କଟକ,୦୩/୦୩: ପବିତ୍ର ରମ୍ଜାନ ମାସ ଆରମ୍ଭ ହୋଇ ସାରିଥିଲାବେଳେ ଏବେଠୁ ଜମି ଆସିଲାଣି ରମ୍ଜାନ୍ ବଜାର । କାରଣ ପ୍ରଥମ ଦିନରେ ଲୋକମାନେ ଘରକୁ ରମ୍ଜାନ୍ ପାଇଁ ସ୍ୱତନ୍ତ୍ର ଖଜୁରୀ, ସିମେଇ ଆଦି ଖାଦ୍ୟ ସାମଗ୍ରୀ କିଣାକିଣି କରି ନେଉଛନ୍ତି । ଏହାକୁ ଦୃଷ୍ଟିରେ ରଖି ସହରର ପ୍ରମୁଖ ଛକମାନଙ୍କରେ ରମ୍ଜାନ୍ ପାଇଁ ପସରା ମେଲାଇଲେଣି ବହୁ ବ୍ୟବସାୟୀ । ବ୍ୟବସାୟୀମାନେ ମଧ୍ୟ ଲୋକଙ୍କ ଚାହିଦାକୁ ଦୃଷ୍ଟିରେ ରଖି ଦେଶବିଦେଶରୁ ଆସିଥିବା ୨୦ରୁ ଅଧିକ ପ୍ରକାରର ଖଜୁରୀ ସହିତ କୋଲକାତା ଓ ଦିଲ୍ଲୀର ପ୍ରସିଦ୍ଧ ଘିଅ ଲଚ୍ଛା ଆଦି ସ୍ୱତନ୍ତ୍ର ଖାଦ୍ୟ ସାମଗ୍ରୀ ବିକ୍ରି କରୁଛନ୍ତି । ଏହାବାଦ୍ ଗୋଟିଏ ଦୋକାନରେ ହିଁ କାଜୁ କିସ୍ମିସ୍ରୁ ଆରମ୍ଭ କରି ଫଳ ଆଦି ରମ୍ଜାନ୍ରେ ଅଧିକ ବ୍ୟବହୃତ ଖାଦ୍ୟ ସାମଗ୍ରୀ ରଖିଛନ୍ତି ।
ମୁସଲ୍ମାନ୍ ସମ୍ପ୍ରଦାୟରେ ରମ୍ଜାନ୍ ମାସ ହେଉଛି ମୁଖ୍ୟ ଧାର୍ମିକ ମାସ । ଏହି ମାସରେ ୩୦ଦିନ ଯାକ କାଷ୍ଠା ଉପବାସ କରିଥାନ୍ତି ମୁସ୍ଲିମ୍ ଲୋକମାନେ । ସକାଳେ ସୂର୍ଯ୍ୟଦୋୟ ପୂର୍ବରୁ ଉପବାସ କରିବା ସହିତ ସଂଧ୍ୟାରେ ନିର୍ଦ୍ଦିଷ୍ଟ ସମୟରେ ଉପବାସ ଭାଙ୍ଗିଥାନ୍ତି । ସଂଧ୍ୟାରେ ଉପବାସ ଭାଙ୍ଗିବା ତଥା ରୋଜା ଖୋଲିବା ସମୟରେ ବିଭିନ୍ନ ପ୍ରକାରର ଖାଦ୍ୟ ଖାଇବାକୁ ପସନ୍ଦ କରିଥାନ୍ତି । ଏଥିପାଇଁ ରମ୍ଜାନ୍ ଆସିବା ମାତ୍ରେ କଟକ ସହରର ବିଭିନ୍ନ ସ୍ଥାନରେ ସ୍ୱତନ୍ତ୍ର ମାସିକିଆ ଦୋକାନ ଖୋଲିଥାଏ । ଏ ବର୍ଷ ମଧ୍ୟ କିଛି ନୂଆ ଓ ଅଧିକ ଭେରାଇଟି ସହ ଦୋକାନ ଖୋଲିଛି । ଲୋକଙ୍କ ଚାହିଦାକୁ ଦୃଷ୍ଟିରେ ରଖି ବ୍ୟବସାୟୀମାନେ ସାଉଦି ଆରବ, ଇରାକ୍, ଇରାନ୍, କତାର୍, ଦୁବାଇ ଓ ତୁନିସିଆ ଭଳି ବିଭିନ୍ନ ଦେଶରୁ ୨୦ରୁ ଅଧିକ ପ୍ରକାରର ଖଜୁରୀ ଆଣିଛନ୍ତି । ଯାହାର ମୂଲ୍ୟ ଅଧକିଲୋକୁ ୨ ଶହରୁ ଆରମ୍ଭ କରି ସାଢେ ୪ ହଜାର ଟଙ୍କା ପର୍ଯ୍ୟନ୍ତ ରହିଛି ।
ସେହିଭଳି ମିଠା ଖାଉଥିବା ଲୋକଙ୍କ ପସନ୍ଦ ଲଚ୍ଛାର ଅନେକ ଭେରାଇଟି ଦେଖିବାକୁ ମିଳିଛି । ଯଦିଓ କିଛି ନାମୀଦାମୀ ବ୍ରାଣ୍ଡ୍ର ଲଚ୍ଛା ରହିଛି କିନ୍ତୁ ସେଥିରେ କୋଲକାତା ଓ ଦିଲ୍ଲୀରୁ ଆସିଛି ଘିଅର ସ୍ୱତନ୍ତ୍ର ଲଚ୍ଛା । ଯାହାର ମୂଲ୍ୟ ମଧ୍ୟ କିଲୋପିଛା ୩ ଶହରୁ ନେଇ ୬ଶହ ଟଙ୍କା ପର୍ଯ୍ୟନ୍ତ ରହିଛି । ସେହିଭଳି ଏଥର ରମ୍ଜାମ୍ ବଜାରରେ ନାଲି ଭଜା ସିମେଇ ମଧ୍ୟ ବଜାରକୁ ଆସିଛି । ରମ୍ଜାନ୍ ମାସରେ ହିଁ କଟକର ବକ୍ସି ବଜାର, ଦରଘା ବଜାର, ଓଡିଆ ବଜାର, ଶେଖ୍ ବଜାର, ବାଉଁଶ ଗଳି ଭଳି ପ୍ରମୁଖ ସ୍ଥାନରେ ବିକ୍ରି ହେଉଛି । ଏ ନେଇ ଦୀର୍ଘ ବର୍ଷରୁ ବକ୍ସି ବଜାରରେ ବ୍ୟବସାୟ କରୁଥିବା ବ୍ୟବସାୟୀ ଅବଦୁଲ୍ ଜାହିଦ୍ କହିଛନ୍ତି, କଟକ ଭାଇଚାରା ସହରରେ ଏହି ଖାଦ୍ୟ ସାମଗ୍ରୀ ସବୁ ଧର୍ମର ଲୋକମାନେ ନେବାକୁ ପସନ୍ଦ କରନ୍ତି । ସେଥିପାଇଁ ସବୁବେଳେ କିଛି କିଛି ନୂଆ ସାମଗ୍ରୀ ଆଣିଛି । ବିଶେଷକରି ଏଥର ଅନେକ ପ୍ରକାରର ଖଜୁରୀ ଆସିଛି ।
ପବିତ୍ର ରମ୍ଜାନ୍ ମାସ ଆରମ୍ଭ ହୋଇଥିଲାବେଳେ ଆଜି ପ୍ରଥମ ରୋଜା ତଥା ଉପବାସ ସମସ୍ତେ ରଖିଥିଲେ । ଯାହାଦ୍ୱାରା ଦିନ ତମାମ୍ ରୋଜାରେ ନିଜ ନିଜ କାମ ଓ କର୍ତ୍ତବ୍ୟ କରିବା ସହିତ ନମାଜ ପାଠ ମଧ୍ୟ ହୋଇଥିଲା । ତେବେ ପ୍ରଥମ ଇଫ୍ତାରିକୁ ସମସ୍ତେ ଏକାଠି କରିଥିଲେ । ଏଥିପାଇଁ ଘର ଓ ମସ୍ଜିଦ୍ମାନଙ୍କରେ ସ୍ୱତନ୍ତ୍ର ଆୟୋଜନ ହୋଇଥିଲା ।
ଥଣ୍ଡା ପାଇଁ ରୁଅଫ୍ଜା ଓ ନଣ୍ଡା ବଗୁଲି
ପେଟ ଥଣ୍ଡା ରଖିବାକୁ ଲୋକମାନେ ପସନ୍ଦ କରୁଛନ୍ତି ରୁଅଫ୍ଜା । ଯାହାକୁ ପାଣିରେ ପକାଇ ଗୋଳାଇ ପିଇଲେ ପେଟ ଥଣ୍ଡା ରହୁଛି । ଏବେ ଏହି ରୁଅଫ୍ଜାରେ ଟିକେ ନଣ୍ଡା ବଗୁଲି ଭିଜାଇ ରଖିଦେଲେ ଏହାର ସ୍ୱାଦ ଦୁଇଗୁଣା ସହିତ ଦେହ ପାଇଁ ମଧ୍ୟ ବେଶ୍ ସ୍ୱାସ୍ଥ୍ୟକର ହେଉଛି । ତେଣୁ ଦୋକାନରେ ରୁଅଫ୍ଜା, ବିଭିନ୍ନ କମ୍ପାନୀର ସ୍କ୍ୱାସ୍ ଓ ଫ୍ଲେବର୍ର ସରବତ ମଧ୍ୟ ବିକ୍ରି ହେଉଛି । ଯାହାର ମୂଲ୍ୟ ୭୦ରୁ ୩ ଶହ ଟଙ୍କା ପର୍ଯ୍ୟନ୍ତ ରହିଛି ।
ଦାନ୍ତ ସଫା ରଖିବାକୁ ମିସ୍ୱାକ୍
ସାଧାରଣତଃ ଏହି ମାସରେ କାଷ୍ଠା ଉପବାସ କରିଥାନ୍ତି । ଏଥିପାଇଁ ଅନେକ ପ୍ରକାରର ନିୟମ ମଧ୍ୟ ରହିଛି । ଉପବାସ ସମୟରେ କୌଣସି ପ୍ରକାରର ଖାଦ୍ୟ ଖାଇବା ବାରଣ ରହିଛି । ଏମିତିକି ଦିନବେଳା ବ୍ରସ୍ ମଧ୍ୟ କରାଯାଇପାରିବ ନାହିଁ । ଏସବୁ ମଧ୍ୟରେ ପାଟିର ବାସ୍ନା ସୁଗନ୍ଧ ରଖିବା ସହିତ ଦାନ୍ତ ସଫା ରଖିବା ପାଇଁ ଅଧିକ ମାତ୍ରାରେ ବିଦେଶରୁ ଆସୁଥିବା ମିସ୍ୱାକ୍ କାଠିର ବ୍ୟବହାର କରାଯାଇଥାଏ । ଯାହାର ମୂଲ୍ୟ ୫୦ରୁ ଶହେ ଟଙ୍କା ରହିଛି ।
ଷ୍ଟ୍ରବେରି ପ୍ୟାକେଟ୍ ୧୦୦ଟଙ୍କା
ଇଫ୍ତାରି ତଥା ରୋଜା ଖୋଲିବା ସମୟରେ ଫଳମୂଳ ଖାଇବାକୁ ସମସ୍ତେ ପସନ୍ଦ କରିଥାନ୍ତି । ଏଥିପାଇଁ ବିଭିନ୍ନ ଫଳ ମଧ୍ୟରେ ଷ୍ଟ୍ରବେରି ସ୍ୱତନ୍ତ୍ର ସ୍ଥାନ ଗ୍ରହଣ କରିଛି । ଯାହାକୁ ଲୋକଙ୍କ ପାଇଁ ପ୍ୟାକେଟ୍ କରି ବିକ୍ରି କରାଯାଉଛି । ଯେଉଁଥିରେ ୬ରୁ ୭ଟି ଷ୍ଟ୍ରବେରୀ ଥିଲାବେଳେ ଏହାର ମୂଲ୍ୟ ୧୦୦ ଟଙ୍କା ରହିଛି
