ନୂଆଦିଲ୍ଲୀ: ଆନ୍ଧ୍ରପ୍ରଦେଶ ଦକ୍ଷତା ବିକାଶ ଦୁର୍ନୀତି ମାମଲାରେ ପୂର୍ବତନ ମୁଖ୍ୟମନ୍ତ୍ରୀ ଏନ ଚନ୍ଦ୍ରବାବୁ ନାଇଡୁଙ୍କୁ ଦିଆଯାଇଥିବା ଜାମିନ ବିରୋଧରେ ଆଜି (ମଙ୍ଗଳବାର) ସୁପ୍ରିମକୋର୍ଟଙ୍କ ଦ୍ବାରସ୍ଥ ହେଲେ ଆନ୍ଧ୍ରପ୍ରଦେଶ ସରକାର । ଏହି ମାମଲାରେ ସେପ୍ଟେମ୍ବର ୯ ରେ ତେଲୁଗୁ ଦେଶମ ପାର୍ଟି (ଟିଡିପି) ମୁଖ୍ୟ ନାଇଡୁଙ୍କୁ ଗିରଫ କରାଯାଇଥିଲା ।

ଦେଢ ମାସରୁ ଅଧିକ ସମୟ ଜେଲରେ ରହିବା ପରେ, ହାଇକୋର୍ଟ ନାଇଡୁଙ୍କୁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିଥିଲେ । ବର୍ତ୍ତମାନ ହାଇକୋର୍ଟ ଏହାକୁ ନିୟମିତ ଜାମିନକୁ ବଦଳାଇଛନ୍ତି । ସୂଚନାଥାଉକି, ନାଇଡୁ ମୁଖ୍ୟମନ୍ତ୍ରୀ ଥିବା ସମୟରେ ୩ ଶହ କୋଟିରୁ ଅଧିକ ମୂଲ୍ୟର ସ୍କିଲ ସ୍କାମ କରିଥିବା ଅଭିଯୋଗ ହୋଇଛି । 

 କୋର୍ଟ ତାଙ୍କର ଆଦେଶରେ କହିଥିଲେ ଯେ, ଅଭିଯୁକ୍ତ (ନାଇଡୁ)ଙ୍କୁ ଅକ୍ଟୋବର ୩୧ ରେ ଦିଆଯାଇଥିବା ମଧ୍ୟବର୍ତ୍ତୀକାଳୀନ ଜାମିନ ଶେଷ ହୋଇଛି ଏବଂ ଦାଖଲ ହୋଇଥିବା ଜାମିନ ବଣ୍ଡରେ ଆବେଦନକାରୀଙ୍କୁ (ନାଇଡୁ) ନିୟମିତ ଜାମିନରେ ମୁକ୍ତ କରିବାକୁ ନିର୍ଦ୍ଦେଶ ଦିଆଯାଇଛି ।