ନୂଆଦିଲ୍ଲୀ,୭।୮: ପ୍ୟାରିସ୍ ଅଲମ୍ପିକ୍ସରେ ଭାରତର ସ୍ୱର୍ଣ୍ଣ ପଦକ ଆଶା ଭାଙ୍ଗି ହୋଇଯାଇଛି ଚୁରମାର। ଫାଇନାଲ ପୂର୍ବରୁ ଅଯୋଗ୍ୟ ଘୋଷିତ ହୋଇଛନ୍ତି ମହିଳା ରେସଲର ଭିନେଶ ଫୋଗାଟ । ୫୦ କେଜି ବର୍ଗରେ ଭାରତର ଷ୍ଟାର ଭିନେଶ୍ଙ୍କ ଯାତ୍ରା ବୁଧବାର ଖୁବ୍ କଷ୍ଟଦାୟକ ରହିଥିଲା। ନିଜର ତିନୋଟି ମ୍ୟାଚ୍ ଜିତିବା ପରେ ଫାଇନାଲରେ ପହଁଞ୍ଚି ସାରିଥିବା ଭିନେଶ ଅତି କମ୍ରେ ଭାରତକୁ ରୌପ୍ୟ ପଦକ ପକ୍କା କରିପାରିଥାନ୍ତେ। ହେଲେ ତାଙ୍କୁ ଆଜି ଡିସ୍କ୍ବାଲିଫାଏ କରି ଦିଆଯାଇଛି। ଭିନେଶଙ୍କ ଓଜନ ୧୦୦ ଗ୍ରାମ ଅଧିକ ଥିଲା, ଯେଉଁ କାରଣରୁ ତାଙ୍କୁ ଅଯୋଗ୍ୟ ଘୋଷିତ କରାଯାଇଛି ଓ ଏବେ ତାଙ୍କୁ କୌଣସି ପଦକ ମିଳିବ ନାହିଁ। ଅଲିମ୍ପିକ୍ସରେ କୁସ୍ତୀ ନିୟମ ଅନୁସାରେ ଦୁଇ ଦିନ ଭିତରେ ମୁକାବିଲା ହୋଇଥାଏ ଓ ଦୁଇ ଦିନ ଭାଗ ନେବାକୁ ଥିବା ରେସଲରଙ୍କୁ ଓଜନ କରାଯାଇଥାଏ।
ଭିନେଶଙ୍କ ଓଜନ କମ୍ କରିବା ପାଇଁ ତାଙ୍କ କୋଚ୍ ଓ ସର୍ପୋଟ ଷ୍ଟାଫ୍ ସବୁକିଛି କରିଛନ୍ତି, କିନ୍ତୁ ସେ ମାତ୍ର ୧୦୦ ଗ୍ରାମ୍ ଓଭରଓ୍ବେଟ୍ ଆସି ଡିସକ୍ବାଲିଫାଏ ହୋଇଗଲେ। ଭିନେଶଙ୍କୁ ବର୍ତ୍ତମାନ ହସ୍ପିଟାଲରେ ଆଡମିଟ୍ କରାଯାଇଛି। ରେସଲିଂ ଫେଡେରେସନ୍ ଅଫ୍ ଇଣ୍ଡିଆ (ଡବ୍ଲୁଏଫ୍ଆଇ)ର ଅଧ୍ୟକ୍ଷ ସଞ୍ଜୟ ସିଂହ କହିଛନ୍ତି, ଭିନେଶ ଡିହାଇଡ୍ରେସନ୍ କାରଣରୁ ହସ୍ପିଟାଲରେ ଆଡମିଟ୍ ହୋଇଛନ୍ତି।
ଭିନେଶ ଯେଉଁଭଳି ଭାବରେ ପ୍ରିକ୍ବାର୍ଟର ଫାଇନାଲ, କ୍ବାର୍ଟର ଫାଇନାଲ ଓ ସେମିଫାଇନାଲ ମ୍ୟାଚ୍ ଜିତିଛନ୍ତି,ତାଙ୍କୁ ଦେଖି ଏଭଳି ଲାଗୁଛି ସେ ଏଥର ଗୋଲ୍ଡ ମେଡେଲ ଜିତିକି ଆସିବେ। ଖବର ଅନୁସାରେ, ଫାଇନାଲର ଗୋଟେ ରାତି ଆଗରୁ ଭିନେଶଙ୍କ ଓଜନ ପ୍ରାୟ ୨ କିଲୋଗ୍ରାମ୍ ଅଧିକ ଥିଲା। ଏହାପରେ କୋଚ୍ ଓ ସର୍ପୋଟ ଷ୍ଟାଫ୍ ତାଙ୍କ ଓଜନ କମ୍ କରିବାର ସବୁ ସମ୍ଭବ ଚେଷ୍ଟା କରିଥିଲେ। ନିୟମ ପରିସରରେ ତାଙ୍କ ଦେହରୁ ରକ୍ତ ବାହାରି କରିଥିଲେ ଓ ଚୁଟି କାଟିଥିଲେ। ଏସବୁ ପରେ ମଧ୍ୟ ୧୦୦ ଗ୍ରାମ୍ ଓଜନ ଅଧିକ ହେବା କାରଣରୁ ତାଙ୍କର ମେଡାଲ ଜିତିଆାର ସ୍ବପ୍ନ ଭାଙ୍ଗି ଯାଇଛି।
