ଭୁବନେଶ୍ୱର,୧୧/୦୨ : ଖଣ୍ଡଗିରି ଯାତ୍ରା ମହାକୁମ୍ଭର ପଞ୍ଚମ ରଜନୀରେ ୬ଟି ଅପେରା ପାର୍ଟି ରିପିଟ୍ ନାଟକ ପରିବେଷଣ କରିଛନ୍ତି। ‘ପୃଥ୍ୱୀରାଜ’ ଶନିବାର ମଞ୍ଚ ଛାଡ଼ିବା ପରେ ସେହି ମଞ୍ଚରେ ନାଟ୍ୟ ସମ୍ରାଟ ତୁଳସୀ ଗଣନାଟ୍ୟ ରବିବାର ମଞ୍ଚସ୍ଥ କରିଥିଲା ନାଟକ ‘ଜହ୍ନ ରାତିର ଝଡ଼’ । ସୋମବାର ବି ସେହି ନାଟକ ରିପିଟ୍ ହୋଇଛି । ତୁଳସୀ ଗଣନାଟ୍ୟ ସହିତ ‘ଯାଜ୍ଞସେନୀ’, ‘ବିଶ୍ୱ ଦରବାର’, ‘ଶିବାନୀ’ ‘ଦୁର୍ଗା ମନ୍ଦିର’ ଓ ‘ସୂର୍ଯ୍ୟ ମନ୍ଦିର’ ମୋଟ୍ ୫ଟି ପାର୍ଟି ମଙ୍ଗଳବାର ମଞ୍ଚରୁ ବିଦାୟ ନେବେ। ତେବେ କେବଳ ‘ତୁଳସୀ’ ଗଣନାଟ୍ୟ ଶେଷଦିନ ଅର୍ଥାତ ୧୭ ତାରିଖ ପର୍ଯ୍ୟନ୍ତ ମଞ୍ଚରେ ରହିବ ବୋଲି ଜଣାପଡିଛି ।
ପ୍ରଥମ ପର୍ଯ୍ୟାୟର ଏହି ଯାତ୍ରାନୁଷ୍ଠାନ ଗୁଡିକ ଶେଷ ରାତିରେ ସେହି ରିପିଟ୍ ନାଟକ କରି ବିଦାୟ ନେବାକୁ ଥିବା ବେଳେ କେବଳ ‘ବିଶ୍ୱ ଦରବାର’ ତା’ର ନାଟକ ପରିବର୍ତ୍ତନ କରିବ ବୋଲି ଘୋଷଣା କରିଛି । ପାର୍ଟି ମଙ୍ଗଳବାର ମଞ୍ଚସ୍ଥ କରିବ ଅନୁସନ୍ଧାନମୂଳକ ନାଟକ ‘ସବୁ ଜାଣିଛି ଚନ୍ଦ୍ରସେଣା’ । ଲରେନ୍ସ ବେହେରା, ସଞ୍ଜୟ ଭୋଳ ଓ ଦୟାଙ୍କ ଚମତ୍କାର ଅଭିନୟ ନାଟକଟିରେ ରୋମାଞ୍ଚ ଭରିଦେଇଛି । ମଙ୍ଗଳବାର ଏହିସବୁ ଅପେରା ପାର୍ଟି ବିଦାୟ ନେବା ପରେ ବୁଧବାରଠାରୁ ‘ରଙ୍ଗ ମହଲ’, ‘କୋଣାର୍କ’, ‘ସ୍ୱପ୍ନ ମହଲ’ ‘ସ୍ୱର୍ଣ୍ଣ ମହଲ’ ଓ ‘ସିଂହବାହିନୀ’ ଦ୍ୱିତୀୟ ପର୍ଯ୍ୟାୟ ଲଢ଼େଇରେ ସାମିଲହେବେ।
ଆଜିର ନାଟକ-
ମହତାବ ପେଣ୍ଡାଲ-‘ଜହ୍ନ ରାତିର ଝଡ଼’ (ତୁଳସୀ)
ଘାଟିକିଆ ସନାତନ ପେଣ୍ଡାଲ-‘ହାଇଦର୍’ (ସୂର୍ଯ୍ୟମନ୍ଦିର)
ଜାଗମରା ଇନ୍ଦିରା ମଣ୍ଡପ-‘ହାଃ କୃଷ୍ଣ ବୋଲି ଯାଉ ଜୀବ’(ଶିବାନୀ)
ଜାଗମରା ମା’ ମଙ୍ଗଳା ମଣ୍ଡପ-‘ସ୍ୱାମୀ ଖୋଜିବାକୁ ସ୍ୱର୍ଗକୁ ଯିବି’(ଦୁର୍ଗା ମନ୍ଦିର)
ଜୟଦୁର୍ଗା ମଣ୍ଡପ-‘ସବୁ ଜାଣିଛି ଚନ୍ଦ୍ରସେଣା’(ବିଶ୍ୱ ଦରବାର)
ବାବା ନୀଳକଣ୍ଠେଶ୍ୱର ମଣ୍ଡପ-‘ପାଞ୍ଚ ପତିରେ ମୁଁ ସତୀ’(ଯାଜ୍ଞସେନୀ)
