ନୂଆଦିଲ୍ଲୀ ୧୮/୦୧: ମାଲେସିଆର କ୍ୱାଲାଲୁମ୍ପୁର ଠାରେ ଶନିବାରଠୁ ଆରମ୍ଭ ହେଉଛି ଆଇସିସି ୧୯ବର୍ଷରୁ କମ୍ ମହିଳା ଟି-ଟ୍ୱେଣ୍ଟି ବିଶ୍ୱକପ୍ର ଦ୍ୱିତୀୟ ସଂସ୍କରଣ । ପ୍ରଥମ ଦିବସରେ ମୋଟ ୬ଟି ମ୍ୟାଚ୍ ରହିଛି । ଭାରତ ଟୁର୍ଣ୍ଣାମେଣ୍ଟରେ ଡିଫେଣ୍ଡିଂ ଚାମ୍ପିଅନ୍ ରହିଛି । ଦଳ ଆସନ୍ତା ୧୯ ତାରିଖରେ ୱେଷ୍ଟଇଣ୍ଡିଜ୍ ବିପକ୍ଷରେ ଅଭିଯାନ ଆରମ୍ଭ କରିବ ।
ଯୁବା ବିଶ୍ୱକପ୍ରେ ମୋଟ ୧୬ଟି ଦଳ ୪ଟି ଗ୍ରୁପ୍ (ଏ, ବି, ସି, ଡି)ରେ ଭାଗ ନେଉଛନ୍ତି । ଭାରତ ଗ୍ରୁପ୍-ଏ’ରେ ଆୟୋଜକ ମାଲେସିଆ, ୱେଷ୍ଟଇଣ୍ଡିଜ୍, ଶ୍ରୀଲଙ୍କା ସହ ସ୍ଥାନ ପାଇଛି । ୱେଷ୍ଟଇଣ୍ଡିଜ୍ ବିପକ୍ଷରେ ଦଳ ଅଭିଯାନ ଆରମ୍ଭ କରିବ । ଏହାପରେ ଭାରତ ୨୧ତାରିଖ ମାଲେସିଆ, ୨୩ତାରିଖରେ ଶ୍ରୀଲଙ୍କାକୁ ଭେଟିବ । ଗ୍ରୁପ୍ ପର୍ଯ୍ୟାୟରେ ପ୍ରତି ଗ୍ରୁପ୍ରୁ ଶ୍ରେଷ୍ଠ ପ୍ରଦର୍ଶନକାରୀ ୩ଟି ଲେଖାଏଁ ଦଳ ସୁପର-୬କୁ ଉନ୍ନୀତ ହେବେ । ସୁପର-୬ରେ ୨ଟି ଗ୍ରୁପ୍ରେ ୧୨ଟି ଦଳ ପ୍ରତିଦ୍ୱନ୍ଦ୍ୱିତା କରିବେ । ଉଭୟ ଗ୍ରୁପ୍ର ଶ୍ରେଷ୍ଠ ପ୍ରଦର୍ଶନକାରୀ ୨ଟି ଲେଖାଏଁ ଦଳ ସେମି ଫାଇନାଲ୍ରେ ପ୍ରବେଶ କରିବେ । ଆଗାମୀ ଜାନୁଆରୀ ୩୧ ତାରିଖରେ ଉଭୟ ସେମି ଫାଇନାଲ୍ ଏବଂ ଫେବ୍ରୁଆରୀ ୨ ତାରିଖରେ ଫାଇନାଲ୍ ଖେଳାଯିବ ।
ସୂଚନାଯୋଗ୍ୟ, ପ୍ରଥମ ସଂସ୍କରଣର ଫାଇନାଲ୍ରେ ଆୟୋଜକ ଦକ୍ଷିଣ ଆଫ୍ରିକାକୁ ୭ ୱିକେଟ୍ରେ ହରାଇ ଭାରତ ଚାମ୍ପିଅନ୍ ହୋଇଥିଲା । ଚଳିତ ଥର ଯୁବା ଅଲରାଉଣ୍ଡର ନିକି ପ୍ରସାଦ ଭାରତୀୟ ଦଳର ନେତୃତ୍ୱ ନେବେ । ତାଙ୍କ ଅଧିନରେ ଦଳ ଗତ ଏସିଆ କପ୍ରେ ଚାମ୍ପିଅନ୍ ହୋଇଥିଲା । ଅନ୍ୟ ଅଲରାଉଣ୍ଡର ସାନିକା ଚଲ୍କେ ଉପଅଧିନାୟିକା ଦାୟିତ୍ୱ ନିର୍ବାହ କରିବେ ।
ଭାରତୀୟ ଦଳ: ନିକି ପ୍ରସାଦ (ଅଧିନାୟିକା), ସାନିକା ଚଲକେ (ଉପ ଅଧିନାୟିକା), ଗଙ୍ଗୋଦି ତ୍ରିଶା, ଜି. କମଳିନୀ, ଭବିକା ଆହିରେ, ଈଶ୍ୱରୀ ଆୱାସାରେ, ମିଥିଳା ବିନୋଦ, ଭିଜେ ଯୋଶିତା, ସୋନମ ଯାଦବ, ପାରୁଣିକା ସିସୋଦିଆ, କେଶରୀ ଦ୍ରିତି, ଆୟୂଷୀ ଶୁକ୍ଳା, ଆନନ୍ଦିତା କିଶୋର, ଏମ୍ଡି ସବନମ୍, ବୈଷ୍ଣବୀ ଶର୍ମା ।
