ବଣାଇ, ୧୩/୦୩ : ଶୋଇଥିବା ବେଳେ ଭୁଶୁଡ଼ି ପଡ଼ିଲା ଘର। ଦିବ୍ୟାଙ୍ଗ ସ୍ଵାମୀ ମୃତ ସ୍ତ୍ରୀ ଆହତ। ଅଳ୍ପକେ ବର୍ତ୍ତିଗଲା ଶିଶୁ। ସୁନ୍ଦରଗଡ଼ ଜିଲ୍ଲା ବଣାଇ ବ୍ଲକ ଗୋବିନ୍ଦପୁର ପଞ୍ଚାୟତ ଦେଉଳହୁଡ଼ି ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି।
ସୂଚନାନୁଯାୟୀ, ଦେଉଳହୁଡ଼ି ଗ୍ରାମର ଜେନା ମୁଣ୍ଡାରୀ ଜଣେ ଦିବ୍ୟାଙ୍ଗ। ସରକାରୀ ଯୋଜନାରେ ଘରଟିଏ ପାଇଁ ବହୁ ବର୍ଷ ହେଲା ସେ ସରପଞ୍ଚଙ୍କୁ ଗୁହାରୀ କରି ଆସୁଥିଲେ। ହେଲେ ତାଙ୍କ ଦୁଃଖ କେହି ଶୁଣିନଥିଲେ। ସେ ନିଜେ ଏକ ଅସ୍ଥାୟୀ ଘର ତିଆରି କରି ରହୁଥିଲେ। ବୁଧବାର ରାତିରେ ଜେନା ମୁଣ୍ଡାରୀ, ସ୍ତ୍ରୀ ସୁକୁଆର ମୁଣ୍ଡାରୀ ଏବଂ ୮ ବର୍ଷର ଶିଶୁ ପୁତ୍ର ଘରେ ଶୋଇଥିଲେ। ରାତିରେ ହଠାତ୍ ଘର ଭାଙ୍ଗିବା ଆରମ୍ଭ କଲା। ଏଥିରେ ଶିଶୁ ପୁତ୍ରର ନିଦ ଭାଙ୍ଗିଗଲା। ସେ ଘରୁ ଦୌଡ଼ି ବାହାରକୁ ଚାଲି ଆସିଲା। ହେଲେ ଘର ଭିତରେ ଜେନା ମୁଣ୍ଡାରୀ ଓ ସ୍ତ୍ରୀ ସୁକୁଆର ରହିଯାଇଥିଲେ। ତାଙ୍କ ଉପରେ ଘରଟି ମାଡ଼ି ବସିଥିଲା। ଜେନା ମୁଣ୍ଡାରୀ ଗୁରୁତର ହେବାରୁ ତାଙ୍କୁ ବଣାଇ ଚିକିତ୍ସାଳୟକୁ ଅଣାଯାଇଥିଲା। ହେଲେ ସେଠାରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ସେପଟେ ସ୍ତ୍ରୀ ସୁକୁଆର ଆହତ ହୋଇଛନ୍ତି।
ଏହି ଖବରଟିକୁ ପଢନ୍ତୁ-ଭାରସାମ୍ୟ ହରାଇ ନୟନଜୋରୀକୁ ଓଲଟିଲା କୋଇଲା ବୋଝେଇ ଟ୍ରକ୍
