ଟାଙ୍ଗି, ୨୯/୧୧: ଘରେ କେହି ନଥିବା ବେଳେ କଳା କନା ବୁଲାଇଲେ ଦୁର୍ବୃତ୍ତ। ଘରେ ପଶି ଲୁଟିନେଲେ ସମସ୍ତ ସୁନା ଗହଣା, ଟଙ୍କା ପଇସା ଏବଂ ଦାମୀ ଆସବାବପତ୍ର । ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଧିନ ଦେଉଳସାହି ଗାଁର ଶ୍ୱେତ ବାରିକ , ହରଷ ବାରିକ , ଜୟକୃଷ୍ଣ ବାରିକ , ବସନ୍ତ ବାରିକ , ଶରତ ବାରିକଙ୍କ ଘରୁ ଏହି ଲୁଟ୍ ହୋଇଛି ।
ସୂଚନା ମୁତାବକ, ଘରର ସମସ୍ତ ପରିବାର ଲୋକେ ନିଜର ସମ୍ପର୍କୀୟଙ୍କ ବିବାହ ଉତ୍ସବରେ ସାମିଲ ହେବାପାଇଁ ଯାଇଥିଲେ । ଏହାର ଫାଇଦା ଉଠାଇ ଚୋର ମାନେ ଗ୍ରୀଲ-କବାଟର ତାଲା ଭାଙ୍ଗି ଘରର ସମସ୍ତ ସୁନା ଗହଣା, ଟଙ୍କା ପଇସା, ଦାମୀ ଆସବାବପତ୍ର ଚୋରି କରି ନେଇଥିଲେ । ବିବାହରେ ସାମିଲ ହୋଇ ପର ଦିନ ସକାଳୁ ସମସ୍ତେ ଘରକୁ ଫେରିଥିଲେ । ଫେରିବା ପରେ ଘରର ଅବସ୍ଥା ଦେଖି ତୁରନ୍ତ ପୋଲିସ ପାଖକୁ ଯାଇଥିଲେ । ସେଠାରେ ଯାଇ ଚୋରି ହୋଇଥିବା ନେଇ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗ ଆଧାରରେ ବାଣପୁର ପୋଲିସ ଘଟଣା ସ୍ଥଳରେ ପହଞ୍ଚି ପ୍ରାଥମିକ ତଦନ୍ତ କରି ବିଭିନ୍ନ ସ୍ଥାନରେ ଥିବା ସିସିଟିଭି ଯାଞ୍ଚ କରୁଛି । ଏନେଇ ତଦନ୍ତ ଚାଲିଛି ବୋଲି ବାଣପୁର ଥାନା ନିରୀକ୍ଷକ ରମେଶ ଚନ୍ଦ୍ର ଦେବତା ସୂଚନା ଦେଇଛନ୍ତି ।
