ପାଟକୁରା,୧୩/୦୫: ହିନ୍ଦୁ ଧର୍ମରେ ବିବାହ ବେଦିରେ ଅଗ୍ନିକୁ ସାକ୍ଷୀ ରଖି ସାତ ଜନ୍ମ ପାଇଁ ବର-କନ୍ୟା ସଂସାର ଗଢ଼ିବାକୁ ଶପଥ ନେଇଥାଆନ୍ତି । ସାଥୀ ହୋଇ ବଞ୍ଚିବା ଓ ମରିବା ପାଇଁ ସଂକଳ୍ପ କରିଥାନ୍ତି । ପରସ୍ପର ପ୍ରତି ପ୍ରଗାଢ଼ ଭଲପାଇବା ଓ ବିଶ୍ୱାସ ଏଭଳି ସଂକଳ୍ପର ଆଧାର ହୋଇଥାଏ । ଏପରି ଏକ ଦମ୍ପତିଙ୍କ କାହାଣୀ କେନ୍ଦ୍ରାପଡ଼ା ଜିଲ୍ଳା ପାଟକୁରା ଥାନା ଅନ୍ତର୍ଗତ ବେଡାରୀ ପଞ୍ଚାୟତର ହରିଦାସପୁର ଗ୍ରାମରେ ଦେଖିବାକୁ ମିଳିଛି । ଗୋଟିଏ ଦିନରେ ଆଗପଛ ହୋଇ ହାତ ଧରାଧରି ହେବା ଭଳି ସଂସାରରୁ ବିଦାୟ ନେଇଛନ୍ତି ପତି-ପତ୍ନୀ । ପତ୍ନୀଙ୍କ ଜୁଇ ଲିଭିନଥିବା ବେଳେ ସ୍ୱାମୀଙ୍କର ମୃତ୍ୟୁ ଘଟିଛି । ସଂପୃକ୍ତ ଦମ୍ପତି ହେଲେ କୁଳମଣି ପରିଡ଼ା (୯୨) ଓ ପତ୍ନୀ ନୟନା (୮୬) । ବାର୍ଦ୍ଧକ୍ୟ ଜନିତ କାରଣରୁ କୁଳମଣି ଓ ନୟନା ଉଭୟ ଚିକିତ୍ସାଧୀନ ଥିଲେ ।
ରବିବାର ଅପରାହ୍ଣ ପ୍ରାୟ ସାଢ଼େ ୫ଟାରେ ନୟନାଙ୍କର ମୃତ୍ୟୁ ହୋଇଥିଲା । ପରିବାର ଲୋକେ ଓ ଆତ୍ମୀୟ ସ୍ୱଜନ ବିଳମ୍ବିତ ରାତିରେ ଚିତ୍ରୋତ୍ପଳା ନଦୀ କୂଳରେ ନୟନାଙ୍କ ଶବଦାହ ସାରି ଶୁକ୍ରବାର ସକାଳୁ ଘରକୁ ଫେରିଥିଲେ । ପତ୍ନୀଙ୍କ ବିୟୋଗରେ ମର୍ମାହତ କୁଳମଣିଙ୍କର ସକାଳ ପ୍ରାୟ ୯ଟାରେ ପରଲୋକ ହୋଇ ଯାଇଥିଲା । ସ୍ୱଳ୍ପ ସମୟର ବ୍ୟବଧାନରେ ଦମ୍ପତିଙ୍କ ଏଭଳି ମୃତ୍ୟୁ ଘଟଣାରୁ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଭଲପାଇବା ଯେ କେତେ ନିବିଡ଼ ଥିଲା, ତାହା ସ୍ପଷ୍ଟ ବୋଲି ସାଧାରଣରେ ଚର୍ଚ୍ଚା ହେଉଛି । ମୃତ ଦମ୍ପତିଙ୍କ ଏକମାତ୍ର ପୁଅ ତଥା ଗରଦପୁର ବ୍ଲକ୍ର ପୂର୍ବତନ ଉପାଧ୍ୟକ୍ଷ ଜ୍ୟୋତିରଂଜନ ପରିଡ଼ା ଓ ପରିବାର ଲୋକେ ମୃତ୍ୟୁଶଯ୍ୟା ନିକଟରେ ଉପସ୍ଥିତ ଥିଲେ ।
