ନୂଆଦିଲ୍ଲୀ: ମଣିପୁର ମୈତିୟି ସମ୍ପ୍ରଦାୟର ମୁଖ୍ୟ ଗୋଷ୍ଠୀ ଆରମ୍ୱାଇ ଟେଙ୍ଗୋଲ ଗୁରୁବାର ସ୍ୱେଚ୍ଛାକୃତ ଭାବରେ ସୁରକ୍ଷା କର୍ମୀଙ୍କ ନିକଟରେ ୨୪୬ ଅସ୍ତ୍ରଶସ୍ତ୍ର ଜମା କରିଛନ୍ତି। ମଣିପୁରରରେ ରାଷ୍ଟ୍ରପତି ଶାସନ ଜାରି ହେବା ପରେ ସେଠାକାର ରାଜ୍ୟପାଳ ଅଜୟ ଭଲ୍ଲା ସ୍ଥାନିୟ ଲୋକମାନଙ୍କୁ ଗଚ୍ଛିତ କରି ରଖିଥିବା ବେଆଇନ ଅସ୍ତ୍ରଶସ୍ତ୍ର ଫେରାଇଦେବାକୁ ନୋଟିସ ଜାରି କରିଥିଲେ। ଆଜି ଏହାର ଶେଷଦିନ ଥିବାବେଳେ ସୁରକ୍ଷା କର୍ମିଙ୍କୁ ଏହି ସଫଳତା ପ୍ରାପ୍ତ ହୋଇଛି।
ଆଜି ଶେଷ ଦିନରେ ସ୍ଥାନିୟ ଲୋକମାନେ ମୋଟ ୩୦୭ଟି ବେଆଇନ ଅସ୍ତ୍ରଶସ୍ତ୍ର ଫେରାଇ ଦେଇଛନ୍ତି ବୋଲି ପୋଲିସ ପ୍ରେସ ବିଜ୍ଞପ୍ତିରେ ପ୍ରକାଶ କରିଛି। ଏ ସମସ୍ତ ମଧ୍ୟରୁ କେବଳ ଆରମ୍ୱାଇ ଟେଙ୍ଗୋଲ ଗୋଷ୍ଠୀ ୨୪୬ଟି ବେଆଇନ ପ୍ରଥମ ମଣିପୁର ରାଇଫଲ କ୍ୟାମ୍ପସରେ ଅସ୍ତ୍ରଶସ୍ତ୍ର ଫେରସ୍ତ କରିଛନ୍ତି।
ଅସ୍ତ୍ରଶସ୍ତ୍ର ଆତ୍ମସମର୍ପଣ କରିବା ପରେ, ଆରମ୍ବାଇ ଟେଙ୍ଗୋଲର କମିଶନର ସାଇଖୋମ ମୁନିନ୍ଦ୍ରୋ ମାଙ୍ଗାଙ୍ଗ ଗଣମାଧ୍ୟମକୁ ସାକ୍ଷାତକାର ଦେଇଥିଲେ। ରାଜ୍ୟପାଳ ଭଲ୍ଲାଙ୍କ ଦ୍ୱାରା ପ୍ରଦାନ କରାଯାଇଥିବା ପ୍ରମୁଖ ପ୍ରତିଶ୍ରୁତି ଦ୍ୱାରା ତାଙ୍କ ଗୋଷ୍ଠୀ ପ୍ରଭାବିତ ହୋଇଥିଲା ଓ ସମସ୍ତ ଅସ୍ତ୍ରଶସ୍ତ୍ର ଫେରାଇବାକୁ ନିଷ୍ପତ୍ତି ଗ୍ରହଣ କରିଥିଲା।
ସୂଚନା ମୁତାବକ, ମଣିପୁରରେ ଦୀର୍ଘ ତିନିବର୍ଷ ଧରି ମୌତିୟି ଓ କୁକି ସମ୍ପ୍ରଦାୟ ଭିତରେ ହିଂସା କାରଣରୁ ୨୫୦ ଲୋକଙ୍କ ମୃତ୍ୟୁ ହୋଇଥିଲା। ଏହି ହିଂସାରେ ହଜାର ହଜାର ଲୋକ ବାସହରା ହୋଇଯାଇଥିଲେ। ପରିସ୍ଥିତି ଅଣାୟତ ହେବାରୁ ମଣିପୁର ମୁଖ୍ୟମନ୍ତ୍ରୀ ଏନ ବିରେନ ସିଂ ନିଜ ପଦରୁ ଇସ୍ତଫା ପ୍ରଦାନ କରିଥିଲେ। ଆଉ ଏହାପରେ ସମଗ୍ର ରାଜ୍ୟରେ ଫେବୃଆରୀ ୧୩ ତାରିଖରୁ ରାଜ୍ୟରେ ରାଷ୍ଟ୍ରପତି ଶାସନ ଆରମ୍ଭ ହୋଇଯାଇଥିଲା।
ମଣିପୁର ରାଜ୍ୟ ବିଧାନସଭାର କାର୍ଯ୍ୟକାଳ ୨୦୨୭ ପର୍ଯ୍ୟନ୍ତ ବୃଦ୍ଧି ପାଇଛି। ଏହା ସହ ସରକାରୀ ବିଜ୍ଞପ୍ତି ଅନୁଯାୟୀ, ଗୃହ ମନ୍ତ୍ରଣାଳୟର ନିଷ୍ପତ୍ତିକୁ ସ୍ଥଗିତ ରଖାଯାଇଛି।
