ନୂଆଦିଲ୍ଲୀ୦୮/୦୯: କେନ୍ଦ୍ର ସରକାର ବରିଷ୍ଠ ଆଇଏଏସ୍‌ ଅଫିସର ତୁହିନ କାନ୍ତ  ପାଣ୍ଡେଙ୍କୁ ନୂଆ ଅର୍ଥ ସଚିବ ଭାବେ ନିଯୁକ୍ତ  କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ  ଅଧ୍ୟକ୍ଷତାରେ ଅନୁଷ୍ଠିତ ନିଯୁକ୍ତି ବ୍ୟାପାର  ସଂକ୍ରାନ୍ତ କେନ୍ଦ୍ର କ୍ୟାବିନେଟ କମିଟି ବୈଠକରେ  ପାଣ୍ଡେଙ୍କ ନାମକୁ ଅନୁମୋଦନ କରାଯାଇଛି । ଏ ସଂକ୍ରାନ୍ତରେ କେନ୍ଦ୍ର କାର୍ମିକ ମନ୍ତ୍ରଣାଳୟ  ପକ୍ଷରୁ ବିଜ୍ଞପ୍ତି ଜାରି କରାଯାଇଛି । ଟି.ଭି  ସୋମନାଥନଙ୍କ ସ୍ଥାନରେ ପାଣ୍ଡେଙ୍କୁ ଏହି ନିଯୁକ୍ତି  ଦିଆଯାଇଛି । ସୋମନାଥନଙ୍କୁ ଗତମାସରେ  ରାଜୀବ ଗୌବାଙ୍କ ସ୍ଥାନରେ କ୍ୟାବିନେଟ  ସଚିବ ଭାବେ ନିଯୁକ୍ତି ଦିଆଯାଇଥିଲା ।  ୧୯୮୭ ବ୍ୟାଚ୍‌ ଓଡ଼ିଶା କ୍ୟାଡର ଆଇଏଏସ୍‌  ଅଫିସର ପାଣ୍ଡେ ଏବେ ଡିଆଇପିଏଏମ୍‌  (ଡିପାର୍ଟମେଣ୍ଟ ଅଫ୍‌ ଇନ୍‌ଭେଷ୍ଟମେଣ୍ଟ  ଆଣ୍ଡ ପବ୍ଲିକ ଆସେଟ ମ୍ୟାନେଜମେଣ୍ଟ) ର ସଚିବ ଅଛନ୍ତି । ୨୦୧୯ ଅକ୍ଟୋବରରେ  ସେ ଏହି ପଦରେ ନିଯୁକ୍ତ ହୋଇଥିଲେ ।