ନୂଆଦିଲ୍ଲୀ, ୦୭/୦୮ : ଏପଟେ ଭାରତ ଉପରେ ଟାରିଫ୍ ବମ୍, ସେପଟେ ଆତଙ୍କୀସ୍ତାନ ସହ ୟାରି। ପାକ୍ ଆର୍ମି ଚିଫ୍ ଫିଲ୍ଡ ମାର୍ସଲ ଅସିମ ମୁନୀରଙ୍କୁ ଟ୍ରମ୍ପଙ୍କ ଘନ ଘନ ନିମନ୍ତ୍ରଣ। ଅଗଷ୍ଟରେ ପୁଣି ଥରେ ଆମେରିକା ଯିବେ ମୁନୀର। ଦୁଇ ମାସ ଭିତରେ ଏହା ତାଙ୍କର ଦ୍ଵିତୀୟ ଆମେରିକା ଗସ୍ତ ହେବ। ଏହା ପୂର୍ବରୁ ସେ ହ୍ଵାଇଟ୍ ହାଉସ୍ରେ ଆୟୋଜିତ ଲଞ୍ଚ୍ରେ ସାମିଲ ହୋଇଥିଲେ। ଏହାଦ୍ଵାରା ଆମେରିକା ଓ ପାକିସ୍ତାନ ଭିତରେ ଆହୁରି ଘନିଷ୍ଠତା ବଢିବ।
ଆମେରିକାର ସେଣ୍ଟ୍ରାଲ କମାଣ୍ଡର ଜେନେରାଲ ମାଇକେଲ୍ କୁରିଲା ଅଗଷ୍ଟ ମାସରେ ଅବସର ନେବାକୁ ଯାଉଛନ୍ତି। କୁରିଲାଙ୍କ ବିଦାୟକାଳୀନ ସମାରୋହରେ ସାମିଲ ହେବାକୁ ଅସିମ ମୁନୀର ୱାଶିଂଟନ ଯାଉଛନ୍ତି। କିଛି ଦିନ ପୂର୍ବରୁ କୁରିଲା ଆମେରିକା ଇଣ୍ଟେଲିଜେନ୍ସର ବ୍ୟବହାର କରି ଆଇଏସଆଇଏସର ୫ ଆତଙ୍କବାଦୀଙ୍କୁ ଧରିବା ନେଇ ପାକିସ୍ତାନର ଜୋରଦାର୍ ପ୍ରଶଂସା କରିଥିଲେ। ସେ କହିଥିଲେ, ଆତଙ୍କବାଦ ସହ ମୁକାବିଲା କରିବା ପାଇଁ ପାକିସ୍ତାନ ଚେଷ୍ଟା ଚଳାଇଛି। ଏହି କାରଣରୁ ଆମକୁ ଭାରତ ଏବଂ ପାକିସ୍ତାନ ସହ ସମ୍ପର୍କକୁ ମଜବୁତ କରିବା ଦରକାର।
ସୂଚନା ଥାଉକି, ଅସିମ ମୁନୀର ଚଳିତ ବର୍ଷ ଜୁନ ମାସରେ ୫ ଦିନିଆ ଆମେରିକା ଗସ୍ତରେ ଯାଇଥିଲେ। ଏହି ସମୟରେ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ହ୍ଵାଇଟ ହାଉସ୍ରେ ଲଞ୍ଚ କରିଥିଲେ। ଟ୍ରମ୍ପ ଏବଂ ମୁନୀର ପ୍ରାୟ ୨ ଘଣ୍ଟା ଯାଏଁ ଆଲୋଚନା କରିଥିଲେ। ସେପଟେ ଟ୍ରମ୍ପ ଋଷ ଠାରୁ ତେଲ କିଣିବା ନେଇ ଭାରତ ଉପରେ ଟାରିଫ୍ ଉପରେ ଟାରିଫ୍ ଲଦି ଚାଲିଛନ୍ତି। ଭାରତ ଉପରେ ଟ୍ରମ୍ପ ମୋଟ ୫୦ ପ୍ରତିଶତ ଟାରିଫ୍ ଲଗାଇଛନ୍ତି। ସେପଟେ ପାକିସ୍ତାନ ସହ ଏକ ତୈଳ ଡିଲ୍ କରିଛନ୍ତି। ଏପରିକି ପାକିସ୍ତାନ ଉପରେ ଟାରିଫ୍ କୋହଳ କରିଛନ୍ତି। ପୂର୍ବରୁ ଲଗାଯାଇଥିବା ୨୯ ପ୍ରତିଶତ ଶୁଳ୍କକୁ କମାଇ ୧୯ ପ୍ରତିଶତ କରାଯାଇଛି।
