କଟକ ୧୦/୦୨: ରବିବାର ବାରବାଟୀରେ ଭାରତ -ଇଂଲଣ୍ଡ ଦିନିକିଆ ମ୍ୟାଚ୍ରେ ବେଳେ ଫ୍ଲଡ୍ ଲାଇଟ୍ ଅଚଳ ଘଟଣା। କେମିତି ଓ କାହିଁକି ଲିଭିଲା ଫ୍ଲଡ୍ ଲାଇଟ୍ ତାହାର ତଦନ୍ତ ହେବ। ଏନେଇ OCAକୁ ସ୍ପଷ୍ଟୀକରଣ ମଗାଯିବ। ଏହି ସୂଚନା ଦେଇଛନ୍ତି କ୍ରୀଡ଼ା ମନ୍ତ୍ରୀ ସୂର୍ଯ୍ୟବଂଶୀ ସୂରଜ।
କ୍ରୀଡ଼ାମନ୍ତ୍ରୀ କହିଲେ, ‘ଫ୍ଲଡ୍ ଲାଇଟ୍ ଅଚଳ ହେବା ସଂପର୍କରେ ଆମେ ତଦନ୍ତ କରିବୁ । ମ୍ୟାଚ୍ ସମୟରେ ଏଭଳି କାହିଁକି ଘଟିଲା ସେ ସଂପର୍କରେ ଓଡ଼ିଶା କ୍ରିକେଟ ଆସୋସିଏସନ (ଓସିଏ)କୁସ୍ପଷ୍ଟୀକରଣ ମଗାଯିବ । ପ୍ରକୃତରେ ତ୍ରୁଟି କେଉଁଠି ରହିଲା, ତାହାର ଖୋଳତାଡ଼ କରାଯିବ ବୋଲି ରାଜ୍ୟ କ୍ରୀଡ଼ା ଓ ଯୁବସେବା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଗଣମାଧ୍ୟମକୁ କହିଛନ୍ତି ।
ଜେନେରେଟର ପାଖରେ ଟିମ ବସ୍ ଥିବାରୁ ସମସ୍ୟା ହେଲା: ସଞ୍ଜୟ
ଫ୍ଲଡ୍ ଲାଇଟ୍ ଅଚଳ ହେବା ଏବଂ ମରାମତିରେ ବିଳମ୍ବ ହେବାର କାରଣ ସଂପର୍କରେ ଗଣମାଧ୍ୟମକୁ ସୂଚନା ଦେଇ ଓଡ଼ିଶା କ୍ରିକେଟ୍ ଆସୋସିଏସନ୍ର ସମ୍ପାଦକ ସଞ୍ଜୟ ବେହେରା କହିଛନ୍ତି, ‘ଜେନେରେଟର ଉପରେ ଲୋର୍ଡ ଅଧିକ ରହିବାରୁ ତାହା ହଠାତ ଅଚଳ ହୋଇଗଲା । ଏହା ଏକ ବୈଷୟିକ ତ୍ରୁଟି । ଏହାର ଯେମିତି ପୁନରାବୃତ୍ତି ନଘଟେ ତାହା ଉପରେ ଆମେ ଧ୍ୟାନ ଦେବୁ । ତେବେ ଜେନେରେଟର ପାଖରେ ଟିମ୍ ବସ ରହିଥିବାରୁ ମରାମତିରେ ବିଳମ୍ବ ହେଲା । ବସ ଚାଳକ ସେଠାରେ ନଥିବା, ତାକୁ ଖୋଜି ପୁଣି ନୂଆ ଜେନେରେଟର ସଂଯୋଗ କରିବା ପାଇଁ ସମୟ ଲାଗିଲା । ଯଦି ବସ ଚାଳକ ସେଠାରେ ଥାନ୍ତେ, ତେବେ ଆମେ ୧୦ରୁ ୧୫ ମିନିଟ ମଧ୍ୟରେ ସବୁ କିଛି ଠିକ୍ କରି ଦେଇଥାନ୍ତୁ ।’
‘ବୈଷୟିକ ତ୍ରୁଟି କେତେବେଳେ ହେବ ତାହା କହି ହେବ ନାହିଁ । ତଥାପି ଆମେ ପୂର୍ବରୁ ସବୁ ପ୍ରକାର ପରୀକ୍ଷା ନିରୀକ୍ଷା କରି ପ୍ରସ୍ତୁତ ରହିଥିଲୁ । ଟେକନିସିଆନ ସବୁ ଷ୍ଟାଣ୍ଡରେ ଥିଲେ । ତେବେ ଦର୍ଶକମାନଙ୍କୁ ଧନ୍ୟବାଦ ଦେଉଛି, ସେମାନେ ଶାନ୍ତି ଶୃଙ୍ଖଳା ରକ୍ଷା କରି ମ୍ୟାଚକୁ ସଫଳ କରାଇଲେ । ବାରବାଟୀ ଷ୍ଟାଡିୟମର ପୁନରୁଦ୍ଧାର ପାଇଁ ପ୍ରୟାସ ଚାଲିଛି । ରାଜ୍ୟ ସରକାର ଚାହିଁଲେ ସମ୍ଭବ ହୋଇ ପାରିବ ବୋଲି ଶ୍ରୀ ବେହେରା କହିଥିଲେ ।
