ଯାଜପୁର,୦୨/୧୧: ନୀଳାଚଳ ଇସ୍ପାତ ନିଗମ କାରଖାନାରୁ ଠିକା ଶ୍ରମିକ ନିଖୋଜ ହେବା ଘଟଣା । କାରଖାନା ପରିସରରୁ ନିଖୋଜ ଠିକା ଶ୍ରମିକଙ୍କ ଗଳିତ ମୃତଦେହ ଉଦ୍ଧାର । ମୃତକ ଢେଙ୍କାନାଳ ଜିଲ୍ଲା ନିହଲପ୍ରସାଦ ଥାନା ଖଣ୍ଡବନ୍ଧ ଗ୍ରାମର ଅକ୍ଷୟ ପ୍ରଧାନଙ୍କ ପୁଅ ସିଲୁ ପ୍ରଧାନ ବୋଲି ଜଣାପଡିଛି । ଯାଜପୁର ଜିଲ୍ଲା କଳିଙ୍ଗନଗର ସ୍ଥିତ ନିଳାଚଳ ଇସ୍ପାତ ନିଗମ କାରଖାନାରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ଅକ୍ଟୋବର ୩୦ ତାରିଖ ଅର୍ଥାତ ବୁଧବାର ସକାଳୁ ସିଲୁ ଘରୁ ବାହାରି କାରଖାନାକୁ ଡ୍ୟୁଟି କରିବାକୁ ଆସିଥିଲେ । ହେଲେ ସନ୍ଧ୍ୟାରେ ଆଉ ଘରକୁ ଫେରି ନଥିଲେ । ଘର ଲୋକେ କଲ୍‌ କରିବାରୁ ତାଙ୍କ ଫୋନ୍‌ ବନ୍ଦ ଆସିଥିଲା । ପରିବାର ଲୋକେ ବହୁ ଖୋଜା ଖୋଜି କରିଥିଲେ ମଧ୍ୟ ପୁଅ ସିଲୁର କୌଣସି ପତ୍ତା ମିଳି ନଥିଲା । ଏହି ଘଟଣା ଘଟିବାର ପରଦିନ ଅର୍ଥାତ ଗୁରୁବାର ପରିବାର ଲୋକେ ପୁଅ ନିଖୋଜ ହେବା ନେଇ କଳିଙ୍ଗନଗର ଥାନାରେ ଲିଖିତ ଅଭିଯୋଗ କରିଥିଲେ । ଥାନାରେ ଅଭିଯୋଗ କରିବା ସତ୍ତ୍ୱେ ପୁଅର କୌଣସି ପତ୍ତା ମିଳି ନଥିଲା । ଏହି କାରଣରୁ ଶୁକ୍ରବାର ପରିବାର ଲୋକେ ଓ ଗ୍ରାମବାସୀ ଏକତ୍ରିତ ହୋଇ କାରଖାନା ମୁଖ୍ୟ ଫାଟକ ସମ୍ମୁଖରେ ପହଞ୍ଚିଥିଲେ । ସେଠାରେ ପହଞ୍ଚି କାରଖାନାର ମୁଖ୍ୟ ଫାଟକ ସାମ୍ନାରେ ଧାରଣାରେ ବସିଥିଲେ । ଏହା ଦେଖି କାରଖାନାର କର୍ମଚାରୀ ପୋଲିଲକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଲୋକଙ୍କୁ ବୁଝାଇବା ପରେ କାରଖାନାରେ ଖୋଜା ଖୋଜି ଆରମ୍ଭ ହୋଇଥିଲା । ପରେ କାରଖାନା ପରିସରରୁ ସିଲୁ ପ୍ରଧାନର ମୃତଦେହ ମିଳିଥିଲା । ପୁଅର ମୃତଦେହ ଦେଖି ପରିବାର ଲୋକେ ଦୁଃଖରେ ଭାଙ୍ଗି ପଡିଥିଲେ । ତାଙ୍କ ପରିବାରକୁ ନ୍ୟାୟ ସହ ଉପଯୁକ୍ତ କ୍ଷତିପୂରଣ ଦେବାକୁ ଗ୍ରାମବାସୀ ଦାବି କରିଛନ୍ତି ।