ଭୁବନେଶ୍ଵର, ୧୪/୦୩ : ଭଦ୍ରକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଗର୍ଜିଲେ ଇସି ସଦସ୍ୟା। ସଭାନେତ୍ରୀ ଏବଂ ସମ୍ପାଦିକାଙ୍କ ପୁନଃଗଠନ ପ୍ରକ୍ରିୟା ପାଇଁ ରାଜ୍ୟ ସରକାର ଦେଇଥିବା ନିର୍ଦ୍ଦେଶକୁ ଭଦ୍ରକ ସ୍ଵୟଂସହାୟିକା ଗୋଷ୍ଠୀ ମହାମଞ୍ଚର ବିରୋଧ। ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କଲେ ୩ ହଜାରରୁ ଉର୍ଦ୍ଧ୍ଵ ଇସି ସଦସ୍ୟା।
ସୂଚନାନୁଯାୟୀ, ଶୁକ୍ରବାର ଭଦ୍ରକ ଜିଲ୍ଲାର ହଜାର ହଜାର ସଂଖ୍ୟାରେ ଇସି ସଦସ୍ୟା ଏକତ୍ରିତ ହୋଇ ଏକ ବିରାଟ ଶୋଭାଯାତ୍ରାରେ ବାହାରି ସହର ପରିକ୍ରମା କରିଥିଲେ। ଏହାପରେ ଜିଲ୍ଲାପାଳଙ୍କ ଅଫିସ ସମ୍ମୁଖରେ ପହଞ୍ଚି ଜିଲ୍ଲାପାଳଙ୍କ ସହ ଆଲୋଚନା କରିବାକୁ ଦାବି କରିଥିଲେ। ତେବେ ଜିଲ୍ଲାପାଳ ସେମାନଙ୍କୁ ନଭେଟିବାରୁ ଇସି ସଦସ୍ୟାମାନେ ବ୍ୟାରିକେଡ ଚଢି କାର୍ଯ୍ୟାଳୟ ଭିତରୁ ପଶିବାକୁ ଚେଷ୍ଟା କରିଥିଲେ। ଏପରିକି ମହିଳାମାନେ ଭଦ୍ରକ ସହରର ମୁଖ୍ୟ ରାସ୍ତା ଦୀର୍ଘ ସମୟ ପର୍ଯ୍ୟନ୍ତ ବନ୍ଦ କରି ଦେଇଥିଲେ। ପରେ ପୋଲିସ ବୁଝାସୁଝା କରିବାରୁ ସଦସ୍ୟାମାନେ ଜିଲ୍ଲାପାଳଙ୍କୁ ଭେଟି ୧୦ ଦଫା ଦାବିପତ୍ର ପ୍ରଦାନ କରିଛନ୍ତି।
ସଙ୍ଘର ସଭାନେତ୍ରୀ ଓ ସମ୍ପାଦିକାଙ୍କୁ ପୁନଃଗଠନ ନକରି ବାଇଲ ଓ ଗାଇଡଲାଇନ୍ ଅନୁଯାୟୀ ନିର୍ବାଚିତ କରି ପ୍ରତିନିଧି ବାଛିବା, ପୌରାଞ୍ଚଳ ଓ ବିଜ୍ଞାପିତ ଅଞ୍ଚଳରେ ସିଏଲଏଫ ଗଠନ ଭଳି ସଙ୍ଘ ପକ୍ଷରୁ ୧୦ ଦଫା ଦାବିପତ୍ର ପ୍ରଦାନ କରାଯାଇଛି। ରାଜ୍ୟ ସରକାର ଏଥିପ୍ରତି ଧ୍ୟାନ ନଦେଲେ ଆନ୍ଦୋଳନକୁ ଆହୁରି ବ୍ୟାପକ କରାଯିବ ବୋଲି ମହାମଞ୍ଚ ପକ୍ଷରୁ ଚେତାବନୀ ଦିଆଯାଇଛି।
ଏହି ଖବରଟିକୁ ପଢନ୍ତୁ-ଭିଜିଲାନ୍ସ ଜାଲରେ ଛନ୍ଦି ହେଲେ ସବ୍ରେଜିଷ୍ଟର୍, ୨ଟି ସ୍ଥାନରେ ଏକକାଳୀନ ଚଢାଉ
