ଭୁବନେଶ୍ୱର, ୦୭/୦୫ : ବୁଧବାର ଅପରାହ୍ଣ ୪ଟାରେ ବାଜିବ ଯୁଦ୍ଧ ସାଇରନ୍ । ଅଧ ମିନିଟ୍ କି ମିନିଟିଏ ନୁହେଁ, ସାଇରନ୍ ଶଦ୍ଦରେ ୫ ମିନିଟ୍ ଧରି ଚର୍ତୁଦିଗ କମ୍ପି ଉଠିବ । ଆରମ୍ଭ ହେବ ବେସାମରିକ ନାଗରିକ ପ୍ରତିରକ୍ଷା ଅଭ୍ୟାସ (ସିଭିଲ୍ ଡିଫେନ୍ସ ମକ୍ ଡ୍ରିଲ୍) । ଯୁଦ୍ଧ ପାଇଁ ଓଡ଼ିଶା କେତେ ପ୍ରସ୍ତୁତ? ସେନେଇ ସ୍ଥିତି ପରଖାଯିବ । ୧୯୭୧ ମସିହା ପରେ ପ୍ରଥମଥର ସମ୍ଭାବ୍ୟ ଯୁଦ୍ଧ ପାଇଁ ଏଭଳି ପ୍ରତିରକ୍ଷା ଅଭ୍ୟାସ କରାଯିବ । ଏହି ମକ୍ଡ୍ରିଲ୍ର ସମୟ ଯେତିକି ପାଖଉଛି, ଲୋକଙ୍କ ମନରେ ସେତିକି ଛନ୍କା ପଶୁଛି । ଶତ୍ରୁ ବିମାନରୁ ଶୂନ୍ୟରୁ ବୋମା, ଗୋଳାବାରୁଦ ବର୍ଷିଲେ, କ’ଣ କରିବେ? ଆକାଶମାର୍ଗ ଆକ୍ରମଣରୁ ନିଜେ ବର୍ତ୍ତିବା ସହ ଅନ୍ୟକୁ କେମିତି ବଞ୍ଚାଇବେ? ସେନେଇ ଲୋକଙ୍କୁ ପ୍ରଶିକ୍ଷଣ ଦିଆଯିବ ।
କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ଦ୍ୱାରା ଓଡ଼ିଶାର ୧୨ଟି ସମ୍ବେଦନଶୀଳ ସ୍ଥାନକୁ ଚିହ୍ନଟ କରାଯାଇଛି । ସେଗୁଡି଼କ ହେଲା, ଅନୁଗୁଳ(ତାଳଚେର), ଖୋର୍ଦ୍ଧା (ଭୁବନେଶ୍ୱର), ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଗଞ୍ଜାମ, ଜଗତସିଂହପୁର (ପାରାଦୀପ), ଢେଙ୍କାନାଳ, ପୁରୀ, କୋରାପୁଟ, ସୁନ୍ଦରଗଡ଼ (ରାଉରକେଲା) । କାଟାଗୋରି-୧ ଅର୍ଥାତ୍ ସର୍ବାଧିକ ସମ୍ବେଦନଶୀଳ ସହର ତାଲିକାରେ ତାଳଚେର ଅଛି । କାଟାଗୋରି-୨ରେ ବାଲେଶ୍ୱର, କୋରାପୁଟ, ଭୁବନେଶ୍ୱର, ଗୋପାଳପୁର, ହୀରାକୁଦ, ପାରାଦୀପ, ରାଉରକେଲାକୁ ରଖାଯାଇଛି । କାଟାଗୋରି-୩ ତାଲିକାରେ ଭଦ୍ରକ, ଢେଙ୍କାନାଳ, ଜଗତସିଂହପୁର ଓ କେନ୍ଦ୍ରାପଡ଼ା ରହିଛି ।
ଏହି ପ୍ରତିରକ୍ଷା ପୂର୍ବାଭ୍ୟାସ ପରିଚାଳନା ପାଇଁ ମଙ୍ଗଳବାର ପୂର୍ବାହ୍ନରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ଅଧୀନସ୍ଥ ବିପର୍ଯ୍ୟୟ ପରିଚାଳନା ବିଭାଗ ପ୍ରସ୍ତୁତି ବୈଠକ ଚାଲିଥିଲା । ଆଭାସୀ ମାଧ୍ୟମରେ ଅନୁଷ୍ଠିତ ଏହି ବୈଠକକୁ କେନ୍ଦ୍ର ସ୍ୱରାଷ୍ଟ୍ର ସଚିବ ଗୋବିନ୍ଦ ମୋହନଙ୍କ ଅଧ୍ୟକ୍ଷତା କରିଥିଲେ । ଓଡ଼ିଶାରୁ ଗୃହ ବିଭାଗର ଅତିରିକ୍ତ ମୁଖ୍ୟ ସଚିବ ସତ୍ୟବ୍ରତ ସାହୁ, ବେସାମରିକ ପ୍ରତିରକ୍ଷା ନିର୍ଦ୍ଦେଶକ ତଥା ଅଗ୍ନିଶମ ଓ ଆପାତକାଳୀନ ସେବା ବିଭାଗୀୟ ପୁଲିସ ମହାନିର୍ଦ୍ଦେଶକ ସୁଧାଂଶୁ ଷଡ଼ଙ୍ଗୀ, ଗୃହ ବିଭାଗର ସ୍ୱତନ୍ତ୍ର ସଚିବ ଆର କେ ଶର୍ମା ଓ ଓସଡମା କାର୍ଯ୍ୟନିର୍ବାହୀ ନିର୍ଦ୍ଦେଶକ କମଳ ଲୋଚନ ମିଶ୍ର ବୈଠକରେ ଯୋଗ ଦେଇଥିଲେ । କେନ୍ଦ୍ରର ଗୁରୁତ୍ୱପୂର୍ଣ୍ଣ ବୈଠକ ପରେ ୧୨ ଜିଲ୍ଲାର ଜିଲ୍ଲାପାଳ ଓ ଜିଲ୍ଲା ଆପାତକାଳୀନ ଅଧିକାରୀଙ୍କ ସହ ଶ୍ରୀ ସାହୁ ବିସ୍ତୁତ ଆଲୋଚନା କରିଛନ୍ତି ।
ଆଜି ମକ୍ଡ୍ରିଲ୍ର ପ୍ରସ୍ତୁତି ନେଇ ବିଭିନ୍ନ ବିଭାଗ ମଧ୍ୟରେ ସମନ୍ୱୟକୁ ଗୁରୁତ୍ୱ ଦେଇଛନ୍ତି । ଅଗ୍ନିଶମ ଡିଜି ଶ୍ରୀ ଷଡ଼ଙ୍ଗୀଙ୍କ କହିବା ମୁତାବକ, ଆଜି ସହରାଞ୍ଚଳ ସହ ଉପକୂଳ ଜିଲ୍ଲାରେ ମକ୍ ଡ୍ରିଲ୍ କରାଯିବ । ଏହି ପ୍ରସ୍ତୁତି ଆଗାମୀ ସପ୍ତାହ ଯାଏଁ ଚାଲିବ । ସାଇରନ ବାଜିବା କ୍ଷଣି ଲୋକମାନେ ସୁରକ୍ଷିତ ରହିବାକୁ କଂକ୍ରିଟ୍ ଛାତ ଥିବା ଘର ଭିତରକୁ ଚାଲିଯିବେ । ବିମାନ ଆକ୍ରମଣ ବେଳେ କେହି ରାସ୍ତାଘାଟରେ ଥିଲେ କିମ୍ବା ନିକଟରେ କଂକ୍ରିଟ୍ ଛାତ କି ଆଶ୍ରୟସ୍ଥଳ ନଥିଲେ । ବିପତ୍ତି ନ ଟଳିବା ଯାଏଁ କାନକୁ ଚାପି ତଳେ ଲମ୍ବ ହୋଇ ଶୋଇରହିବ । ବସ୍ତିବାସିନ୍ଦାମାନଙ୍କ ପାଇଁ ବିଭିନ୍ନ ସ୍କୁଲକୁ ଆଶ୍ରୟସ୍ଥଳ ଭାବେ ନିର୍ଦ୍ଧାରଣ କରାଯାଇଛି । ଉପକୂଳବର୍ତ୍ତୀ ଜିଲ୍ଲାଗୁଡ଼ିକରେ ଲୋକମାନେ ବାତ୍ୟା ଆଶ୍ରୟସ୍ଥଳଗୁଡ଼ିକରେ ଆଶ୍ରୟ ନେଇପାରିବେ । ଥରେ ଆକ୍ରମଣର ପ୍ରଭାବ ସରିଲେ, ବେସାମରିକ ପ୍ରତିରକ୍ଷା ସ୍ୱେଚ୍ଛାସେବୀମାନେ ପୁଣି ଲମ୍ବା ସାଇରନ୍ ବଜାଇବେ । ଯାହାକି ସୂଚାଇବ ଯେ, ଶତ୍ରୁ ବିମାନ ଫେରିଗଲା । ଏହାପରେ ବେସାମରିକ ପ୍ରତିରକ୍ଷା, ଏନସିସି, ଏନଏସଏସ ଓ ସ୍ଥାନୀୟ ସ୍ୱେଚ୍ଛାସେବୀମାନେ ଉଦ୍ଧାର କାର୍ଯ୍ୟକୁ ଆଗେଇବେ । ଆହତ ବ୍ୟକ୍ତିମାନଙ୍କୁ ଡାକ୍ତରଖାନା ନିଆଯିବ । ସ୍ଥାନାନ୍ତର ପ୍ରକ୍ରିୟାର ଅଭ୍ୟାସ ପାଇଁ ବ୍ୟାପକ ରିହର୍ସାଲ କରାଯିବ ।
ଆଜି ମକ୍ ଡ୍ରିଲର ଏହା ଅଂଶବିଶେଷ ବୋଲି ଶ୍ରୀ ଷଡ଼ଙ୍ଗୀ କହିଛନ୍ତି । ଆଗାମୀ ମକ୍ ଡ୍ରିଲ ପାଇଁ ବ୍ଲାକ୍ ଆଉଟ୍ ବ୍ୟବସ୍ଥା ସହ ବିଦ୍ୟୁତ ସଂଯୋଗ କାଟିଦିଆଯିବାକୁ ନିଷ୍ପତ୍ତି ନିଆଯାଇଛି । ରାଜ୍ୟର ବିଭିନ୍ନ ବିମାନବନ୍ଦର, ଏୟାରଷ୍ଟ୍ରିପ୍ ସମେତ ଆର୍ମି ବେସ୍, ସାମରିକ ପ୍ରତିଷ୍ଠାନ, କ୍ଷେପଣାସ୍ତ୍ର ଘାଟି ସମେତ ସମସ୍ତ ଗୁରୁତ୍ୱପୂର୍ଣ୍ଣ ଶିଳ୍ପ ପ୍ରତିଷ୍ଠାନକୁ ସୁରକ୍ଷିତ ରଖିବାକୁ ଗୁରୁତ୍ୱ ଦିଆଯାଉଛି । ଆଜି ପୂର୍ବାହ୍ଣ ସୁଦ୍ଧା ରାଜ୍ୟ ସ୍ତରରେ ଓ ଜିଲ୍ଲା ସ୍ତରରେ କଣ୍ଟ୍ରୋଲ ରୁମ୍ କରାଯିବ । ଜରୁରୀକାଳୀନ ପ୍ରସ୍ତୁତି ବୃଦ୍ଧି, କ୍ରାସ୍ ବ୍ଲାକ୍ ଆଉଟ୍ ପାଇଁ ତୟାରୀ, ଯୁଦ୍ଧ ସ୍ଥିତିରେ ସ୍ଥାନାନ୍ତର ଅଭ୍ୟାସରେ ଛାତ୍ରଛାତ୍ରୀ ଓ ସାଧାରଣ ନାଗରିକଙ୍କୁ ସାମିଲ କରାଯିବ । ଗାଁ ସ୍ତରରେ ମଧ୍ୟ ମକ୍ଡ୍ରିଲ୍ ଆୟୋଜନ ପାଇଁ ଯୋଜନା କରାଯାଉଛି । ପୂରା ପ୍ରସ୍ତୁତି ଗ୍ରାମାଞ୍ଚଳ ଯାଏଁ ଯିବା ପାଇଁ ପ୍ରାୟ ସପ୍ତାହେ ଲାଗିବ । ଗୃହ ବିଭାଗର ଅତିରିକ୍ତ ମୁଖ୍ୟ ସଚିବ ଶ୍ରୀ ସାହୁ ସମସ୍ତ ଜିଲ୍ଲାପାଳ ଓ ଏସ୍ପିଙ୍କ ସହ ସମନ୍ୱୟ ରକ୍ଷା କରି ନାଗରିକ ପ୍ରତିରକ୍ଷା ଅଭ୍ୟାସ ଆୟୋଜନ କରିବାକୁ ନିର୍ଦ୍ଦେଶ ଦେଇଛନ୍ତି । ପ୍ରର୍ଯ୍ୟାପ୍ତମାତ୍ରାରେ ବିମାନ ଆକ୍ରମଣ ଚେତାବନୀ ସାଇରନ କାର୍ଯ୍ୟକ୍ଷମ କରିବାକୁ ପରାମର୍ଶ ଦେଇଛନ୍ତି ।
ସୂଚନାଯୋଗ୍ୟ, ଜେନେଭା ଚୁକ୍ତି ଅନୁସାରେ ବେସାମରିକ ପ୍ରତିରକ୍ଷା ଓ ରେଡ଼କ୍ରସ ସଂସ୍ଥା ଯୁଦ୍ଧରେ ଅଂଶୀଦାର ନୁହଁନ୍ତି । ସେମାନଙ୍କ ଉପରେ କୌଣସି ଆକ୍ରମଣ କରାଯାଇ ପାରିବ ନାହିଁ । ଜିଲ୍ଲା ମାଜିଷ୍ଟ୍ରେଟ୍ମାନେ ବେସାମରିକ ପ୍ରତିରକ୍ଷାର ନିୟନ୍ତ୍ରକ ଭାବେ କାମ କରନ୍ତି । ସାଧାରଣ ଲୋକଙ୍କୁ ଖାଦ୍ୟ, ଜଳଯୋଗାଣ, ବିଦ୍ୟୁତ୍, ସ୍ୱାସ୍ଥ୍ୟସେବା ଏହି ବେସାମରିକ ପ୍ରତିରକ୍ଷା ସଂସ୍ଥା ଅଧୀନରେ ଚାଲିବ । ଜିଲ୍ଲା ମାଜିଷ୍ଟ୍ରେଟ୍ମାନେ ବିଭିନ୍ନ ସେବାର ମୁଖ୍ୟଙ୍କୁ ଏଥିପାଇଁ ବେସାମରିକ ପ୍ରତିରକ୍ଷା ୱାର୍ଡେନ ଭାବରେ ନିଯୁକ୍ତି ଦେବେ ।
ଏହି ଖବରଟିକୁ ପଢନ୍ତୁ-ପାକିସ୍ତାନର ୯ଟି ସ୍ଥାନର କେତେ କିଲୋମିଟର ଭିତରେ ଭାରତୀୟ ସେନା କରିଛି ଏୟାରଷ୍ଟ୍ରାଇକ? ରାତି ଅଧରେ ଆତଙ୍କୀସ୍ଥାନରେ ବିଦ୍ୟୁତ ଗାଏବ
