ୱାଶିଂଟନ,୦୬/୦୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ନୂଆ ପ୍ରଶାସନରେ ବଡ଼ ଚେହେରା ବନିଥିବା ଏଲନ୍ ମସ୍କ ଖୁବ୍ଶୀଘ୍ର ଛାଡ଼ିବେ ହ୍ୱାଇଟ୍ ହାଉସ୍ । କିଛି ସପ୍ତାହ ପରେ ସେ ଟ୍ରମ୍ପ୍ ପ୍ରଶାସନକୁ ଅଲ୍ବିଦା କହି ନିଜ ବ୍ୟବସାୟିକ କାର୍ଯ୍ୟରେ ମନୋନିବେଶ କରିପାରନ୍ତି । ଏହି ଖବର ଆମେରିକୀୟଙ୍କ ପାଇଁ ବଡ଼ ଆଶ୍ୱସ୍ତି ଆଣିଛି । ପ୍ରାୟ ୪ ମାସ ଧରି ସେ ରାଷ୍ଟ୍ରପତି ଟ୍ରମ୍ପ୍ଙ୍କୁ ଯେଉଁ ମନ୍ତ୍ରଣା ଦେଉଥିଲେ, ସେଥିରେ ବିରାମ ଲାଗିବ ବୋଲି ଦେଶବାସୀ ଆଶା ବାନ୍ଧିଛନ୍ତି ।
ମସ୍କ ହ୍ୱାଇଟ୍ ହାଉସ୍ ଛାଡ଼ୁଥିବା ନେଇ ଉଭୟ ଟ୍ରମ୍ପ୍ ଏବଂ ଉପରାଷ୍ଟ୍ରପତି ଜେ ଡି ଭାନ୍ସ ଖୋଲାଖୋଲି ଭାବେ କହିଛନ୍ତି । ମସ୍କ ଡିଓଜିଇ ବିଭାଗ ମଧ୍ୟ ଛାଡ଼ୁଛନ୍ତି ବୋଲି ଉଭୟ ନିଜ ସାକ୍ଷାତକାରରେ ସ୍ପଷ୍ଟ କରିଛନ୍ତି । ଏହା ପୂର୍ବରୁ ମଧ୍ୟ ଟ୍ରମ୍ପ୍ ତାଙ୍କ ପ୍ରଶାସନର କିଛି ଅଧିକାରୀଙ୍କୁ ଏ ବାବଦରେ ଜଣାଇଥିଲେ । କିନ୍ତୁ ରିପୋର୍ଟକୁ ମସ୍କ ଖଣ୍ଡନ କରିଥିଲେ । ଏହାକୁ ସେ ବିଭ୍ରାନ୍ତିକର ଖବର ଦର୍ଶାଇଥିଲେ । କୁହାଯାଉଛି ଯେ ମସ୍କଙ୍କୁ ଜଣେ ସ୍ୱତନ୍ତ୍ର କର୍ମଚାରୀ ଭାବେ ଟ୍ରମ୍ପ ନିଯୁକ୍ତ କରିଥିଲେ । ତାଙ୍କ କାର୍ଯ୍ୟକାଳ ୧୩୦ ଦିନ ପାଇଁ ଥିଲା । ଏବେ ସେ ସମୟ ପାଖେଇ ଆସୁଛି । ତାଙ୍କ କାର୍ଯ୍ୟକାଳ ସମ୍ଭବତଃ ମେ ମାସରେ ଶେଷ ହେବା ନେଇ ଆଶା କରାଯାଉଛି ।
ଉପରାଷ୍ଟ୍ରପତି ଭାନ୍ସ ଏକ ସାକ୍ଷାତକାରରେ କହିଛନ୍ତି, ହ୍ୱାଇଟ୍ ହାଉସ୍ ଛାଡ଼ିବା ପରେ ମସ୍କ ଟ୍ରମ୍ପ୍ ପ୍ରଶାସନର ଜଣେ ବନ୍ଧୁ ଓ ଉପଦେଷ୍ଟା ହୋଇ ରହିବେ । ତେବେ ନିର୍ଦ୍ଦିଷ୍ଟ କେଉଁ ତାରିଖ ସୁଦ୍ଧା ଟ୍ରମ୍ପ୍ ପ୍ରଶାସନକୁ ମସ୍କ ଅଲ୍ବିଦା କହିବେ, ସେ ନେଇ କିଛି କୁହାଯାଇ ନାହିଁ । ତେବେ ମସ୍କଙ୍କୁ ନେଇ ଜନତାଙ୍କ ବିରୋଧ ବଢ଼ୁଥିବା ସତ୍ତେ୍ୱ ଟ୍ରମ୍ପ୍ ତାଙ୍କୁ ଦୃଢ଼ ସମର୍ଥନ କରୁଛନ୍ତି । ତାଙ୍କର ପ୍ରତ୍ୟେକ କାର୍ଯ୍ୟ ଦେଶ ହିତ ଲାଗି ଉଦ୍ଦିଷ୍ଟ ବୋଲି ସେ ଦାବି କରୁଛନ୍ତି ।
ଚଳିତବର୍ଷ ଜାନୁଆରୀ ୨୦ରେ ଆମେରିକାର ରାଷ୍ଟ୍ରପତି ଭାବେ ଶପଥ ନେବା ପରେ ଟ୍ରମ୍ପ୍ ଟେସ୍ଲା ସିଇଓ ମସ୍କଙ୍କୁ ନିଜ ପ୍ରଶାସନରେ ସାମିଲ କରିଥିଲେ । ନୂଆ ସରକାରୀ ଦକ୍ଷତା ବିଭାଗ (ଡିଓଜିଇ)ରେ ତାଙ୍କୁ ନିଯୁକ୍ତ କରି ଅଖଣ୍ଡ କ୍ଷମତା ପ୍ରଦାନ କରିଥିଲେ । ମସ୍କଙ୍କ ନେତୃତ୍ୱାଧୀନ ଡିଓଜିଇ ସରକାରୀ ଖର୍ଚ୍ଚ କାଟ୍ ଉପରେ ଫୋକସ୍ କରିଥିଲା । ଏହାଯୋଗୁ ପ୍ରତିରକ୍ଷା, ଶିକ୍ଷା ଓ ସ୍ୱାସ୍ଥ୍ୟ ଆଦି ବିଭିନ୍ନ ବିଭାଗରେ ଗଣଛଟେଇ ଅଭିଯାନ ଚାଲିଥିଲା । ତାଙ୍କର ଏଭଳି କାର୍ଯ୍ୟକୁ ନେଇ ଆମେରିକାବାସୀ ଅତିଷ୍ଠ ହୋଇପଡ଼ିଛନ୍ତି । ଏମିତି କି ତାଙ୍କ ନୀତିକୁ ବିରୋଧ କରି ଆମେରିକା ସମେତ କିଛି ୟୁରୋପୀୟ ଦେଶରେ ଲୋକମାନେ ଟେସ୍ଲା କାର୍ ପୋଡ଼ିଛନ୍ତି । ଏବେ ହ୍ୱାଇଟ୍ ହାଉସ୍ରେ ତାଙ୍କ ଦିନ ସରିଆସୁଥିବାରୁ ଜନତା ଆଶ୍ୱସ୍ତ ହୋଇଛନ୍ତି । ନିକଟରେ ଆମେରିକାରେ ଏକ ଜନମତ ସର୍ଭେ ହୋଇଥିଲା । ଏଥିରେ ସର୍ବାଧିକ ଲୋକ ମସ୍କଙ୍କ ବିରୋଧରେ ମତ ଦେଇଥିଲେ ।
