ଭୁବନେଶ୍ୱର,୨୭/୦୯: ଓଡ଼ିଶାର ବିଭିନ୍ନ  ପର୍ଯ୍ୟଟନସ୍ଥଳୀକୁ କିଭଳି ଅଧିକରୁ ଅଧିକ ପର୍ଯ୍ୟଟକ  ଆସିପାରିବେ ସେ ନେଇ ଉଦ୍ୟମ ଜାରି ରଖିଛି ପୂର୍ବତଟ  ରେଳପଥ । ଗୋଟିଏ ପରେ ଗୋଟିଏ ନୂଆ ଟ୍ରେନ୍‌ ଚଲାଇବା  ସହ ବିଭିନ୍ନ ପ୍ରକାର ସୁବିଧା ସୁଯୋଗ ଖଞ୍ଜି ଦେଇଛି । ତେବେ  ପୂର୍ବତଟ ରେଳପଥ ପରିସୀମାରେ ଓଡ଼ିଶା ସହ ଆନ୍ଧ୍ରପ୍ରଦେଶ  ଆସୁଥିବାରୁ ଏହାର କିଛି ପର୍ଯ୍ୟଟନସ୍ଥଳୀକୁ ସାମିଲ  କରିଛି । ପର୍ଯ୍ୟଟନସ୍ଥଳୀ ଥିବା ବିଭିନ୍ନ ପ୍ରମୁଖ ସହରଗୁଡ଼ିକୁ  ସଂଯୋଗ କରିବା ସହିତ ସାଂସ୍କୃତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ  ସ୍ଥାନଗୁଡିକରେ ମଧ୍ୟ ରେଳ ସେବା ପହଞ୍ଚି  ପାରିଛି । ଏହା ସହିତ ସ୍ୱତନ୍ତ୍ର ପର୍ଯ୍ୟଟନ  ଟ୍ରେନ୍‌ ଚଳାଚଳର ବ୍ୟବସ୍ଥା କରାଯିବା  ସହ ଭିଷ୍ଟାଡୋମ୍‌ (ବିଳାସପୂର୍ଣ୍ଣ)  କୋଚ୍‌ର ବ୍ୟବସ୍ଥା କରାଯାଇଛି ।  

ପୂର୍ବତଟ ରେଳପଥ ଯୋଡ଼ୁଥିବା  ସ୍ଥାନଗୁଡିକ ମଧ୍ୟରେ ଏସିଆର ସବୁଠାରୁ ବଡ଼ ହ୍ରଦ ଚିଲିକା  ମୁଖ୍ୟ ଆକର୍ଷଣ ସାଜିଛି । ଏହି ପର୍ଯ୍ୟଟନସ୍ଥଳୀକୁ ବହୁ ଜାତୀୟ  ଓ ଆନ୍ତର୍ଜାତିକ ପର୍ଯ୍ୟଟକ ଭ୍ରମଣ ପାଇଁ ଆସୁଛନ୍ତି । ବାଲୁଗାଁ  ଓ ଚିଲିକା ଷ୍ଟେସନ ମାଧ୍ୟମରେ ଏହାକୁ ଅନ୍ୟ ସ୍ଥାନଗୁଡିକ  ସହ ସଂଯୋଗ କରାଯାଇଛି । ସେହିପରି ପୁରୀର ସ୍ୱର୍ଣ୍ଣିମ  ବେଳାଭୂମି ଓ କୋଣାର୍କ ସୂର୍ଯ୍ୟ ମନ୍ଦିରକୁ ବର୍ଷ ଯାକ ପର୍ଯ୍ୟଟକ ଆସିବା ସହିତ ରଥଯାତ୍ରା ସମୟରେ ବିଶେଷ ଟ୍ରେନ ସେବା  ଅଧିକ ପର୍ଯ୍ୟଟକଙ୍କୁ ଟାଣିବାରେ ସକ୍ଷମ ହୋଇଛି । ଗଞ୍ଜାମ  ଜିଲ୍ଲାର ଗୋପାଳପୁର ବେଳାଭୂମି ଏବଂ ନୀଳ ସମୁଦ୍ର  ମଧ୍ୟ ପର୍ଯ୍ୟଟକଙ୍କୁ ଆକର୍ଷିତ କରେ ଯାହାକୁ  ପୂର୍ବତଟ ରେଳପଥ ରେଳ ମାର୍ଗରେ  ସଂଯୋଗ କରିପାରିଛି । 

ଜଗତସିଂହପୁର  ଜିଲ୍ଲାର ସିଆଳି ବେଳାଭୂମି ଏକ ସଫା  ସମୁଦ୍ରତଟ ହେବା ସହିତ ଏକ ସୁନ୍ଦର  ଶାନ୍ତ ପର୍ଯ୍ୟଟନସ୍ଥଳରେ ପରିଣତ ହୋଇଥିବାରୁ ଏହି ସ୍ଥାନକୁ ମଧ୍ୟ ରେଳ ଯୋଗାଯୋଗ ହେବା  ଦ୍ୱାରା ପର୍ଯ୍ୟଟନକୁ ପ୍ରୋତ୍ସାହିତ କରୁଛି । ଅନୁରୂପ ଭାବେ  ଭିତରକନିକା ଜାତୀୟ ଉଦ୍ୟାନର ଘଡ଼ିଆଳ କୁମ୍ଭୀରଙ୍କ ପାଇଁ  ଭଦ୍ରକ ଏବଂ କଟକରୁ ପର୍ଯ୍ୟଟକମାନେ ଏଠାକୁ ଆସୁଛନ୍ତି । କେନ୍ଦୁଝର ଜିଲ୍ଲାର ଖଣ୍ଡାଧାର ଜଳପ୍ରପାତ, ଘଟଗାଁ, ଗୋନାସିକା ଓ ସୀତାବିଞ୍ଜିକୁ ମଧ୍ୟ ପୂର୍ବତଟ ରେଳପଥ  ସଂଯୋଗ କରିଛି । ଯାଜପୁରର ବିରଜା ମନ୍ଦିର ଓ ଭଦ୍ରକର ଆରଡିରେ ଥିବା ଆଖଣ୍ଡଳମଣି ଶୈବପୀଠ ସହିତ ଦୀର୍ଘ  ସମୁଦ୍ରତଟ ଓ ଧାମରା ବନ୍ଦରକୁ ରେଳ ସେବା ଯୋଗାଇ  ଦିଆଯାଇଛି । ଢେଙ୍କାନାଳର କପିଳାସ ମନ୍ଦିର, ଅନୁଗୁଳ ଜିଲ୍ଲାର  ସାତକୋଶିଆ ଗଣ୍ଡ ଓ ଦେବଗଡ଼ର ପାହାଡର ସୌନ୍ଦର୍ଯ୍ୟ  ଉପଭୋଗ କରିବାକୁ ରେଳ ଚଳାଚଳର ସୁବିଧା ରହିଛି ।  

ପଶ୍ଚିମ ଓଡିଶାରେ ହୀରାକୁଦ ବନ୍ଧ, ହରିଶଙ୍କର ଓ  ନୃସିଂହନାଥ ମନ୍ଦିର, ସମ୍ୱଲପୁର ଓ ସୋନପୁରର ମନୋରମ  ଦୃଶ୍ୟ ସହିତ ଅନେକ ଆକର୍ଷଣୀୟ ସ୍ଥାନ ଅଛି । ସେହି  ସ୍ଥାନଗୁଡିକୁ ଯିବା ପାଇଁ ପୂର୍ବତଟ ରେଳପଥ ପକ୍ଷରୁ ସମ୍ୱଲପୁର,  ବଲାଙ୍ଗିର, କଳାହାଣ୍ଡି ଓ ଅନ୍ୟାନ୍ୟ ଜିଲ୍ଲାଗୁଡିକରୁ ରେଳ ସୁବିଧା  ରହିଛି । ଏହା ସହିତ ଉତ୍ତର ଆନ୍ଧ୍ରପ୍ରଦେଶର ବିଶାଖାପାଟଣା,  ସୀମାଚଳମ ଓ ବିଜୟନଗରମର ବିଭିନ୍ନ ସ୍ଥାନକୁ ମଧ୍ୟ  ରେଳଯାତ୍ରାର ସୁବିଧା ରହିଛି । କୋରାପୁଟ-ରାୟଗଡ଼ା ଏବଂ  କୋଟ୍ଟାଭାଲାସା-କିରନ୍ଦୁଲ ମାର୍ଗରେ ଥିବା ଘାଟ ସେକ୍ସନରେ  ବହୁତ ସୁନ୍ଦର ଜଳପ୍ରପାତ ଏବଂ ପ୍ରାକୃତିକ ଦୃଶ୍ୟ ରହିଛି ।