କଟକ,୧୦।୬ : ମାହାଙ୍ଗା ଜଳେଶ୍ଵରପୁର ଅଞ୍ଚଳର ଜଣେ ଯବାନଙ୍କ ପତ୍ନୀଙ୍କ ତ୍ରୁଟିପୂର୍ଣ୍ଣ ଅସ୍ତ୍ରୋପଚାରରେ ମଳ ନଳୀ କାଟିଦେବା ଘଟଣା ଏବେ କଟକରେ ବିରୋଧ ସ୍ୱର ତେଜିବାରେ ଲାଗିଛି। ଏକ ଘରୋଇ ନର୍ସିଂହୋମରେ ଏଭଳି ଘଟଣା ଘଟିଥିବାବେଳେ ଉକ୍ତ ହସ୍ପିଟାଲ ବିରୁଦ୍ଧରେ ଏ ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବା ନେଇ ଜିଲ୍ଲା ମୁଖ୍ୟ ସ୍ୱାସ୍ଥ୍ୟ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛି କଟକ ହିନ୍ଦୁସେନା। ଗତ ୭ଦିନ ହେବ ମଙ୍ଗଳାବାଗ ଥାନାରେ ଏତଲା ହୋଇଥିଲେ ମଧ୍ୟ ପୁଲିସ ଚୁପ୍ ରହିବାକୁ ନେଇ ମଧ୍ୟ ନିନ୍ଦା କରିବା ସହ ନାରାବାଜି ଦିଆଯାଇଥିଲା।
ଏହାସହ କଟକ ଭଳି ସହରରେ ମାଳ ମାଳ ବେଆଇନ ଘରୋଇ ହସ୍ପିଟାଲ ଥିଲେ ମଧ୍ୟ ଜିଲ୍ଲା ସ୍ୱାସ୍ଥ୍ୟ ବିଭାଗର ଏ ଦିଗରେ ଯାଞ୍ଚ୍ ପ୍ରକ୍ରିୟା ଠପ ବୋଲି ହିନ୍ଦୁସେନା ଆଭିଯୋଗ ଆଣିଛି। ଏଭଳି ଘଟଣା ଘରୋଇ ହସ୍ପିଟାଲ ବିରୋଧରେ ଅନେକ ଥର ଆସୁଥିଲେ ମଧ୍ୟ ସ୍ୱାସ୍ଥ୍ୟ ବିଭାଗର ନୀରବକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ତେଣୁ ଘଟଣାର ତଦନ୍ତ କରି ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ହିନ୍ଦୁସେନା ଦ୍ଵାରା ଜିଲ୍ଲା ମୂଖ୍ୟ ଚିକିତ୍ସା ଅଧିକାରୀଙ୍କୁ ଦାବିପତ୍ର ପ୍ରଦାନ କରାଯାଇଛି। ଏହି କାର୍ଯ୍ୟକ୍ରମରେ ହିନ୍ଦୁସେନା ରାଜ୍ୟ ସଭାପତି ଦେବାଶିଷ ରାଉତଙ୍କ ସମେତ ହିନ୍ଦୁସେନାର କୋଷାଧ୍ୟକ୍ଷ ଅଭିଷେକ ଜେନା, ଜିଲ୍ଲା ସଭାପତି ଆଶିଷ ମହାପାତ୍ର, ଛାତ୍ର ସଭାପତି ସୁଜିତ ଦାସ,ଅଶୋକ ସାହୁ, ଅଖିଳ ମୂଳିଆ, ଅଭିଜିତ ସିଂ, ରାଜକୁମାର ପ୍ରମୁଖ ଉପସ୍ଥିତ ଥିଲେ।
