ଭୁବନେଶ୍ୱର,୨୯/୦୯: ବେଙ୍ଗାଲୁରୁରେ ପ୍ରେମିକା ମହାଲକ୍ଷ୍ମୀଙ୍କୁ ୫୯ ଖଣ୍ଡ କରି ଫ୍ରିଜ୍ରେ ରଖି ମୁକ୍ତିରଞ୍ଜନ ଓଡିଶାକୁ ଆସି ଆତ୍ମହତ୍ୟା କରିଥିଲା । ଏହି ଘଟଣା ସାରା ଦେଶରେ ଚହଳ ପକାଇଛି । ଏମିତି ବାହାର ରାଜ୍ୟରେ ଅପରାଧ ଘଟାଇ ଓଡିଶାରେ ଲୁଚିଥିବା ଅପରାଧୀଙ୍କ ତାଲିକା ବହୁ ଲମ୍ବା । ଅନେକ ପେସାଦାର ଅପରାଧୀ ହତ୍ୟା କାଣ୍ଡ କରୁଛନ୍ତି । ଆତଙ୍କୀ ଆକ୍ରମଣ କରୁଛନ୍ତି । କୋଟି କୋଟି ଟଙ୍କା ଠକୁଛନ୍ତି । ଆଉ ଧରାପଡିବା ଭୟରେ ଓଡିଶାକୁ ଖସି ଆସି ଲୁଚି ଯାଉଛନ୍ତି ।
ଅବସରପ୍ରାପ୍ତ ପୁଲିସ ପଦାଧିକାରୀ କଲ୍ୟାଣ ସମିତି ସଭାପତି ସୂର୍ଯ୍ୟମଣି ତ୍ରିପାଠୀଙ୍କ କହିବା ମୁତାବକ, କୌଣସି ସହରରେ ଅପରାଧ ଘଟାଇବା ପରେ ଅପରାଧୀ ଜଣକ ସାଧାରଣତଃ ଦୂର ଜାଗାକୁ ପଳାନ୍ତି । ପୁଲିସ ନଜରରୁ ବର୍ତ୍ତିବା ପାଇଁ ଅନେକ ସହର ପାର୍ କରନ୍ତି । ନଚେତ୍, ରାଜ୍ୟ ବାହାରକୁ ପଳାନ୍ତି । ଅନ୍ୟ ରାଜ୍ୟ ଅପେକ୍ଷା ଓଡିଶାରେ ଧରାପଡିବା ଭୟ ଅପେକ୍ଷାକୃତ କମ୍ ରହୁଥିବାରୁ ଅନେକ ଅପରାଧୀ ଏଠାକୁ ସୁରକ୍ଷିତ ସ୍ଥାନ ମଣୁଛନ୍ତି । ପୂର୍ବରୁ ଓଡିଶାରୁ ଆତଙ୍କବାଦୀ ଧରାପଡି଼ଥିବା ନଜିର ରହିଛି । ରାଜଧାନୀରେ କମିଶନରେଟ ପୁଲିସର କଡ଼ା ପ୍ରହରାକୁ ଚ୍ୟାଲେଞ୍ଜ ଦେଇ ଅଧିକାଂଶ ଅପରାଧୀ ବିଭିନ୍ନ ବସ୍ତିରେ ଲୁଚୁଛନ୍ତି । କିଛି ନକଲି ପରିଚୟପତ୍ର ଆଧାରରେ ହୋଟେଲରେ ମାସ ମାସ ଧରି ରହୁଛନ୍ତି ।
ତେଲଙ୍ଗାନାରେ ହାଣି ଭୁବନେଶ୍ୱରରେ ଲୁଚିଥିଲେ
ଗତ ଅଗଷ୍ଟ ୧୦ ତାରିଖରେ ତେଲଙ୍ଗାନା ରଙ୍ଗାରେଡ୍ଡୀ ଜିଲ୍ଲାରେ କୁଖ୍ୟାତ ଅପରାଧୀ ଖାଜ୍ଜା ରିଆଜୁଦ୍ଦିନ (୩୯)କୁ ନିର୍ମମ ଭାବେ ହତ୍ୟା କରାଯାଇଥିଲା । ହତ୍ୟାକାରୀମାନେ ରାଜକୋଣ୍ଡା କମିଶନରେଟ୍ ପୁଲିସକୁ ଚକ୍ମା ଦେଇ ଓଡି଼ଶାକୁ ପଳାଇ ଆସିଥିଲେ । ସେଠାକାର ଡିସିପି ସୁନୀତା ରେଡ୍ଡୀ ଏନେଇ କମିଶନରେଟ ପୁଲିସ ସହ ଯୋଗାଯୋଗ କଲେ । ଡିସିପି ପ୍ରତୀକ ସିଂଙ୍କ ନିର୍ଦ୍ଦେଶ କ୍ରମେ ସ୍ପେଶାଲ ସ୍କ୍ୱାଡ୍କୁ ତୁରନ୍ତ ହତ୍ୟାକାରୀମାନଙ୍କ ଟ୍ରାକିଂ କରି ଭୁବନେଶ୍ୱର ରେଳଷ୍ଟେସନ ନିକଟ ଏକ ହୋଟେଲରେ ଚଢ଼ାଉ କରିଥିଲା । ହତ୍ୟାକାରୀମାନେ ବସ୍ ଯୋଗେ କୋଲକାତା ଖସିବାକୁ ଚେଷ୍ଟା କରୁଥିବା ବେଳେ କଟକସ୍ଥିତ ଚାଉଳିଆଗଞ୍ଜ ଥାନା ଅଞ୍ଚଳରୁ କାବୁ କରିଥିଲା । ସେମାନଙ୍କ ତଥ୍ୟ ଅନୁସାରେ ହତ୍ୟାରେ ସମ୍ପୃକ୍ତ ଆଉ ୨ଜଣଙ୍କୁ ତେଲଙ୍ଗାନା ପୁଲିସ ସେଠାକାର ଗୋଲକୋଣ୍ଡା ଦୁର୍ଗରୁ କାବୁ କରିଥିଲା ।
କୋଲକାତାରେ ବ୍ୟବସାୟୀ ଦମ୍ପତିଙ୍କୁ ମାରି ଯାଜପୁରରେ ଲୁଚିଥିଲା
୨୦୨୨ ଜୁନ୍ ୬ରେ ପଶ୍ଚିମବଙ୍ଗ କୋଲକାତା ହରିଶ ମୁଖାର୍ଜୀ ରୋଡ୍ରେ ରହୁଥିବା ମାରୱାଡି଼ ବ୍ୟବସାୟୀ ଅଶୋକ ଶାହା ଓ ତାଙ୍କ ସ୍ତ୍ରୀ ରଶ୍ମିତାଙ୍କ ହତ୍ୟା ହୋଇଥିଲା । କୋଲକାତାର ସୁରକ୍ଷିତ ଜୋନ୍ରେ ଘଟିଥିବା ଏହି ଦମ୍ପତିଙ୍କ ହତ୍ୟାକାଣ୍ଡ ସେଠାକାର ପୁଲିସ ପାଇଁ ଚ୍ୟାଲେଞ୍ଜ ପାଲଟିଥିଲା । କୋଲକାତା ପୁଲିସ ଜଣେ ହତ୍ୟା ଅଭିଯୁକ୍ତକୁ ସପ୍ତାହେ ପରେ ଓଡି଼ଶାର ଯାଜପୁରରୁ ଉଠାଇ ନେଇଥିଲା । ଅବଶ୍ୟ, ହତ୍ୟାରେ ସମ୍ପୃକ୍ତ ଅନ୍ୟ ୩ଜଣ କୋଲକାତାରୁ ଗିରଫ ହୋଇଥିଲେ ।
ଆନ୍ଧ୍ର ବିଧାୟକଙ୍କୁ ଗୁଳି କରି କୋରାପୁଟରୁ ଧରାପଡିଲା
ମାଓନେତା ୨୦୧୮ ସେପ୍ଟେମ୍ବର ୨୩ରେ ଆନ୍ଧ୍ରପ୍ରଦେଶର ଲିପୁଟୁପୁଟୁ ଗାଁରେ ତେଲୁଗୁ ଦେଶମ ପାର୍ଟିର ବିଧାୟକ କିଦାରି ସର୍ବେଶ୍ୱର ରାଓ ଓ ପୂର୍ବତନ ବିଧାୟକ ସିଭାରି ସୋମାଙ୍କୁ ମାଓବାଦୀମାନେ ଗୁଳିକରି ହତ୍ୟା କରିଥିଲେ । ହତ୍ୟାର ୫ ମାସ ପରେ ଜାତୀୟ ତଦନ୍ତକାରୀ ଟିମ୍ (ଏନ୍ଆଇଏ) ଟିମ୍ କୋରାପୁଟ ଛତୁଆ ପଞ୍ଚାୟତରୁ ମାଓବାଦୀ ନେତା ଡମ୍ବୁରୁ ଖିଲାକୁ ଗିରଫ କରିଥିଲା ।
ଫୁଲ ବ୍ୟବସାୟ ଆଳରେ ଲୁଚିଥିଲେ ୪ ସିମି ଛାତ୍ର
୨୦୧୬ ଫେବ୍ରୁଆରୀରେ ରାଉରକେଲା ନାଲା ରୋଡରେ ୪ଜଣ ଷ୍ଟୁଡେଣ୍ଟ ଇସଲାମିକ ମୁଭମେଣ୍ଟ ଇଣ୍ଡିଆ (ସିମି) ଛାତ୍ରଙ୍କୁ କାବୁ କରିଥିଲା ଇଣ୍ଟେଲିଜେନ୍ସ ବ୍ୟୁରୋ (ଆଇବି) ଓ ତେଲଙ୍ଗନା ପୁଲିସ । ଏମାନେ ୨୦୧୩ରେ ମଧ୍ୟପ୍ରଦେଶର ଖଣ୍ଡୁଆ ଜେଲରୁ ଖସି ପଳାଇଥିଲେ । ମଧ୍ୟପ୍ରଦେଶ, ଉତ୍ତରପ୍ରଦେଶ, ମହାରାଷ୍ଟ୍ର, ତେଲଙ୍ଗାନା ଓ ତାମିଲନାଡୁରେ ୧୭ଟି ଆତଙ୍କୀ ଆକ୍ରମଣ, ପୁଲିସକୁ ହତ୍ୟା ଓ ବ୍ୟାଙ୍କରେ ଡକାୟତିରେ ଏମାନଙ୍କ ସମ୍ପୃକ୍ତି ଥିଲା ।