ଭୁବନେଶ୍ୱର,୨୯/୦୭: ମାଲିକାଣୀଙ୍କୁ ଏକତରଫା ପ୍ରେମ କରି ବ୍ଲାକମେଲ୍‌ କରିବା ଅଭିଯୋଗରେ ଖାରବେଳନଗର ଥାନା ପୁଲିସ ଅଭିଯୁକ୍ତ କାର୍‌ ଚାଳକକୁ ଗିରଫ କରିଛି । ତାର ନାମ ଆଲୋକ ରଣଜିତ(୩୦) । ଘର ଖୋର୍ଦ୍ଧା ବେଗୁନିଆ ଥାନା ଛତ୍ରପଡ଼ା । ସେ ୟୁନିଟ୍‌-୯ରେ ରହୁଥିଲେ । ପୁଲିସ ଆଲୋକର ମୋବାଇଲ ଫୋନ୍‌ ଜବତ କରିଛି । 

ପୁଲିସ ସୂଚନା ଅନୁଯାୟୀ,  ଖାରବେଳନଗର ଅଞ୍ଚଳରେ ରହୁଥିବା ଜଣେ ଯୁବତୀ ଗତ ଏପ୍ରିଲ ମାସରେ  ଆଲୋକକୁ ନିଜ କାର୍‌ ଚାଳକ ଭାବେ ନିଯୁକ୍ତି ଦେଇଥିଲେ । ଏହା ଭିତରେ  ଆଲୋକ ଯୁବତୀଙ୍କୁ ଏକତରଫା  ପ୍ରେମ କରି ବସିଥିଲା । କିଛିଦିନ ଯିବା  ପରେ ଆଲୋକ ଯୁବତୀଙ୍କୁ ପ୍ରେମ  ନିବେଦନ କରିଥିଲେ । ଏ ନେଇ  ଯୁବତୀ ତାଙ୍କ ବାପାଙ୍କୁ ଜଣାଇଥିଲେ ।  ଯୁବତୀଙ୍କ ବାପା ଆଲୋକକୁ ଡାକି  ତାଗିଦ କରିବା ସହ ଚାକିରିରୁ ବାହାର କରିଦେବାକୁ ଧମକ  ଦେଇଥିଲେ । ଏଥିରେ ଉତ୍‌କ୍ଷିପ୍ତ  ହୋଇ ଆଲୋକ ଯୁବତୀଙ୍କ ସହ ଉଠାଇଥିବା କିଛି ଫଟୋ ଭାଇରାଲ କରିଦେବାର ଧମକ ଦେବା ସହ ତାଙ୍କୁ ବିବାହ କରିବାକୁ କହିଥିଲେ । ଏ ନେଇ ଯୁବତୀ ଗତ ୨୦ ତାରିଖରେ ଖାରବେଳନଗର ଥାନାରେ ଅଭିଯୋଗ କରିଥିଲେ । ରବିବାର ପୁଲିସ ଆଲୋକକୁ  ୟୁନିଟ୍‌-୯ ଅଞ୍ଚଳରୁ ଗିରଫ କରିବା ସହ ତାହାଠାରୁ ମୋବାଇଲ ଫୋନ୍‌  ଜବତ କରିଥିଲା । ଅପରାହ୍ଣରେ ଆଲୋକକୁ କୋର୍ଟଚାଲାଣ କରାଯାଇଥିଲା ।  ଜାମିନ ନାମଞ୍ଜୁର ହେବାରୁ ତାକୁ ଜେଲ୍‌ ହାଜତକୁ ପଠାଇ ଦିଆଯାଇଛି ।