ଭୁବନେଶ୍ବର,୦୩/୦୧/୨୦୨୫: ଶୁକ୍ରବାର ରାଜ୍ୟ କ୍ୟାବିନେଟରେ ୯ଟି ପ୍ରସ୍ତାବକୁ ମଞ୍ଜୁରୀ ପ୍ରଦାନ କରାଯାଇଛି। ୯ଟି ପ୍ରସ୍ତାବ ମଧ୍ୟରେ ସୁଭଦ୍ରା ଯୋଜନା, ସୋଲାର ସବସିଡି, ଭିନ୍ନକ୍ଷମଙ୍କ ପାଇଁ ଭତ୍ତା ଆଦି ଉପରେ ମୋହର ମାଜିଛି। ଏନେଇ ମୁଖ୍ୟ ଶାସନ ସଚିବ ମନୋଜ ଆହୁଜା ସୂଚନା ଦେଇଛନ୍ତି। 

ମୁଖ୍ୟ ଶାସନ ସଚିବ କହିଛନ୍ତି ଯେ, କ୍ୟାବିନେଟରେ ‘ସୁଭଦ୍ରା’ ଯୋଜନାକୁ ନେଇ ବଡ଼ ନିଷ୍ପତ୍ତି ନିଆଯାଇଛି। ଏହି ନିଷ୍ପତ୍ତି ଆଧାରରେ ୩୧ ମାର୍ଚ୍ଚ ୨୦୨୫ ସୁଦ୍ଧା ସୁଭଦ୍ରା ଆବେଦନ କଲେ ୨ଟି କିସ୍ତିର ଟଙ୍କା ମିଳିବ। ଅର୍ଥାତ ମାର୍ଚ୍ଚ ସୁଦ୍ଧା ଯେଉଁ ମହିଳା ମାନେ ଆବେଦନ କରିଥିବେ ସେମାନେ ଏକକାଳୀନ ୨ଟି କିସ୍ତି ପାଇବେ।  ସେହିଭଳି ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା ପାଇଁ ୮୭୪.୧୪ କୋଟି ଟଙ୍କା ପାଣ୍ଠି ବ୍ୟବସ୍ଥା କରାଯାଇଛି। ୫ ବର୍ଷରେ ଏହି ଟଙ୍କା ଖର୍ଚ୍ଚ କରାଯିବ। ଏଥି ସହ ଏହି ରାଶି ଦ୍ବାରା କୃଷି ଉଦ୍ୟୋଗୀଙ୍କୁ ସବସିଡି ସହାୟତା ମିଳିବ। 

ଆହୁରି ମଧ୍ୟ ୮୦ ପ୍ରତିଶତରୁ ଅଧିକ ଭିନ୍ନକ୍ଷମ ଓ ୮୦ ବର୍ଷରୁ ଅଧିକ ବୟସ୍କଙ୍କ ଭତ୍ତା ବଢ଼ାଇବା ପ୍ରସ୍ତାବକୁ ମଧ୍ୟ ଅନୁମୋଦନ ମିଳିଛି। ଏହି ଭତ୍ତାକୁ ମାସିକ ୧୨୦୦ରୁ ୩୫୦୦କୁ ବୃଦ୍ଧି କରାଯାଇଛି। କ୍ୟାବିନେଟ ପିଏମ ସୂର୍ଯ୍ୟଘର ଯୋଜନାରେ ସୋଲାର ଲଗାଇବା ଉପରେ ମଧ୍ୟ ଏକ ବଡ଼ ନିଷ୍ପତ୍ତି ନେଇଛନ୍ତି। ଏହା ଅନୁଯାୟୀ, ଏଣିକି କିଲୋଓ୍ବାଟ ପିଛା ରାଜ୍ୟ ସରକାର ଦେବେ ୨୫ ହଜାର ଟଙ୍କାର ସବସିଡି । ଯଦି ୩ କିଲୋଓ୍ବାଟ ସୋଲାର ଲଗାଉଛନ୍ତି ତେବେ ରାଜ୍ୟ ସରକାର ଆଉ ଅତିରିକ୍ତ ୧୦ ହଜାର ଟଙ୍କାର ମଧ୍ୟ ସବସିଡି ଦେବେ। ଏଥିପାଇଁ ୨୦୨୪ରୁ ୨୦୨୭ ମଧ୍ୟରେ ଖର୍ଚ୍ଚ ହେବ ୧୮୦୦ ଟଙ୍କା। ଏଥିରେ ପ୍ରାୟ ୩ ଲକ୍ଷ ଘରୋଇ ବିଜୁଳି ଉପଭୋକ୍ତା ଲାଭାନ୍ବିତ ହେବେ। ସେହିଭଳି କ୍ୟାବିନେଟରେ OS & ES ଓ OSS & ES କ୍ୟାଡର ପୁନର୍ଗଠନ, ପରିସଂଖ୍ୟାନ ଅଧିକାରୀ ପଦ ସଂଖ୍ୟା ୧୭୨ରୁ ୧୫୫କୁ ହ୍ରାସ ଉପରେ ପ୍ରସ୍ତାବ।  ନନ୍ ଏନଏଫଏସଏ/ଏସଏଫଏସଏସ ଆବେଦନର ବିଚାର ପ୍ରସ୍ତାବ ଉପରେ ମଧ୍ୟ ମୋହର ମାରିଛନ୍ତି।