ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଚୀନ୍ ଗସ୍ତ ପୂର୍ବରୁ ଭାରତ-ଚୀନ୍ ସମ୍ପର୍କର ଗୁରୁତ୍ୱ ଉପରେ ଜୋର ଦେଇଛନ୍ତି। ସେ କହିଛନ୍ତି ଯେ ଦୁଇ ଦେଶ ମଧ୍ୟରେ ସ୍ଥିର, ପୂର୍ବାନୁମାନଯୋଗ୍ୟ ଏବଂ ବନ୍ଧୁତ୍ୱପୂର୍ଣ୍ଣ ସମ୍ପର୍କ କେବଳ ଉଭୟ ଦେଶ ପାଇଁ ନୁହେଁ, ବରଂ ଏସିଆ ତଥା ବିଶ୍ୱରେ ଶାନ୍ତି ଓ ସ୍ଥିରତା ପାଇଁ ଅତ୍ୟନ୍ତ ଜରୁରୀ। ଏହି ମନ୍ତବ୍ୟ ସେ ଜାପାନର ଏକ ଖବରକାଗଜ ‘ଇୟୋମିଉରି ଶିମ୍ବୁନ୍’କୁ ଦେଇଥିବା ଏକ ସାକ୍ଷାତକାରରେ ପ୍ରକାଶ କରିଛନ୍ତି। ଏହା ତାଙ୍କର ଚୀନ୍ ଗସ୍ତର ଗୋଟିଏ ଦିନ ପୂର୍ବରୁ ଆସିଛି, ଯେଉଁଠାରେ ସେ ଚୀନ୍ ରାଷ୍ଟ୍ରପତି ଶି ଜିନପିଙ୍ଗଙ୍କୁ ଭେଟିବାର କାର୍ଯ୍ୟକ୍ରମ ରହିଛି।
ମୋଦୀ ଜାପାନରେ ଥିବାବେଳେ ଜାପାନ ପ୍ରଧାନମନ୍ତ୍ରୀ ଶିଗେରୁ ଇଶିବାଙ୍କ ସହ ଉଚ୍ଚସ୍ତରୀୟ ଆଲୋଚନା କରିଛନ୍ତି। ସେ ଅଗଷ୍ଟ ୩୧ ତାରିଖରେ ଚୀନ୍ର ତିଆନଜିନ୍ ସହରକୁ ଯିବେ, ଯେଉଁଠାରେ ସେ ଶାଙ୍ଘାଇ କୋଅପରେସନ୍ ଅର୍ଗାନାଇଜେସନ୍ (ଏସସିଓ) ଶିଖର ସମ୍ମିଳନୀରେ ଯୋଗ ଦେବେ। ଏହି ସମ୍ମିଳନୀରେ ସେ ଶି ଜିନପିଙ୍ଗ ଓ ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ଦ୍ୱିପାକ୍ଷିକ ଆଲୋଚନା ମଧ୍ୟ କରିବେ। ଏହା ତାଙ୍କର ସାତ ବର୍ଷ ପରେ ଚୀନ୍ରେ ପ୍ରଥମ ଗସ୍ତ ହେବ।
ମୋଦୀ କହିଛନ୍ତି ଯେ, ଗତ ବର୍ଷ ରୁଷିଆର କାଜାନ୍ରେ ଶି ଜିନପିଙ୍ଗଙ୍କ ସହ ତାଙ୍କ ବୈଠକ ପରେ ଭାରତ-ଚୀନ୍ ସମ୍ପର୍କରେ ସ୍ଥିର ଓ ସକାରାତ୍ମକ ଅଗ୍ରଗତି ହୋଇଛି। ୨୦୨୦ ମସାହାରେ ଗାଲୱାନ୍ ଉପତ୍ୟକାରେ ହୋଇଥିବା ସଂଘର୍ଷ ପରେ ଦୁଇ ଦେଶ ମଧ୍ୟରେ ସମ୍ପର୍କ ନିମ୍ନ ସ୍ତରକୁ ଚାଲି ଯାଇଥିଲା। ତେବେ ଏବେ ସୀମାନ୍ତ ସମସ୍ୟା ସମାଧାନ ପାଇଁ ଉଭୟ ଦେଶ ମଧ୍ୟରେ ୧୦ଟି ବିଷୟରେ ସହମତି ହୋଇଛି। ଯାହା ସୀମାନ୍ତରେ ଶାନ୍ତି ଓ ସ୍ଥିରତା ବଜାୟ ରଖିବାକୁ ସହାୟକ ହେବ।
ଏହି ଗସ୍ତ ଏମିତି ଏକ ସମୟରେ ହେଉଛି ଯେତେବେଳେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନେତୃତ୍ୱାଧୀନ ପ୍ରଶାସନ ଭାରତୀୟ ରପ୍ତାନୀ ଉପରେ ୫୦ ପ୍ରତିଶତ ପର୍ଯ୍ୟନ୍ତ ଶୁଳ୍କ ଜାରି କରିଛି। ଏହା ଭାରତର ରୁଷ୍ରୁ ତୈଳ କ୍ରୟ ଜାରି ରଖିବା ଯୋଗୁଁ ହୋଇଛି, ଯାହା ଆମେରିକା ଦାବି କରୁଛି ଯେ ଏହା ରୁଷ୍ର ଯୁଦ୍ଧକୁ ଅର୍ଥ ଯୋଗାଇ ଦେଉଛି। ଏହି ପରିପ୍ରେକ୍ଷୀରେ ଭାରତ ଚୀନ୍ ଓ ରୁଷ୍ ସହ ସମ୍ପର୍କକୁ ଆହୁରି ଗାଢ଼ କରିବାକୁ ଚେଷ୍ଟା କରୁଛି। ଯାହା ଆଞ୍ଚଳିକ ଓ ବିଶ୍ୱସ୍ତରୀୟ ସ୍ଥିରତା ପାଇଁ ଏକ କୌଶଳଗତ ପଦକ୍ଷେପ ବୋଲି ବିଶ୍ଳେଷକମାନେ ମତ ପ୍ରକାଶ କରିଛନ୍ତି।
ଏସସିଓ ଶିଖର ସମ୍ମିଳନୀରେ ଭାରତ ବାଣିଜ୍ୟ, ସଂଯୋଗୀକରଣ ଓ ସାର୍ବଭୌମତ୍ୱର ସମ୍ମାନ ଉପରେ ଗୁରୁତ୍ୱ ଦେବ। ଏହା ସହ ଭାରତ ଓ ଚୀନ୍ ମଧ୍ୟରେ ସୀମାନ୍ତ ସମସ୍ୟା, ବାଣିଜ୍ୟ ଓ ଅର୍ଥନୈତିକ ସହଯୋଗ ଆଦି ବିଷୟରେ ଆଲୋଚନା ହେବାର ସମ୍ଭାବନା ରହିଛି। ଏହି ଗସ୍ତ ଭାରତ-ଚୀନ୍ ସମ୍ପର୍କରେ ଏକ ନୂଆ ଅଧ୍ୟାୟର ସୂଚନା ଦେଉଛି। ଯାହା ବିଶ୍ୱ ରାଜନୀତିରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିପାରେ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
