ଭୁବନେଶ୍ୱର ୦୪/୦୩: ଭୟାବହ ଅଗ୍ନିକାଣ୍ଡ। ବିସ୍କୁଟ, ପ୍ଲାଷ୍ଟିକ ଓ ଜାର ଗୋଦାମରେ ଭୟଙ୍କର ନିଆଁ । ହୁତୁହୁତୁ ହୋଇ ଜଳିଲା ଦୁଇଟି ଗୋଦାମ। କଳା ଧୂଆଁମୟ ହୋଇଗଲା ଅଞ୍ଚଳ। ଘଟଣାସ୍ଥଳରେ ଅଗ୍ନିଶମ ବାହିନୀ ତିନୋଟି ଦମକଳ ଗାଡ଼ି ନିୟୋଜିତ ହୋଇଥିବା ବେଳେ ନିଆଁକୁ ଆୟତ୍ତ କରିବାକୁ ଉଦ୍ୟମ ଜାରି ରଖିଛନ୍ତି।ଏଭଳି ଅଭାବନୀୟ ଘଟଣା ଭଦ୍ରକ ବାଇପାସ୍ ସ୍ଥିତ ଆରଏମ୍ସି ମାର୍କେଟରେ ଘଟିଛି।
ସୂଚନା ଅନୁଯାଇ, ଆଜି ଭଦ୍ରକ ଜିଲ୍ଲା ବାଇପାସ ସ୍ଥିତ ଆରଏମ୍ସି ମାର୍କେଟରେ ହଠାତ୍ ନିଆଁ ଲାଗିଥିଲା । ଦେଖୁ ଦେଖୁ ମାର୍କେଟ୍ରେ ଥିବା ୩ଟି ଗୋଦାମରେ ନିଆଁ ବ୍ୟାପିଯାଇଥିଲା । ଯେଉଁଥିରେ ଏକ ବିସ୍କୁଟ, କୁର୍କୁରେ, ପ୍ଲାଷ୍ଟିକ ଗୋଦାମ୍ ରହିଛି । ତେବେ ନିଆଁ ଲାଗିଥିବା ଖବର ତୁରନ୍ତ ଅଗ୍ନିଶମ ବାହିନୀକୁ ଦିଆଯାଇଥିଲା । ଅଗ୍ନିଶମ ବାହିନୀର ତିନୋଟି ଗାଡି ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା । ଦୀର୍ଘ ସମୟର ପରିଶ୍ରମ ପରେ ନିଆଁକୁ ଆୟତ୍ତ କରିବାରେ ସଫଳ ହୋଇଛି ଅଗ୍ନିଶମ ବାହିନୀ । ବର୍ତ୍ତମାନ ସୁଦ୍ଧା କେତେ ପରିମାଣର କ୍ଷୟକ୍ଷତି ହୋଇଛି ଜଣାପଡିନାହିଁ। ତଦନ୍ତ ପରେ ତଥ୍ୟ ସାମ୍ନାକୁ ଆସିବ ବୋଲି ଅଗ୍ନିଶମକର୍ମୀ କହିଛନ୍ତି।
