ନୂଆଦିଲ୍ଲୀ: ଆଧାର କାର୍ଡ ଏବଂ ପ୍ୟାନ କାର୍ଡ ସୂଚନା ଲିକ୍ କରୁଥିବା କିଛି ୱେବସାଇଟକୁ ବନ୍ଦ କରିଛନ୍ତି କେନ୍ଦ୍ର ସରକାର। ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଗୁରୁବାର ଦିନ ଏ ବାବଦରେ ଏକ ବିବୃତ୍ତି ଜାରି କରି ସୂଚନା ଦେଇଛି । ଯେଉଁଥିରେ କୁହାଯାଇଛି ଯେ, କେନ୍ଦ୍ର ସରକାର ଅନେକ ୱେବସାଇଟ୍ କୁ ବନ୍ଦ କରିଛନ୍ତି, ଯାହା ଆଧାର ଏବଂ ପାନ୍ କାର୍ଡ ବିବରଣୀ ସହିତ ସମ୍ବେଦନଶୀଳ ବ୍ୟକ୍ତିଗତ ସୂଚନା ପ୍ରକାଶ କରୁଥିଲା ।
ବାସ୍ତବରେ ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆ (UIDAI) ଆଧାର ତଥ୍ୟର ସର୍ବସାଧାରଣ ପ୍ରଦର୍ଶନ ପରେ ପୋଲିସ ନିକଟରେ ଅଭିଯୋଗ କରିବା ପରେ ଏହି ପଦକ୍ଷେପ ନିଆଯାଇଛି, ଯାହାକି ଆଧାର ଆକ୍ଟ ୨୦୧୬ କୁ ଉଂଲଘନ କରିଛି । ଏହାକୁ ନେଇ ସରକାର କହିଛନ୍ତି ଯେ, ଏହି ଉଲ୍ଲଂଘନକୁ ଦୃଷ୍ଟିରେ ରଖି ସାଇବର ନିରାପତ୍ତା ଏବଂ ବ୍ୟକ୍ତିଗତ ତଥ୍ୟ ସୁରକ୍ଷାକୁ ପ୍ରାଥମିକତା ଦେବା ସରକାରଙ୍କ ଦାୟିତ୍ବ । ସୁରକ୍ଷିତ ସାଇବର ସୁରକ୍ଷା ଏବଂ ବ୍ୟକ୍ତିଗତ ତଥ୍ୟର ସୁରକ୍ଷାକୁ ସରକାର ପ୍ରାଥମିକତା ଦେଉଥିବାରୁ ଏହି ପ୍ରସଙ୍ଗକୁ ଗମ୍ଭୀରତାର ସହିତ ନିଆଯାଇଛି । ତେଣୁ ଏହି ୱେବସାଇଟ୍ ଗୁଡିକୁ ରୋକିବା ପାଇଁ ତୁରନ୍ତ ପଦକ୍ଷେପ ନିଆଯାଇଛି।"
ସୂଚନାଥାଉକି, ଯେ ଭାରତୀୟ କମ୍ପ୍ୟୁଟର ଜରୁରୀକାଳୀନ ପ୍ରତିକ୍ରିୟା ଦଳ (CERT-IN) ଦ୍ୱାରା ଅନୁସନ୍ଧାନ ସମୟରେ ଏହି ୱେବସାଇଟ ଗୁଡିକରେ ସୁରକ୍ଷା ତ୍ରୁଟି ଦେଖିବାକୁ ମିଳିଥିଲା । ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ କହିଛି ଯେ ଦୁର୍ବଳତାକୁ ସୁଧାରିବା ପାଇଁ ସେମାନଙ୍କର ଆଇଟି ଭିତ୍ତିଭୂମିରେ ଉନ୍ନତି ଆଣିବା ପାଇଁ ସାଇଟ୍ ଅପରେଟର ମାନଙ୍କୁ ନିର୍ଦ୍ଦେଶ ଦିଆଯାଇଛି । ଆଇଟି ଉପକରଣ ପରିଚାଳନା କରୁଥିବା ସମସ୍ତ ସଂସ୍ଥା ପାଇଁ CERT-In ମଧ୍ୟ ସୁରକ୍ଷା ନିର୍ଦ୍ଦେଶାବଳୀ ଜାରି କରିଛି ଏବଂ ସୂଚନା ପ୍ରଯୁକ୍ତିବିଦ୍ୟା ଅଧିନିୟମ ୨୦୦୦ ଅନୁଯାୟୀ ସୂଚନା ସୁରକ୍ଷା ନିୟମ ଅନୁସରଣ କରିବାକୁ ନିର୍ଦ୍ଦେଶ ଦେଇଛି ।
ସୂଚନା ପ୍ରଯୁକ୍ତିବିଦ୍ୟା ଅଧିନିୟମ ଏବଂ ୨୦୨୩ ର ଡିଜିଟାଲ ପର୍ସନାଲ ଡାଟା ପ୍ରୋଟେକସନ ଆକ୍ଟ ଅନୁଯାୟୀ ବର୍ତ୍ତମାନର ନିୟମକୁ ଦର୍ଶାଇ ମନ୍ତ୍ରଣାଳୟ କହିଛି ଯେ ପ୍ରଭାବିତ ଲୋକମାନେ ରାଜ୍ୟ ନିଯୁକ୍ତ ବିଚାରପତିଙ୍କ ମାଧ୍ୟମରେ କ୍ଷତିପୂରଣ ମାଗିପାରିବେ ।