ନୂଆଦିଲ୍ଲୀ: ମହାରାଷ୍ଟ୍ରର ପୁଣେର ସ୍ୱରଗେଟ୍ ବସ୍ ଡିପୋରେ ଏକ ବସ୍ ଭିତରେ ଜଣେ ମହିଳାଙ୍କ ସହ ହୋଇଥିବା ଦୁଷ୍କର୍ମ ଘଟଣାରେ ଅଭିଯୁକ୍ତଙ୍କ ସନ୍ଧାନ ଜୋରଦାର ହୋଇଛି। ସାରା ଦେଶରେ ଏହି ଫେରାର୍ ଅପରାଧୀଙ୍କ ପାଇଁ କଠୋର ଦଣ୍ଡ ପାଇଁ ଦାବି ବଢିବାରେ ଲାଗିଛି । ଏହି ସମୟରେ ଭାରତର ପୂର୍ବତନ ମୁଖ୍ୟ ବିଚାରପତି ଡି.ୱାଇ. ଚନ୍ଦ୍ରଚୂଡ଼ ମଧ୍ୟ ପ୍ରତିକ୍ରିୟା ରଖିଛନ୍ତି। 

ପୂର୍ବତନ ମୁଖ୍ୟ ବିଚାରପତି ଡି.ୱାଇ.ଚନ୍ଦ୍ରଚୂଡ଼ ଆଜି (ଗୁରୁବାର) କହିଛନ୍ତି ଯେ, ନିର୍ଭୟା ଘଟଣା ପରେ ଆଇନରେ ଅନେକ ସଂଶୋଧନ କରାଯାଇଥିଲା, କିନ୍ତୁ କେବଳ ଆଇନ ତିଆରି କରି ଏପରି ଅପରାଧକୁ ରୋକାଯାଇ ପାରିବ ନାହିଁ। ସେ କହିଛନ୍ତି,"ମହିଳା ମାନଙ୍କ ପାଇଁ ତିଆରି ଆଇନ ଗୁଡ଼ିକୁ ସଠିକ୍ ଭାବରେ କାର୍ଯ୍ୟକାରୀ କରାଯିବା ଉଚିତ। ମହିଳା ମାନେ ଯେଉଁଠିକୁ ଯିବେ ସେଠାରେ ସୁରକ୍ଷିତ ଅନୁଭବ କରିବା ଉଚିତ। ଏପରି କ୍ଷେତ୍ରରେ, ଉପଯୁକ୍ତ ତଦନ୍ତ, କଠୋର କାର୍ଯ୍ୟାନୁଷ୍ଠାନ, ଶୀଘ୍ର ବିଚାର ଏବଂ ଦଣ୍ଡର ଆବଶ୍ୟକତା ରହିଛି। ସେ ମହିଳାଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ପୋଲିସ ଏବଂ ନ୍ୟାୟିକ ବ୍ୟବସ୍ଥାର ଦାୟିତ୍ୱ ଉପରେ ମଧ୍ୟ ଗୁରୁତ୍ୱାରୋପ କରିଛନ୍ତି।

ଏପଟେ ବିରୋଧୀ ଦଳ ଗୁଡ଼ିକ ଏହି ଘଟଣାକୁ ୨୦୧୨ ଦିଲ୍ଲୀ ନିର୍ଭୟା ମାମଲା ସହିତ ତୁଳନା କରିଛନ୍ତି, ଯାହା ସରକାରଙ୍କ ଉପରେ ଚାପ ବୃଦ୍ଧି କରିଛି। ହିଷ୍ଟ୍ରି-ସିଟର ଦତ୍ତାତ୍ରେୟ ରାମଦାସ ଗାଡେ (୩୭)ଙ୍କୁ ଗିରଫ କରିବା ପାଇଁ ପୋଲିସ ଅନେକ ସ୍ୱତନ୍ତ୍ର ଟିମ୍ ଗଠନ କରିଛି। ପୁଣେ ପୋଲିସ କମିଶନର ଅମିତେଶ କୁମାର କହିଛନ୍ତି ଯେ ଅଭିଯୁକ୍ତର ସ୍ଥାନ ବିଷୟରେ ସୂଚନା ଦେଉଥିବା ବ୍ୟକ୍ତିଙ୍କୁ ୧ ଲକ୍ଷ ଟଙ୍କାର ପୁରସ୍କାର ଦିଆଯିବ।

ପୋଲିସ ସିସିଟିଭି ଫୁଟେଜ୍ ଆଧାରରେ ଅଭିଯୁକ୍ତଙ୍କୁ ଖୋଜୁଛି। MSRTC ପ୍ରଶାସନ ସୁରକ୍ଷା ବ୍ୟବସ୍ଥାର ସମୀକ୍ଷା ଆରମ୍ଭ କରିଛି। ପୀଡିତାଙ୍କ ବୟାନ ଆଧାରରେ, ତଦନ୍ତ ଦ୍ରୁତ ଗତିରେ ଚାଲିଛି। ଏହି ଘଟଣା ମହିଳାଙ୍କ ସୁରକ୍ଷା ସମ୍ପର୍କରେ ଗମ୍ଭୀର ପ୍ରଶ୍ନ ଉଠାଇଛି। ଅପରାଧୀଙ୍କୁ ଯଥାଶୀଘ୍ର ଗିରଫ କରିବା ଏବଂ ଶୀଘ୍ର ନ୍ୟାୟ ପ୍ରଦାନ କରିବା ପାଇଁ ସରକାର ଏବଂ ପୋଲିସ ପ୍ରଶାସନ ଉପରେ ଚାପ ବଢ଼ୁଛି।