ବରଗଡ଼, ୨୮/୦୫ : ଛାତ ଉପରେ ଶୋଇଥିଲେ। ସକାଳୁ ଉଦ୍ଧାର ହେଲା ମୃତଦେହ। ବରଗଡ଼ ଜିଲ୍ଲା ଭେଡେନ ଥାନା ସହରାଟିକ୍ରାରେ ଏଭଳି ଘଟଣା ଘଟିଛି। ମୃତ ବ୍ୟକ୍ତି ଜଣଙ୍କ ହେଉଛନ୍ତି ସହରାଟିକ୍ରା ଗାଁର ମଗନିଆ ସେଠ। ତାଙ୍କୁ କେହି ହତ୍ୟା କରିଥିବା ପରିବାର ଲୋକ ଅଭିଯୋଗ କରିଛନ୍ତି। 

ସୂଚନାନୁଯାୟୀ, ସହରାଟିକ୍ରା ଗାଁର ମଗନିଆ ସେଠ ରାତିରେ ଖାଇସାରି ଘର ଛାତ ଉପରେ ଶୋଇଥିଲେ। ଆଜି ସକାଳୁ ଶୋଇଥିବା ଅବସ୍ଥାରେ ତାଙ୍କର ମୃତଦେହ ଉଦ୍ଧାର କରାଯାଇଛି। ତାଙ୍କ ବେକରେ କଳା ଦାଗ ସହ ଆଣ୍ଠୁରେ କ୍ଷତ ଚିହ୍ନ ରହିଛି। ସାଇଣ୍ଟିଫିକ୍ ଟିମ୍ ଓ ସନ୍ଧାନୀ କୁକୁର ସାହାଯ୍ୟରେ ଭେଡେନ ପୋଲିସ ପହଞ୍ଚି ତଦନ୍ତ ଜାରି ରଖିଛି। ମଗନିଆ ସହରାଟିକ୍ରାରେ ସିମେଣ୍ଟ ଦୋକାନ ଦେଇଥିଲେ। ତେବେ କିଏ ଏବଂ କାହିଁକି ତାଙ୍କୁ ହତ୍ୟା କରିଛି ତାହା ଜଣାପଡ଼ି ନାହିଁ। ତଦନ୍ତ ପରେ ସବୁକିଛି ସ୍ପଷ୍ଟ ହେବ ବୋଲି କୁହାଯାଉଛି।