ବ୍ରହ୍ମପୁର,୨୫/୦୪: ଜଳୁଛି ପ୍ଲାଷ୍ଟିକ, ପ୍ୟାକିଂ ମେସିନ ସହ କଞ୍ଚାମାଲ। ଗୋଦାମରେ ଲାଗିଥିବା ନିଆଁକୁ ଆୟତ ପାଇଁ ନାକେଦମ୍ ହେଇଛନ୍ତି ଅଗ୍ନିଶମ କର୍ମଚାରୀ। ଘଣ୍ଟା କେଇଟା ମଧ୍ୟରେ ସବୁ ପୋଡ଼ି ନଷ୍ଟ ହୋଇଗଲା। ହୁତୁହୁତୁ ହୋଇ ଜଳିଲା ମସଲା ଓ ଆଚାର ଗୋଦାମ ଘର। ନିଆଁ ଓ ଧୁଆଁର ମାତ୍ରା ଏତେ ଅଧିକ ଥିଲା କ୍ଷଣିକ ମଧ୍ୟରେ ସମସ୍ତ ସାମଗ୍ରୀ ପୋଡି ନଷ୍ଟ ହୋଇଗଲା। ଧୁଆଁ ବାହାରୁଥିବା ଦେଖି ନିକଟରେ ବୁଲୁଥିବା ସମସ୍ତ ଲୋକ ଘର ଆଗରେ ଜମା ହୋଇଥିଲେ। ଦୀର୍ଘ ୪ ଘଣ୍ଟା ଧରି କଶରତ ପରେ ନିଆଁ ଆୟତ୍ତକୁ ଆସିଛି।
ସୂଚନା ମୁତାବକ, ଶୁକ୍ରବାର ଭୋରୁ ପାଣିଗ୍ରାହୀ ପେଣ୍ଠ ବ୍ରଜରାଜ ନଗର ପ୍ରଥମ ଲାଇନରେ ଅଗ୍ନିକାଣ୍ଡ ଘଟିଛି । ଭୋର ୪ଟା୩୦ରେ ସାହିରେ ଥିବା ଅଜୟ ସାହୁଙ୍କ ଭାରତ ଗୋଲ୍ଡ ସ୍ପାଇସ୍ସ ଗୋଦାମରୁ ଧୁଆଁ ବାହାରୁଥିବା ସ୍ଥାନୀୟ ଲୋକ ଦେଖିଥିଲେ। କ୍ଷଣିକ ମଧ୍ୟରେ ନିଆଁ ବ୍ୟାପିବା ଆରମ୍ଭ ହୋଇଥିଲା। ଦେଖୁ ଦେଖୁ ହୁତୁ ହୁତୁ ହୋଇ ସବୁ ଜଳିବାରେ ଲାଗିଥିଲା। ସ୍ଥାନୀୟ ଲୋକ ଅଜୟଙ୍କୁ ଯୋଗାଯୋଗ କରିଥିଲେ। ଏହାପରେ ଅଜୟ ବ୍ରହ୍ମପୁର ଅଗ୍ନିଶମ ବାହିନୀକୁ ଜଣାଇଥିଲେ। ଅଗ୍ନିଶମ ବାହିନୀର ୫ଟି ଟିମ୍ ଆସି ଘଟଣା ସ୍ଥଳରେ ପହଞ୍ଚିଥିଲେ। ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ। ଗୋଦମର ଗୋଟିଏ ପରେ ଗୋଟିଏ ରୁମ୍କୁ ପଶି ନିଆଁକୁ ଆୟତ୍ତ ପାଇଁ ପ୍ରଚେଷ୍ଟା କରିଥିଲେ। ପ୍ରାୟ ସାଢେ ୩ ଘଣ୍ଟା ଧରି ନିଆଁ ଲିଭାଇଥିଲେ। ଏହାପରେ ନିଆଁ ଆୟତ୍ତ ହୋଇଥିଲା। ବ୍ରହ୍ମପୁର ଅଗ୍ନିଶମ ଅଧିକାରୀ ଠାକୁର ପ୍ରସାଦ ଦଳେଇ କହିଛନ୍ତି, ଅଗ୍ନିକାଣ୍ଡରେ ଗୋଦାମ ଭିତରେ ଥିବା ସମସ୍ତ ସାମଗ୍ରୀ ଜଳି ପାଉଁଶ ହୋଇଛି। ଘର ଭିତରେ ଗରମ ମସଲା, ଆଚାର, ପ୍ଲାଷ୍ଟିକ ବୋତଲ, ଜରି ପଲିଥିନ ସମେତ ବହୁ ମେସିନ ରହିଥିଲା। ଆମର ୫ଟି ଟିମ ୪ ଘଣ୍ଟା ଧରି ନିଆଁକୁ ଆୟତ୍ତ ପାଇଁ ଲାଗିଥିଲେ। ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି। ଗୋଦାମ ମାଲିକ ଅଜୟ ସାହୁ କହିଛନ୍ତି, ଭୋର୍ ୩ଟା୩୦ ରେ ସିସିଟିଭି ଦେଖିଥିଲି। ସବୁ ଠିକ୍ ଥିଲା। କେଉଁଥିରୁ ଅଗ୍ନିକାଣ୍ଡ ହୋଇଛି ଜଣାପଡିନି। ପାଖାପାଖି ୧ କୋଟି ଟଙ୍କାର ଜିନିଷ ରହିଥିଲା। ତାହା ନଷ୍ଟ ହୋଇଛି ବୋଲି କହିଛନ୍ତି।
