ଭୁବନେଶ୍ୱର,୧୪/୦୪: ରାଜଧାନୀରେ ଶିଶୁ ଚୋରି ଅଭିଯୋଗକୁ ବିତିଲାଣି ୩୦ ଘଣ୍ଟା । ଏ ଯାଏ ଅପହରଣକାରୀଙ୍କ ମିଳିନି ପତ୍ତା । ରବିବାର ଦୃଷ୍ଟିବାଧିତ ଭିକ୍ଷୁକ ମା’ କୋଳରୁ ଦେଢ଼ ବର୍ଷର ଶିଶୁପୁତ୍ରକୁ କେହି ଚୋରି କରି ନେଇଥିବା ଖାରବେଳନଗର ଥାନାରେ ଅଭିଯୋଗ ହୋଇଥିଲା । ଜନଗହଳିପୂର୍ଣ୍ଣ ରାମ ମନ୍ଦିର ସମ୍ମୁଖରୁ ଶିଶୁ ଚୋରି ଘଟଣାକୁ କମିଶନରେଟ୍ ପୁଲିସ ଅତି ଗମ୍ଭୀରତାର ସହ ନେଇଛି । ଖାରବେଳନଗର ଥାନା ପୁଲିସ ରାମମନ୍ଦିର ସମ୍ମୁଖ ଏବଂ ବିଭିନ୍ନ ଟ୍ରାଫିକ୍ ପୋଷ୍ଟରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରି ଏହି ପିଲା ଚୋରି ଘଟଣାରେ ୨ ଜଣଙ୍କ ସଂପୃକ୍ତି ଥିବା ଜାଣିବାକୁ ପାଇଛି । ଶିଶୁକୁ ଉଦ୍ଧାର କରିବାକୁ କମିଶନରେଟ୍ ପୁଲିସର ୩ଟି ସ୍ୱତନ୍ତ୍ର ଟିମ୍ ବିଭିନ୍ନ ସ୍ଥାନରେ ଚଢ଼ଉ କରୁଛି । ସେପଟେ ସିଡବ୍ଲ୍ୟୁସି ଏକ ଟିମ୍ ଘଟଣାର ତଦନ୍ତ ଆରମ୍ଭ କରିଛନ୍ତି
ସ୍ୱାମୀ ପରିତ୍ୟକ୍ତା ଜୟନ୍ତୀ ମଲ୍ଲିକ ଖାରବେଳନଗର ଥାନାରେ କରିଥିବା ଅଭିଯୋଗ ମୁତାବକ, ସେ ନୀଳାଦ୍ରିବିହାର କନ୍ୟାଶ୍ରମ ସ୍ଥିତ ଘରେ ରହୁଥିଲେ । ତାଙ୍କର ଗୋଟିଏ ୭ ବର୍ଷର ଝିଅ ଓ ଦେଢ ବର୍ଷର ପୁଅ ଅଛନ୍ତି । ସେ ଦୀର୍ଘ ୫ ବର୍ଷ ଧରି ରାମ ମନ୍ଦିର ସମ୍ମୁଖ ଫୁଟ୍ପାଥରେ ଭିକ୍ଷାବୃତ୍ତି କରି ଆସୁଛନ୍ତି । ଶନିବାର ଅପରାହ୍ଣରେ ବର୍ଷା ହେବାରୁ ସେ ଆଉ ଘରକୁ ଫେରିପାରି ନଥିଲେ । ଦୁଇ ଛୁଆଙ୍କୁ ଧରି ରାମ ମନ୍ଦିର ସମ୍ମୁଖ ଫୁଟ୍ପାଥରେ ଶୋଇପଡ଼ିଥିଲେ । ରାତି ୧୨ଟାରୁ ୨ଟା ମଧ୍ୟରେ ଜଣେ ବ୍ୟକ୍ତି ଆସି ସେଠାରେ ପହଞ୍ଚିଥିଲେ । ସେ ମୋ ପୁଅ ସହିତ ଖେଳାଖେଳି କରିଥିଲେ । ତାକୁ ୨ଟି ୧୦ ଟଙ୍କିଆ ଜୁସ୍ ଆଣି ପିଇବାକୁ ଦେବା ସହ ତା’ ସହ ମୋବାଇଲରେ ଖେଳୁଥିଲେ । ଏହି ସମୟ ମଧ୍ୟରେ ତାଙ୍କ ଆଖି ଲାଗି ଯାଇଥିଲା । ରାତି ପ୍ରାୟ ୩ଟାରେ ସେ ଦେଖିବାବେଳକୁ ତାଙ୍କ ପୁଅ ସେଠାରେ ନଥିଲା । ପୁଅ ସଂପର୍କରେ ସେ ଆଖପାଖ ଲୋକଙ୍କୁ ପଚରାଉଚରା କରିଥିଲେ ମଧ୍ୟ ପତ୍ତା ପାଇନଥିଲେ । କେହି ଅଙ୍ଗତସ୍କରୀ ତାଙ୍କ ପୁଅକୁ ଚୋରି କରି ନେଇଥିବା ସେ ଅଭିଯୋଗ କରିଛନ୍ତି ।
ଅଭିଯୋଗ ପାଇ ପୁଲିସ ସଙ୍ଗେ ସଙ୍ଗେ ଘଟଣାସ୍ଥଳରେ ପହଞ୍ଚିବା ସହ ଆଖପାଖରେ ଖୋଜାଖୋଜି କରିଥିଲା । ରାମ ମନ୍ଦିର ସମ୍ମୁଖରେ ଲାଗିଥିବା ସିସିଟିଭି ଓ ଖାରବେଳନଗର ଥାନା ଏବଂ ବିଭିନ୍ନ ଟ୍ରାଫିକ୍ ଛକ ମାନଙ୍କରେ ଲାଗିଥିବା ସିସିଟିଭି ଫୁଟେଜକୁ ପୁଲିସ ଯାଞ୍ଚ କରିଥିଲା । ପ୍ରାୟ ୮ଟି ସିସିଟିଭି ଫୁଟେଜ ଯାଞ୍ଚ କରିବା ପରେ ୨ ଜଣ ଯୁବକ ଏକ ବାଇକ୍ରେ ଶିଶୁ ପୁତ୍ରଟିକୁ ରାମ ମନ୍ଦିର ସମ୍ମୁଖରୁ ନେଇ ଖାରବେଳନଗର ଥାନା ସମ୍ମୁଖ, ମାଷ୍ଟର କ୍ୟାଣ୍ଟିନ ଛକ ଓ ରାଜମହଲ ଛକ ଦେଇ ଯାଇଥିବା ସିସିଟିଭି ଫୁଟେଜରୁ ଜଣାପଡ଼ିଛି । ଭୁବନେଶ୍ୱର ଡିସିପି ଜଗମୋହନ ମୀନାଙ୍କ ନିର୍ଦ୍ଦେଶରେ ଖାରବେଳନଗର ଥାନା ଆଇଆଇସି ରଜନୀକାନ୍ତ ମିଶ୍ରଙ୍କ ନେତୃତ୍ୱରେ ୩ଟି ସ୍ୱତନ୍ତ୍ର ଟିମ୍ ପିଲାକୁ ଖୋଜିବାରେ ଲାଗିଛନ୍ତି । ଅଙ୍ଗ ତସ୍କରୀ ଗ୍ୟାଙ୍ଗ୍ ଏହି ପିଲାକୁ ଚୋରି କରିଛନ୍ତି କି କେହି ନିଃସନ୍ତାନ ଏହି ପିଲା ଚୋରିରେ ସଂପୃକ୍ତ ଅଛନ୍ତି, ସେନେଇ ପୁଲିସ ତଦନ୍ତ ଚଳାଇଛି । ୩୬ ଘଣ୍ଟା ପରେ ବି ଚୋରି ଶିଶୁପୁତ୍ର ଉଦ୍ଧାର ହୋଇ ନଥିବା ଜଣାପଡ଼ିଛି । ସେପଟେ ରୁଚିକା ଚାଇଲ୍ଡଲାଇନ୍ କର୍ମକର୍ତ୍ତାମାନେ ମଧ୍ୟ ଏହି ସମ୍ବେଦନଶୀଳ ଘଟଣାକୁ ଗୁରୁତ୍ୱର ସହ ନେଇ ଶିଶୁକୁ ଖୋଜିବାରେ ସହାୟତା କରୁଛନ୍ତି । ଏନେଇ ରୁଚିକାର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଡ. ବେଣୁଧର ସେନାପତି ପକ୍ଷରୁ ଡିସିପିଓ ଓ ସିଡବ୍ଲ୍ୟୁସି ଅଧ୍ୟକ୍ଷଙ୍କୁ ଅବଗତ କରାଇଥିଲେ।
