ନୂଆଦିଲ୍ଲୀ,୦୫/୦୯: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଜାମିନ ଆବେଦନର ଆଜି ସୁପ୍ରିମକୋର୍ଟରେ ଶୁଣାଣି ହେବ। ଦିଲ୍ଲୀର ମଦ ନୀତି ଦୁର୍ନୀତି ମାମଲାରେ ସିବିଆଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଙ୍କୁ ଗିରଫ କରିଛି। କହିରଖୁଛୁ ଯେ ଅରବିନ୍ଦ କେଜ୍ରିୱାଲଙ୍କୁ ପୂର୍ବରୁ ଦିଲ୍ଲୀ ମଦ ନୀତି ଦୁର୍ନୀତି ମାମଲାରେ ଇଡି ଗିରଫ କରିଥିଲା। ସେ ଏହି ମାମଲାରେ ଜାମିନ ପାଇଥିଲେ କିନ୍ତୁ ପରେ ସିବିଆଇ ତାଙ୍କୁ ଜେଲରୁ ଗିରଫ କରିଥିଲା। ତମାମ ମାମଲାରେ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଏବଂ ବିଆରଏସ ନେତା କେ କବିତା ମଧ୍ୟ ଜାମିନ ପାଇସାରିଛନ୍ତି। ଏଭଳି ପରିସ୍ଥିତିରେ କୋର୍ଟ ଆଜି ସିଏମ କେଜ୍ରିୱାଲଙ୍କୁ ଜାମିନ ପ୍ରଦାନ କରିବେ କି ନାହିଁ ତାହା ଉପରେ ନଜର ରହିଛି। 

ସିସୋଦିଆଙ୍କୁ ଜାମିନ ବେଳେ କ'ଣ କହିଥିଲେ କୋର୍ଟ?

ସୂଚନାଥାଉକି, କିଛି ଦିନ ପୂର୍ବରୁ ସୁପ୍ରିମକୋର୍ଟ ସିଏମ କେଜ୍ରିୱାଲଙ୍କ ସହାୟକ ତଥା ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ଜାମିନ ପ୍ରଦାନ କରିଥିଲେ। ଏହି ମାମଲାରେ ସିସୋଦିଆଙ୍କୁ ଜାମିନ ପ୍ରଦାନ କରୁଥିବାବେଳେ ସୁପ୍ରିମକୋର୍ଟ ନିମ୍ନ ଅଦାଲତଙ୍କୁ ସମାଲୋଚନା କରିଥିଲେ। କୋର୍ଟ କହିଥିଲେ ଯେ ମାମଲାର ଶୁଣାଣି ନକରି ଦୀର୍ଘ ସମୟ ଧରି ଜେଲରେ ରଖିବା ଯୋଗୁ ତାଙ୍କୁ ଶୀଘ୍ର ବିଚାର କରିବାର ଅଧିକାରରୁ ବଞ୍ଚିତ କରାଯାଇଥିଲା। ସୁପ୍ରିମକୋର୍ଟ କହିଥିଲେ ଯେ ତୁରନ୍ତ ବିଚାର ପ୍ରକ୍ରିୟା ଏକ ପବିତ୍ର ଅଧିକାର। ଜଷ୍ଟିସ୍ ବି. ଆର ଗାଓ୍ବଇ ଏବଂ ଜଷ୍ଟିସ୍ କେ. ଭି ବିଶ୍ୱନାଥନଙ୍କ ଖଣ୍ଡପୀଠ ତାଙ୍କ ନିଷ୍ପତ୍ତିରେ କହିଛନ୍ତି ଯେ ବର୍ତ୍ତମାନ ସମୟ ଆସିଛି ଯେ ନିମ୍ନ ଅଦାଲତ ଏବଂ ହାଇକୋର୍ଟ ଏହି ନୀତି ଗ୍ରହଣ କରିବା ଉଚିତ।

ତମାମ ଆଲୋଚନା ଭିତରେ କୋର୍ଟ ଇଡିକୁ କଡ଼ା ସ୍ୱରରେ ଜବାବ ଦେଇଥିଲେ। ସୁପ୍ରିମକୋର୍ଟ କହିଥିଲେ ଯେ ୧୭ ମାସ ଧରି ଦୀର୍ଘ କାରାଦଣ୍ଡ ଏବଂ ବିଚାର ପ୍ରକ୍ରିୟା ଆରମ୍ଭ ହୋଇ ନ ଥିବାରୁ ସିସୋଦିଆଙ୍କୁ ବିଚାର କରିବାର ଅଧିକାରରୁ ବଞ୍ଚିତ କରାଯାଇଛି। ବର୍ତ୍ତମାନ ମାମଲାରେ, ୪୯୩ ସାକ୍ଷୀଙ୍କ ନାଁ ଇଡି ମାମଲା ସହିତ ସିବିଆଇ ମାମଲାରେ ଦିଆଯାଇଛି। ଏହି ମାମଲାରେ ହଜାରେ ପୃଷ୍ଠାର ଡକ୍ୟୁମେଣ୍ଟ୍ ଏବଂ ଏକ ଲକ୍ଷରୁ ଅଧିକ ପୃଷ୍ଠାର ଡିଜିଟାଲ୍ ଡକ୍ୟୁମେଣ୍ଟ୍ ଅନ୍ତର୍ଭୁକ୍ତ, ତେଣୁ ଏହା ସ୍ପଷ୍ଟ ଯେ ନିକଟ ଭବିଷ୍ୟତରେ ଏ ମାମଲା ଶେଷ ହେବାର କୌଣସି ସମ୍ଭାବନା ନାହିଁ।