ଜୟପୁର, ୨୭।୨: ବର୍ତ୍ତମାନ ସମୟରେ ବି ଯୌତୁକ ପାଇଁ ଝିଅକୁ ହତ୍ୟା କରୁଥିବା ଅନେକ ଖବର ସାମନାକୁ ଆସୁଛି । କେଉଁଠି ଯୌତୁକ ପାଇଁ କିରୋସିନ ଢାଳି ଶ୍ୱଶୁର ଘର ଲୋକ ଝିଅକୁ ହତ୍ୟା କରୁଛନ୍ତି ତ କେଉଁଠି ଝିଅ ଯୌତୁକ ନିର୍ଯ୍ୟାତନା ସହିନପାରି ଶେଷ ପନ୍ଥା ଭାବେ ଆତ୍ମହତ୍ୟାକୁ ବାଛୁଛି । ବର୍ଷ ବର୍ଷ ଧରି ଚାଲି ଆସିଥିବା ଏଭଳି ପରମ୍ପରା ପାଇଁ ଅନେକ ଝିଅ ନିଜ ଜୀବନକୁ ଜଳାଞ୍ଚଳି ଦେଉଛନ୍ତି । ସାମାନ୍ୟ ଯୌତୁକ ପାଇଁ ଝିଅକୁ ହରାନ୍ତି ବାପଘର । ଯୌତୁକ ଲାଗି କେଉଁଠି ବିବାହ ଭାଙ୍ଗିଯାଉଛି ତ କିଏ ଘରୋଇ ହିଂସାର ଶିକାର ହେଉଛି । ପ୍ରାୟତଃ ଏଭଳି ଘଟଣା ଖବର ଶିରୋନାମା ପାଲଟିଆସୁଛି । ଅନ୍ୟପଟେ ସମାଜରେ ଏଭଳି କିଛି ବ୍ୟକ୍ତି ଅଛନ୍ତି, ଯିଏ କି ଯୌତୁକକୁ ନା କହି ଉଦାହରଣ ସାଜିଥାନ୍ତି । ନିକଟରେ ରାଜସ୍ଥାନର ବର-କନ୍ୟା ଯୌତୁକ ପ୍ରଥାକୁ ଶେଷ କରିବାକୁ ଏଭଳି ପଦକ୍ଷେପ ନେଇ ସମାଜକୁ ଦେଇଛନ୍ତି ବଡ଼ ବାର୍ତ୍ତା । ରାଜସ୍ଥାନର ଦୁଇ ଜଣ IPS ଏବଂ IAS ଯୋଡ଼ି । ମାତ୍ର ୧ ଟଙ୍କାରେ ଦୁହିଁଙ୍କ ବିବାହ ଶେଷ ହୋଇଛି ।
ସୁରତପୁରର ବାସିନ୍ଦା IPS ରାଜକୁମାର ମୀନା, ଭରତପୁର ଜିଲ୍ଲାର IAS ଭାରତୀ ମୀନାଙ୍କୁ ବିବାହ କରିଛନ୍ତି । ପେସାରେ ଆଇପିଏସ୍ ରାଜକୁମାର ଜଣେ ଉଚ୍ଚପଦସ୍ଥ ଅଧିକାରୀ ହେବା ସତ୍ତ୍ୱେ ବିବାହ ଯୌତୁକ ନେବାକୁ ସିଧାସଳଖ ମନା କରିଦେଇଥିଲେ । ଉଭୟ ପରିବାର ତାଙ୍କ ପ୍ରସ୍ତାବକୁ ସସମ୍ମାନରେ ଗ୍ରହଣ କଲେ । ଏହି ଶୁଭ ବିବାହ ପାଇଁ IPSଙ୍କ ବାପା ବିବାହ ଭଳି ଶୁଭ କାର୍ଯ୍ୟ ପାଇଁ ଝିଅ ଘରୁ ମାତ୍ର, ୧ ଟଙ୍କା ନେଇଥିଲେ । ଦାନରେ ଗୋଟିଏ ନଡ଼ିଆ ନେଇ ବିବାହ ସମ୍ପନ୍ନ କରାଇଥିଲେ ଏବଂ ଯୌତୁକମୁକ୍ତ ବିବାହକୁ ପ୍ରୋତ୍ସାହିତ କରିଥିଲେ ।
IPS ରାଜକୁମାରଙ୍କ ଦାଦା ଆଦିବାସୀ ମୀନା ସମ୍ପ୍ରଦାୟର ଜିଲ୍ଲା ଉପାଧ୍ୟକ୍ଷ । ତାଙ୍କ ନାଁ କାଞ୍ଜି ମୀନା । ତାଙ୍କ ପୁତୁରା ରାଜକୁମାରଙ୍କ ବିବାହରେ ଯୌତୁକ ନେବା ବଦଳରେ ଶୁଭ କାର୍ଯ୍ୟ ପାଇଁ କେବଳ ୧ ଟଙ୍କା ନିଆଯାଇଥିବା ସେ କହିଛନ୍ତି । ସେ କହିଥିଲେ ଯେ, ଏହି ପଦକ୍ଷେପ ସହିତ ଯୌତୁକ ପ୍ରଥା ଭଳି ସାମାଜିକ କୁପ୍ରଥାର ମୂଳୋତ୍ପାଟନ ଆରମ୍ଭ କରାଯାଇଛି । କାଞ୍ଜି ମୀନା କହିଛନ୍ତି, ଯେ ପ୍ରଥମେ ବୟସ୍କମାନେ ଏହାକୁ ଉଚ୍ଛେଦ କରିବା ଉଚିତ୍ । ଯାହା ଫଳରେ ମଧ୍ୟବିତ୍ତ କିମ୍ବା ଗରିବ ଲୋକଙ୍କ ଉପରେ ଏଭଳି ନିୟମ ପାଳନ କରିବାର ଚାପ ପଡ଼ିବ । ଏବେ ଯୌତୁକ ମୁକ୍ତ ବିବାହ ଆରମ୍ଭ ହୋଇଛି, ଏବେ ଧୀରେ ଧୀରେ ସମାଜରୁ ଯୌତୁକ ପ୍ରଥା ମଧ୍ୟ ଶେଷ ହେବ । ଉଭୟଙ୍କ ବିବାହରୁ ପ୍ରେରିତ ହୋଇ ଅନ୍ୟମାନେ ମଧ୍ୟ ଯୌତୁକମୁକ୍ତ ବିବାହ କରିବେ ବୋଲି IPS ରାଜକୁମାର ଓ IAS ଭାରତୀ ଏଭଳି ପଦକ୍ଷେପ ନେଇଥିବା କହିଛନ୍ତି ।
