ନୂଆଦିଲ୍ଲୀ: ଦୀର୍ଘ ୨୪ ବର୍ଷ ପରେ ବିଜେପି ଦିଲ୍ଲୀରେ ସରକାର ଗଢିବାକୁ ଯାଉଛି । ଦିଲ୍ଲୀ ବିଧାନସଭା ନିର୍ବାଚନରେ ବିଜେପି ୪୮ ଆସନ ଜିତି ଏକକ ସଂଖ୍ୟା ଗରିଷ୍ଠତା ହାସଲ କରିଛି । ଆପ୍କୁ ମାତ ଦେଇ ବିଜେପି ବିଜୟୀ ହୋଇଛି ସତ କିନ୍ତୁ ମୁଖ୍ୟମନ୍ତ୍ରୀ କିଏ ହେବେ ତାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ମୁଖ୍ୟମନ୍ତ୍ରୀ ନିଷ୍ପତ୍ତି କେନ୍ଦ୍ରୀୟ ନେତୃତ୍ୱ ନେବେ ବୋଲି କହିଛନ୍ତି ଦଳର ବରିଷ୍ଠ ନେତା । ଅନ୍ୟପଟେ ଦିଲ୍ଲୀ ରାଜନୀତିକୁ ଦେଖିବାକୁ ଗଲେ ବିଜେପିରେ ସିଏମ୍ ପାଇଁ ଅନେକ ଚେହେରା ଅଛନ୍ତି । ସବୁ ବର୍ଗଙ୍ଗ ମଧ୍ୟରେ ସନ୍ତୁଳନ ବଜାୟ ରଖିବା ପାଇଁ ବିଜେପି ଅନେକ ରାଜ୍ୟରେ ଉପମୁଖ୍ୟମନ୍ତ୍ରୀ ବି ଦେଇଛି । ଦିଲ୍ଲୀରେ ମଧ୍ୟ ବିଜେପି ସମାନ କାର୍ଡ ଖେଳିପାରେ । ମୁଖ୍ୟମନ୍ତ୍ରୀ ରେସ୍ରେ ସମ୍ଭାବ୍ୟ ନାଁ ମଧ୍ୟରେ ପରବେଶ ବର୍ମା, ସତୀଶ ଉପାଧ୍ୟାୟ, ଆଶୀଷ ସୁଦ, ଜିତେନ୍ଦ୍ର ମହାଜନ ଏବଂ ବିଜେନ୍ଦ୍ର ଗୁପ୍ତା ସାମିଲ ।
ପରବେଶ ବର୍ମା: ଦିଲ୍ଲୀରେ ମୁଖ୍ୟମନ୍ତ୍ରୀ ଦୌଡ଼ରେ ସବୁଠୁ ଆଗରେ ଅଛନ୍ତି ପରବେଶ ବର୍ମା । ପୂର୍ବତନ ସାଂସଦ ନୂଆଦିଲ୍ଲୀ ବିଧାନସଭା ଆସନରେ ଆପ୍ ମୁଖ୍ୟ ଅରବିନ୍ଦ କେଜ୍ରିୱାଲଙ୍କୁ ହରାଇବା ପରେ ଜଣେ ଟାଣୁଆ ନେତାର ଆଖ୍ୟା ହାସଲ କରିଛନ୍ତି । ଏହାସହ ସେ ଜାଟ୍ ସମୁଦାୟରୁ ଆସୁଛନ୍ତି । ଜାଟ୍ଙ୍କୁ ସିଏମ୍ କରିବା ଦ୍ୱାରା ଗ୍ରାମୀଣ ଦିଲ୍ଲୀ, ପଶ୍ଚିମ ୟୁପି, ହରିୟାଣା ଏବଂ ରାଜସ୍ଥାନର ଜାଟ୍ ଭୋଟରଙ୍କ ଏକ ସନ୍ଦେଶ ପହଞ୍ଚିବ । ବିଜୟ ପରେ ସେ କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହଙ୍କୁ ଯାଇ ଭେଟିଥିଲେ ।
ଆଶୀଷ ସୁଦ: ଦିଲ୍ଲୀ ମୁଖ୍ୟମନ୍ତ୍ରୀ ଗୌଡ଼ରେ ବିଜେପି ନେତା ଆଶୀଷ ସୁଦଙ୍କ ନାଁ ବି ରହିଛି । ସେ ବିଜେପିର ପଞ୍ଜାବୀ ଚେହେରା । ପୂର୍ବରୁ ସେ କର୍ପୋରେଟର ରହିସାରିଛନ୍ତି । ଦିଲ୍ଲୀ ବିଜେପିର ମହାସଚିବ ବି ରହିସାରିଛନ୍ତି । ଏବେ ସେ ଗୋଆର ପ୍ରଭାରୀ ଏବଂ ଜାମ୍ମୁ କାଶ୍ମୀର ସହ ପ୍ରଭାରୀ ଅଛନ୍ତି ।
ଜିତେନ୍ଦ୍ର ମହାଜନ: ରୋହତାସ ନଗର ବିଧାନସଭା ଆସନରୁ ବିଜେପି ପ୍ରାର୍ଥୀ ଜିତେନ୍ଦ୍ର ମହାଜନ ବିଜୟୀ ହୋଇଛନ୍ତି । ୨୦୨୦ରେ ବିଜେପି ଯେଉଁ କିଛି ଆସନ ଜିତିଥିଲା ସେଥିରେ ସବୁଠୁ ଅଧିକ ଭୋଟ୍ ବ୍ୟବଧାନରେ ଜିତିଥିଲେ ଜିତେନ୍ଦ୍ର ମହାଜନ । ଏହାସହ ବିଧାନସଭାରେ ବି ଦଳ ପାଇଁ ଆକ୍ଟିଭ ଭୂମିକା ଗ୍ରହଣ କରୁଥିଲେ । ସେ ବୈଶ୍ୟ ସମାଜରୁ ଆସନ୍ତି ଏବଂ ଆର୍ଏସ୍ଏସ୍ ସହ ବି ଘନିଷ୍ଠତା ରହିଛି ।
ସତୀଶ ଉପାଧ୍ୟାୟ: ଦିଲ୍ଲୀ ମୁଖ୍ୟମନ୍ତ୍ରୀ ଦୌଡ଼ରେ ଥିବା ନେତା ହେଉଛନ୍ତି ସତୀଶ ଉପାଧ୍ୟାୟ । ସେ ଦିଲ୍ଲୀ ବିଜେପିର ଜଣେ ପ୍ରମୁଖ ବ୍ରାହ୍ମଣ ଚେହେରା । ପୂର୍ବରୁ ସେ ବିଜେପି ପ୍ରଦେଶ ଅଧ୍ୟକ୍ଷ ମଧ୍ୟ ରହିସାରିଛନ୍ତି । ଦିଲ୍ଲୀ ଯୁବ ମୋର୍ଚ୍ଚା ଅଧ୍ୟକ୍ଷ ବି ଥିଲେ । ଏହି କାରଣରୁ ତାଙ୍କ ପାଖରେ ସଂଗଠନ ଏବଂ ପ୍ରଶାସନର ଅଭିଜ୍ଞତା ରହିଛି । ମଧ୍ୟପ୍ରଦେଶ ନିର୍ବାଚନ ବେଳେ ସେ ସହପ୍ରଭାରୀ ଥିଲେ । ଏହାସହ ଆର୍ଏସ୍ଏସ୍ର ବି ସେ ନିକଟତର ।
ବିଜେନ୍ଦ୍ର ଗୁପ୍ତା: ଦିଲ୍ଲୀ ମୁଖ୍ୟମନ୍ତ୍ରୀ ଦୌଡ଼ରେ ବିଜେନ୍ଦ୍ର ଗୁପ୍ତାଙ୍କ ନାଁ ମଧ୍ୟ ଚର୍ଚ୍ଚାରେ ଅଛି । ଦିଲ୍ଲୀ ବିଧାନସଭାରେ ବିରୋଧୀ ଦଳ ନେତା ଥିଲେ ବିଜେନ୍ଦ୍ର ଗୁପ୍ତା । ସେ ବିଜେପି ଅଧ୍ୟକ୍ଷ ବି ରହିସାରିଛନ୍ତି । ବିଜେପିର ସେ ଜଣେ ଟାଣୁଆ ଚେହେରା ଏବଂ ଆପ୍ ଲହର ସତ୍ତ୍ୱେ ବି ପୂର୍ବ ନିର୍ବାଚନରେ ସେ ବିଧାନସଭା ଜିତି ସାରିଛନ୍ତି ।
