କଟକ,୨୫/୦୩: ପୁଣି ଥରେ ଓଡ଼ିଶା ଫେରିଆସିବାକୁ ଚିନ୍ତା କରୁଛନ୍ତି ଓଡ଼ିଶାର ଅଭିଜ୍ଞ କ୍ରିକେଟର ଶୁଭ୍ରାଂଶୁ ସେନାପତି । ଓଡ଼ିଶା କ୍ରିକେଟରୁ ବର୍ଷେ ଦୂରେଇ ରହିବା ପରେ ସେ ଘର ବାହୁଡିବା ପାଇଁ ମନସ୍ତ କରିଛନ୍ତି । ଏ ବାବଦରେ ମଧ୍ୟପ୍ରଦେଶ କ୍ରିକେଟ ସଂଘର ଏନ୍ଓସିକୁ ଅପେକ୍ଷା କରିଥିବା ଜଣାପଡିଛି । ଯଦି ତାଙ୍କୁ ଏନ୍ଓସି ମିଳେ ସେ ଓଡ଼ିଶା ଫେରିବେ । ଓଡ଼ିଶା ଦଳ ଆସନ୍ତା ଏପ୍ରିଲରେ ଶ୍ରୀଲଙ୍କା ଗସ୍ତରେ ଯିବାକୁ ଯୋଜନା କରୁଛି । ଏହି ଦଳରେ ଶୁଭ୍ରାଂଶୁ ସାମିଲ୍ ହେବାର ସମ୍ଭାବନା ଅଧିକ ରହିଛି ।
ବିସିସିଆଇର ଗତ ଘରୋଇ ସିଜନ୍ରେ ଶୁଭ୍ରାଂଶୁ ମଧ୍ୟପ୍ରଦେଶ ପକ୍ଷରୁ ପ୍ରତିନିଧିତ୍ୱ କରିଥିଲେ। ଆଗାମୀ ସିଜନରେ ସେ ଓଡିଶା ପାଇଁ ଖେଳିବେ ବୋଲି ଆଲୋଚନା ହେଉଛି । ଓଡ଼ିଶା କ୍ରିକେଟ ଆସୋସିଏସନ(ଓସିଏ) ପକ୍ଷରୁ ଶୁଭ୍ରାଂଶୁଙ୍କୁ ଏକାଧିକ ପ୍ରସ୍ତାବ ଦିଆଯାଇଛି । ମଧ୍ୟପ୍ରଦେଶ ଛାଡ଼ି ଓଡ଼ିଶା ପକ୍ଷରୁ ଖେଳିବା ନିମନ୍ତେ ଓସିଏ ପଦାଧିକାରୀ ଆଲୋଚନା କରିଛନ୍ତି । ଅନ୍ୟପକ୍ଷରେ ମଧ୍ୟପ୍ରଦେଶ କ୍ରିକେଟ ସଂଘରୁ ଶୁଭ୍ରାଂଶୁଙ୍କୁ ଏଯାବତ୍ ଏନଓସି ମିଳିନାହିଁ । ଯାହା ଆଶା କରାଯାଉଛି, ଏପ୍ରିଲ ମାସରେ ସେ ଓଡିଶା ଶିବିରରେ ସାମିଲ ହୋଇପାରନ୍ତି।
ବିସିସିଆଇର ଗତ ଘରୋଇ ସିଜନ୍ରେ ଶୁଭ୍ରାଂଶୁ ମଧ୍ୟପ୍ରଦେଶ ପକ୍ଷରୁ ୬ଟି ରଣଜୀ ମ୍ୟାଚ୍ ଖେଳିଥିଲେ । ଏଥିରେ ସେ ୨୫୧ରନ କରିଥିବା ବେଳେ ସୟଦ ମୁସ୍ତାକ ଅଲ୍ଲୀ ଟି-ଟ୍ୱେଣ୍ଟିରେ ୧୦ଟି ମ୍ୟାଚରୁ ୨୫୪ ରନ, ବିଜୟ ହଜାର ଟ୍ରଫିରେ ୪ଟି ମ୍ୟାଚରୁ ୧୩୨ରନ ସଂଗ୍ରହ କରିଥିଲେ । ଅନେକ ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ମଧ୍ୟପ୍ରଦେଶ ନିମନ୍ତେ ଉପଯୋଗୀ ପାଳି ଖେଳି ଦଳକୁ ବିପର୍ଯ୍ୟୟରୁ ଉଦ୍ଧାର କରିଥିଲେ । ମାତ୍ର ଗୋଟିଏ ସିଜନ ଖେଳିବା ପରେ ତାଙ୍କୁ ଘରୋଇ ଦଳକୁ ଫେରାଇ ଆଣିବା ନିମନ୍ତେ ଓସିଏ ଉଦ୍ୟମ କରିଛି ।
ଜଣେ ବରିଷ୍ଠ ପଦାଧିକାରୀଙ୍କ କହିବା ଅନୁସାରେ, ଆଗାମୀ ଦିନରେ ଓଡ଼ିଶା କ୍ରିକେଟ ଲିଗ୍(ଓସିଏଲ୍) ବଡ଼ ଧରଣର ଆୟୋଜନ ହେବ । ଏହାଛଡ଼ା ଓଡ଼ିଶା ସିନିୟର ଦଳ ଏପ୍ରିଲ ମାସରେ ଶ୍ରୀଲଙ୍କା ଗସ୍ତରେ ଯିବ । ଦଳରେ କିଛି ନବାଗତ ଖେଳାଳି ସାମିଲ ହେବେ । ଏହି ସବୁ ମ୍ୟାଚ୍ ସୂଚୀ ନିମନ୍ତେ ଶୁଭ୍ରାଂଶୁଙ୍କୁ ଓଡିଶା ଫେରାଇ ଆଣିବାକୁ ଆଲୋଚନା ହୋଇଛି । ବର୍ତ୍ତମାନ ସୁଦ୍ଧା ଏହି ଘଟଣାରେ କୌଣସି ସ୍ପଷ୍ଟତା ଆସିନାହିଁ ବୋଲି ଓସିଏ ତରଫରୁ କୁହାଯାଇଛି ।
