେ ଉଲ୍ଲେଖ କରିଛନ୍ତି ଯେ ପ୍ରାୟ ସମସ୍ତ ଗାଁରେ ୫ କିଲୋମିଟର ବ୍ୟାସାର୍ଦ୍ଧ ମଧ୍ୟରେ ବ୍ୟାଙ୍କ ଶାଖା କିମ୍ବା ବ୍ୟବସାୟ ସହଯୋଗୀଙ୍କ ମାଧ୍ୟମରେ ବ୍ୟାଙ୍କିଙ୍ଗ ସେବା ଉପଲବ୍ଧ ହେଉଛି।

ଏହି ଅବସରରେ ମଲହୋତ୍ରା ଜୁଲାଇ ୧ରୁ ସେପ୍ଟେମ୍ବର ୩୦ ପର୍ଯ୍ୟନ୍ତ ଚାଲୁଥିବା ଜାତୀୟ ଆର୍ଥିକ ସମାବେଶୀକରଣ ଅଭିଯାନକୁ ତ୍ୱରାନ୍ୱିତ କରିବାକୁ ବ୍ୟାଙ୍କମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ଅଭିଯାନରେ ନୂତନ ଜନ ଧନ ଖାତା ଖୋଲିବା, ସାମାଜିକ ସୁରକ୍ଷା ଯୋଜନାରେ ନାମ ଲେଖାଇବା ଏବଂ KYC ପ୍ରକ୍ରିୟା ସମ୍ପୂର୍ଣ୍ଣ କରିବା ଅନ୍ତର୍ଭୁକ୍ତ। ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ (ଏସବିଆଇ) ର ଅଧ୍ୟକ୍ଷ ସି.ଏସ. ସେଟ୍ଟୀ ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ।

ଏହି ଘୋଷଣା ଏକ ସମୟରେ ଆସିଛି ଯେତେବେଳେ ଚଳିତ ଆର୍ଥିକ ବର୍ଷର ଏପ୍ରିଲ-ଜୁନ ତ୍ରୈମାସିକରେ ଭାରତର ଜିଡିପି ୭.୮% ହାରରେ ବୃଦ୍ଧି ପାଇଛି, ଯାହା ଗତ ପାଞ୍ଚ ତ୍ରୈମାସିକରେ ସର୍ବାଧିକ। ତଥାପି, ଆମେରିକା ସଂଯୁକ୍ତ ରାଷ୍ଟ୍ର ଦ୍ୱାରା ଭାରତ ଉପରେ ନୂତନ ଭାବେ ଲାଗୁ କରାଯାଇଥିବା ଉଚ୍ଚ ଶୁଳ୍କ ଅର୍ଥନୀତି ପାଇଁ ଏକ ଚ୍ୟାଲେଞ୍ଜ ସୃଷ୍ଟି କରିପାରେ।

ମଲହୋତ୍ରା ଆଗକୁ ମଧ୍ୟ ଆର୍ଥିକ ସ୍ଥିରତା ଏବଂ ଅଗ୍ରଗତି ପାଇଁ ଆରବିଆଇର ପ୍ରତିବଦ୍ଧତା ଉପରେ ଜୋର ଦେଇଛନ୍ତି, ଯାହା ଭାରତକୁ ବିଶ୍ୱ ଅର୍ଥନୀତିରେ ଏକ ପ୍ରମୁଖ ସ୍ଥାନ ଅଧିକାର କରିବାରେ ସହାୟକ ହେବ।