ନୂଆଦିଲ୍ଲୀ,୨୩/୦୨: ଅପେକ୍ଷାର ଅନ୍ତ । ସୁପର ସନଣ୍ଡେର ସହି ସମୟ ଆସି ଯାଇଛି । ଆଇସିସି ଚାମ୍ପଅନ୍ସ ଟ୍ରଫି ଟୁର୍ଣ୍ଣାମେଣ୍ଟରେ ଦୁବାଇ ମଇଦାନରେ ହାଇଭୋଲ୍ଟେଜ ମୁକାବିଲାରେ ମୁହାଁମୁହିଁ ହୋଇଛନ୍ତି ଦୁଇ ପାରମ୍ପିକ ପ୍ରତିନ୍ଦ୍ବନ୍ଦୀ ଭାରତ ଓ ପାକିସ୍ତାନ । ଜୋରଦାର ହେବ ଲଢେଇ । ରୋହିତ ସେନା ବନାମ ରିଜୱାନ ସ୍କ୍ବାର୍ଡ ମଧ୍ୟରେ ହେବ କଡ୍ଡା ଟକ୍କର । ପାକିସ୍ତାନ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଛି । ପାକିସ୍ତାନକୁ ହରାଇ ୨୦୧୭ ଚାମ୍ପିଅନ୍ସ ଟ୍ରଫିର ପ୍ରତିଶୋଧ ନେବାକୁ ଲକ୍ଷ୍ୟ ରଖିଛି ଟିମ୍ ଇଣ୍ଡିଆ । ଅନ୍ୟ ପଟେ ନ୍ୟୁଜିଲାଣ୍ଡଠୁ ପରାସ୍ତ ହୋଇ ଚାପରେ ଥିବା ପାକିସ୍ତାନ ପାଇଁ ଏହି ମ୍ୟାଚ କର ବା ମର ସ୍ଥିତିରେ ରହିଛି । ପାକିସ୍ତାନ ଏହି ମ୍ୟାଚ ହାରିଲେ ଟୁର୍ଣ୍ଣାମେଣ୍ଟରୁ ବିଦା ହୋଇପାରେ । ତେଣୁ ମ୍ୟାଚ ଜିତିବାକୁ ପ୍ରାଣପଣେ ଚେଷ୍ଟା କରିବ ।
ପ୍ରତିଶୋଧ ନେବ ଭାରତ- ଚାମ୍ପିଅନ୍ସ ଟ୍ରଫିର ପ୍ରଥମ ମ୍ୟାଚ ଜିତି ଦୃଢ ମନୋବଳରେ ରହିଛି ଟିମ୍ ଇଣ୍ଡିଆ । ଆଜି ଦ୍ବିତୀୟ ମ୍ୟାଚରେ ପାକିସ୍ତାନକୁ ଭେଟିଛି । ଦୁଇ ଦଳ ମଧ୍ୟରେ କ୍ରିକେଟ ମୁକାବିଲା ବେଶ୍ ରୋମାଞ୍ଚକର । ଦୁଇ ଦେଶ ମଧ୍ୟରେ ଖେଳାଯାଇଥିବା ସମସ୍ତ ଦିନିକିଆ ଓ ମୁକାବିଲାରେ ଭାରତଠୁ ପାକିସ୍ତାନ ଆଗରେ ରହିଛି । ୨୦୭ଟି ଅନ୍ତର୍ଜାତୀୟ ମ୍ୟାଚରୁ ପାକିସ୍ତାନ ୮୮ଟି ଓ ଭାରତ ୭୫ଟି ଜିତିଛି । ୧୩୫ଟି ଦିନିକିଆରୁ ପାକିସ୍ତାନ ୭୩ ଓ ଭାରତ ୫୭ଟି ଜିତିଛି । ଯଦିଓ ପାକିସ୍ତାନ ଆଗରେ ରହିଛି କିନ୍ତୁ ଶକ୍ତିଶାଳୀ ଭାରତ ତାକୁ କଡ୍ଡ ଟକ୍କର ଦେବ । ୨୦୧୭ ଚାମ୍ପିଅନ୍ସ ଟ୍ରଫି ଫାଇନାଲରେ ଭାରତକୁ ହରାଇ ପାକିସ୍ତାନ ବିଜେତା ହୋଇଥିଲା । ଆଜିର ଏହି ମ୍ୟାଚ ଜିତି ଭାରତ ପ୍ରତିଶୋଧ ନେବାକୁ ଲକ୍ଷ୍ୟ ରହିଛି । ବିଜୟ ସହ ପ୍ରଥମ ଦଳ ଭାବେ ସେମିରେ ସ୍ଥାନ ପକ୍କା କରିବାକୁ ପ୍ରୟାସ କରିବ ଇଣ୍ଡିଆ । ଭାରତ ତାର ଏକାଦଶରେ ପରିବର୍ତ୍ତନ କରିନାହିଁ ।
Your #TeamIndia for today 💪
— BCCI (@BCCI) February 23, 2025
Updates ▶️ https://t.co/llR6bWyvZN#PAKvIND | #ChampionsTrophy pic.twitter.com/AzTW7e0PlP
ସମସ୍ତଙ୍କ ନଜର ଶୁଭମନ ଗିଲ୍ଙ୍କ ଉପରେ ରହିଛି । ବାଂଲାଦେଶ ବିପକ୍ଷରେ ସେ ମ୍ୟାଚ ବିଜୟୀ ଶତକ ଅର୍ଜନ କରିଥିଲେ । ଚମତ୍କାର ଫର୍ମରେ ରହିଥିବା ଶୀର୍ଷ ମାନ୍ୟତା ପ୍ରାପ୍ତ ଏହି ବ୍ୟାଟରଙ୍କ ଠାରୁ ଆଉ ଏକ ବଡ଼ ଇନିଂସର ଆଶା ରଖିଛନ୍ତି କ୍ରିକେଟ୍ ପ୍ରେମୀ । ସେହିପରି ଦୁଇ ଭେଟେରାନ ରୋହିତ ଶର୍ମା ଓ ବିରାଟ କୋହଲିଙ୍କ ପାଇଁ ପାକ୍ ପେସ୍ ବାହିନୀ ପ୍ରସ୍ତୁତ ରହିଛନ୍ତି । ରୋହିତ ଗତ ୨୦୨୩ ଦିନିକିଆ ବିଶ୍ୱକପ୍ରେ ସହିନ ଆଫ୍ରିଦି ଓ ହ୍ୟାରିସ ରୌଫଙ୍କୁ ନିସ୍ତୁକ ପ୍ରହାର କରିଥିଲେ । ଏଥର ମଧ୍ୟ ରୋହିତ-ରୌଫ ଲଢ଼େଇକୁ ଦର୍ଶକ ଉତ୍ସୁକତାର ସହ ଅପେକ୍ଷା କରିଛନ୍ତି ।
ସେହିପରି ନ୍ୟୁଜିଲାଣ୍ଡଠୁ ପ୍ରଥମ ମ୍ୟାଚ ହାରିବା ପରେ ଟୁର୍ଣ୍ଣାମେଣ୍ଟରେ ତିଷ୍ଠିବାକୁ ପ୍ରାଣମୂର୍ଚ୍ଚା ଉଦ୍ୟମ କରିବ ପାକିସ୍ତାନ । ଭାରତ ବିପକ୍ଷ ଏହି ମ୍ୟାଚ ପାକିସ୍ତାନ ପାଇଁ ‘କର ବା ମର’ ପରିସ୍ଥିତି ସୃଷ୍ଟି କରିଛି । ଆଉ ଗୋଟିଏ ମ୍ୟାଚ୍ ହାରିଲେ ଟାଇଟଲ ଦୌଡ଼ରୁ ବାଦ ପଡ଼ିଯିବ । ଭାରତ ବିପକ୍ଷରେ ପାକିସ୍ତାନର ରେକର୍ଡ ଭଲ ରହିଛି । ଉଭୟ ଦଳ ଚାମ୍ପିଅନ୍ସ ଟ୍ରଫିରେ ପରସ୍ପରକୁ ୫ଥର ଭେଟିଛନ୍ତି । ଏଥିରୁ ପାକିସ୍ତାନ ୩ଟି ମ୍ୟାଚ୍ ଜିତିଛି । ଚୂଡାନ୍ତ ଏକାଦଶରେ ଗୋଟିଏ ପରିବର୍ତ୍ତନ କରିଛି ପାକ୍ । ପକର ଜମାନଙ୍କ ସ୍ଥାନରେ ଇମାମ୍- ଉଲ୍ଲ-ହକଙ୍କୁ ସ୍ଥାନ ମିଳିଛି ।
୧୬ମାସ ପରେ ଦିନିକିଆ ଫର୍ମାଟ୍ରେ ସାମ୍ନାସାମ୍ନି ହୋଇଛନ୍ତି କ୍ରିକେଟ୍ ଦୁନିଆର ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ । ସମଗ୍ର ବିଶ୍ୱ ଏହି ମ୍ୟାଚର ପରିଣାମକୁ ଅପେକ୍ଷା କରିଛି । ଦୁବାଇ ଅନ୍ତର୍ଜାତୀୟ ଷ୍ଟାଡ଼ିୟମ୍ ନୀଳ ଓ ସବୁଜ ଜର୍ସିରେ ପୁରି ଉଠିଛି । ଉଭୟ ଦଳର ସମର୍ଥକଙ୍କ ‘ହଲ୍ଲା ବୋଲ୍’ କମ୍ପୁଛି ଷ୍ଟାଡ଼ିୟମ୍ । ହାଇଭୋଲ୍ଟେଜ ମ୍ୟାଚକୁ ନେଇ ଟେଲିଭିଜନଠୁ ଆରମ୍ଭ କରି ଓଟିଟି ପ୍ଲାଟଫର୍ମରେ କ୍ରିକେଟ୍ ପ୍ରେମୀ ମ୍ୟାଚର ଭରପୁର ମଜା ଉଠାଉଛନ୍ତି ।
ଭାରତୀୟ ଚୂଡାନ୍ତ ଏକାଦଶ- ରୋହିତ ଶର୍ମା (ଅଧିନାୟକ), ଶୁଭମନ ଗିଲ୍, ବିରାଟ କୋହଲି, ଶ୍ରେୟାସ ଆୟର, କେଏଲ ରାହୁଲ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡ଼େଜା, ଅକ୍ଷର ପଟେଲ, ହର୍ଷିତ ରାଣା, ମହମ୍ମଦ ସାମି, କୁଲଦୀପ ଯାଦବ ।
ପାକିସ୍ତାନ ଚୂଡାନ୍ତ ଏକାଦଶ- ଇମାମ ଉଲ-ହକ୍, ବାବର ଆଜମ, ସାଉଦ ସକିଲ, ମହମ୍ମଦ ରିଜୱାନ (ଅଧିନାୟକ), ସଲମାନ ଆଘା, ତୟାବ ତାହିର, ଖୁସଦିଲ ଶାହ, ସାହିନ ଆଫ୍ରିଦି, ନସିମ ଶାହ, ହ୍ୟାରିସ ରୌଫ, ଅବରାର ଅହମ୍ମଦ ।
