ନୂଆଦିଲ୍ଲୀ: ଅଷ୍ଟ୍ରେଲିଆ ବିପକ୍ଷରେ ଭାରତ ପକ୍ଷରୁ ଡେବ୍ୟୁ କରିଥିବା ହର୍ଷିତ ରାଣା ପ୍ରଥମ ପାଳିରେ ୩ଟି ଓ୍ବିକେଟ ନେଇଛନ୍ତି । ବୁମରାଙ୍କ ପରେ ସେ ପର୍ଥରେ ଅଧିକ ଓ୍ବିକେଟ ନେଇଛନ୍ତି । କିନ୍ତୁ ଅଷ୍ଟ୍ରେଲିଆ ବିପକ୍ଷରେ ଖେଳ ଆରମ୍ଭ ହେବା ପୂର୍ବରୁ ହର୍ଷିତ ରାଣା ଅପ୍ରସ୍ତୁତ ମନେ କରିଥିଲେ । ପର୍ଥ ଟେଷ୍ଟର ଦ୍ବିତୀୟ ଦିନରେ ଖେଳ ଶେଷ ହେବା ପରେ ହର୍ଷିତ ରାଣା କହିଛନ୍ତି, ଟିମ୍ ସାମ୍ନାରେ ହିଁ ତାଙ୍କୁ ଡେବ୍ୟୁ ନେଇ ଖବର ମିଳିଥିଲା । ଏହା ଶୁଣି ସେ ଭାବବିହ୍ବଳ ହୋଇପଡ଼ିଥିଲେ। ହର୍ଷିତଙ୍କ ବ୍ୟତୀତ ନୀତୀଶ ରେଡ୍ଡୀ ମଧ୍ୟ ଡେବ୍ୟୁ ମ୍ୟାଚ୍ ଖେଳୁଛନ୍ତି ।
ହର୍ଷିତ ରାଣା ପ୍ରଥମ ପାଳିରେ ଅଧିନାୟକ ଜସପୀତ ବୁମାରଙ୍କୁ ଖୁବ ସପୋର୍ଟ କରିଥିଲେ। ପ୍ରଥମ ପାଳିରେ ବୁମରା ୫ଟି ଓ୍ବିକେଟ ନେଇଥିବା ବେଳେ ରାଣା ୩ଟି ଓ୍ବିକେଟ ନେଇଥିଲେ। ଅଷ୍ଟ୍ରେଲିଆକୁ ଭାରତ ୧୦୪ ରନ୍ରେ ଅଲଆଉଟ୍ କରିଛି। ଏହା ପରେ ଦ୍ବିତୀୟ ଦିନରେ ଭାରତ ୨୧୮ ରନ୍ରେ ଆଗୁଆ ରହିଛି । ହର୍ଷିତ ରାଣା ୧୫.୨ ଓଭର ବୋଲିଂ କରି ୪୮ ରନ୍ ଦେବା ସହ ୩ ଟି ଓ୍ବିକେଟ ଅକ୍ତିଆର କରିବାରେ ସଫଳ ହୋଇଥିଲେ ।
ଦ୍ରୁତ ବୋଲର ରାଣା କହିଛନ୍ତି, ଡେବ୍ୟୁ କରିବା ନେଇ ଖବର ମିଳିବା ପରେ ସେ ରାତିରେ ଶୋଇପାରି ନଥିଲେ। ଯେବେ ତାଙ୍କୁ କୁହାଗଲା କି ସେ ଟେଷ୍ଟ ଖେଳିବେ, ସେ ଟିମ୍ର ବୈଠକରେ ହିଁ କାନ୍ଦି ପକାଇଥିଲେ ବୋଲି ୨୨ ବର୍ଷୀୟ ରାଣା କହିଛନ୍ତି । ହର୍ଷିତ ରାଣା କହିଛନ୍ତି, ‘ହଁ, ମୁଁ ଡେବ୍ୟୁ କରିବା କଥା ଜାଣିବା ପରେ ରାତିରେ ଶୋଇପାରି ନଥିଲି। ସକାଳେ ମୋ ଭିତରେ ଭୟ ନଥିଲା ବୋଲି କହିପାରିବି ନାହିଁ । ପ୍ରଥମ ଦିନ ମୋତେ ନର୍ଭସ ଲାଗିଥିଲା । କିନ୍ତୁ ଟିମ୍ ସାମ୍ନାରେ ଡେବ୍ୟୁ କଥା ଜାଣିବା ପରେ କାନ୍ଦି ପକାଇଥିଲି ।’ ସେ ଆହୁରି କହିଛନ୍ତି, ମୁଁ ଯେତେବେଳେ ପିଲା ଥିଲି ଅଷ୍ଟ୍ରେଲିଆ ବିପକ୍ଷ ମ୍ୟାଚ୍ ଦେଖିବାକୁ ମୋ ବାପାଙ୍କ ସହ ସକାଳୁ ଉଠୁଥିଲି । ସେତେବେଳେ ଏହା ମୋ ପାଇଁ ବହୁତ ବଡ଼ କଥା ଥିଲା ବୋଲି ହର୍ଷିତ ରାଣା କହିଛନ୍ତି ।
