ମୁମ୍ବାଇ,୨୬/୦୯: ଆସନ୍ତାକାଲି ରିଲିଜ ହେବାକୁ ଯାଉଛି ଜୁନିଅର ଏନଟିଆରଙ୍କ ଫିଲ୍ମ 'ଦେବରା ପାର୍ଟ- ୧' । ତେବେ ଏହାର ଟ୍ରେଲର ରିଲିଜ୍ ହେବା ପରଠାରୁ ପ୍ରଶଂସକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିବା ବେଳେ ରିଲିଜ ପୂର୍ବରୁ ଫିଲ୍ମ ଆଡଭାନ୍ସ ବୁକିଂ ରେକର୍ଡ କଲାଣି । ପ୍ରଥମ ଦିନର ଫିଲ୍ମ ଦେଖିବା ପାଇଁ ଜୋରଦାର ଟିକେଟ ବିକ୍ରି ହେଉଥିବା ବେଳେ ଫିଲ୍ମ ଆଡଭାନ୍ସ ବୁକିଂରେ ବମ୍ପର କଲେକ୍ସନ କରିସାରିଲାଣି।

ତେବେ ସାକନିଲ୍କର ରିପୋର୍ଟ ଅନୁଯାୟୀ, ଜୁନିଅର ଏନଟିଆରର ଏହି ଚଳଚ୍ଚିତ୍ରର ପ୍ରଥମ ଦିନ ପାଇଁ ସାରା ଦେଶରେ ୭ ଲକ୍ଷ ୩୪ ହଜାର ୭୬୧ ଟିକେଟ୍ ପୂର୍ବରୁ ବିକ୍ରି ହୋଇସାରିଛି । ଯେଉଁଥିରେ ଫିଲ୍ମ ରିଲିଜ୍ ପୂର୍ବରୁ ୧୮.୭୮ କୋଟି ଟଙ୍କା ରୋଜଗାର କରିସାରିଛି ଏବଂ ପ୍ରାୟ ୨୯.୧୦ କୋଟି ଟଙ୍କା ଆୟ କରିଛି । ଏଥିରେ ତେଲୁଗୁ ଭାଷାରେ ୭ ଲକ୍ଷ ୧୯ ହଜାର ୬୦୮ ଟିକେଟ୍ ର ସର୍ବାଧିକ ଆଡଭାନ୍ସ ବୁକିଂ କରାଯାଇଛି । ଏପର୍ଯ୍ୟନ୍ତ ଫିଲ୍ମର ୧୩ ହଜାର ୩ ଶହ ୨୪ ଟିକେଟ୍ ହିନ୍ଦୀରେ ପୂର୍ବରୁ ବିକ୍ରି ହୋଇସାରିଛି । କନ୍ନଡରେ 'ଦେବରା ପାର୍ଟ- ୧' ପାଇଁ ଏପର୍ଯ୍ୟନ୍ତ ୧୦୦ ଟିକେଟ୍ ଆଡଭାନ୍ସ ବୁକିଂ ହୋଇଥିବା ବେଳେ ୧୬୭୮ ଟିକେଟ୍ ତାମିଲରେ ବୁକ୍ ହୋଇଛି । ସେହିପରି ମାଲାୟାଲମରେ ପ୍ରଥମ ଦିନ ପାଇଁ ଫିଲ୍ମ ୫୬ଟି ଟିକେଟ୍ ବିକ୍ରି କରିସାରିଛି । ଏହିପରି ବୁଧବାର ସକାଳ ପର୍ଯ୍ୟନ୍ତ 'ଦେବରା ପାର୍ଟ- ୧' ର ବିଶ୍ୱରେ ମୋଟ ଆଡଭାନ୍ସ ବୁକିଂରେ ୫୦ କୋଟି ଆୟ କରିସାରିଲାଣି । ତେବେ ଫିଲ୍ମ ରିଲିଜ୍ ହେବାକୁ ଆଉ ଗୋଟିଏ ଦିନ ବାକି ଥିବା ବେଳେ ଫିଲ୍ମର ଟିକେଟରେ ବୃଦ୍ଧି ଦେଖିବାକୁ ମିଳିଛି । ବର୍ତ୍ତମାନ୭ ଲକ୍ଷରୁ ଅଧିକ ଟିକେଟ ବିକ୍ରି ଦେଖି ଅନୁମାନ କରାଯାଉଛି ଯେ ଆଜି ଏବଂ ଆସନ୍ତାକାଲି ଟିକେଟ୍ ବିକ୍ରିରେ ବମ୍ପର ବୃଦ୍ଧି ହେବାର ଆଶଙ୍କା ରହିଛି । ଯାହା ପରେ ଏହି ଚଳଚ୍ଚିତ୍ର ରିଲିଜର ପ୍ରଥମ ଦିନରେ ୧୦୦ କୋଟି ଆୟ କରି ରେକର୍ଡ ଭାଙ୍ଗିବ ବୋଲି ଆଶା କରାଯାଉଛି ।