ନୂଆଦିଲ୍ଲୀ: ଇଂଲଣ୍ଡ ବିପକ୍ଷ ଶେଷ ଟି-୨୦ ମ୍ୟାଚ୍ରେ ଦମଦାର ପ୍ରଦର୍ଶନ କରିଥିବା ଭାରତୀୟ ଟିମ୍ର ଅଭିଷେକ ଶର୍ମାଙ୍କୁ ନେଇ ଚର୍ଚ୍ଚା ଲାଗି ରହିଛି । ବିଶ୍ୱ କ୍ରିକେଟରେ ଝଡ଼ ସୃଷ୍ଟି କରିଛନ୍ତି ଅଭିଷେକ ଶର୍ମା । ଆଇପିଏଲରେ ତାଙ୍କର ଦ୍ରୁତ ଇନିଂସ ଏବଂ ଟି-୨୦ରେ ଭାରତୀୟ ଦଳ ପାଇଁ ତାଙ୍କର ଚମତ୍କାର ପ୍ରଦର୍ଶନ ମାଧ୍ୟମରେ, ୨୪ ବର୍ଷୀୟ ଖେଳାଳି ବହୁତ ଭଲ ଫର୍ମରେ ଅଛନ୍ତି । ସେ ଇଂଲଣ୍ଡ ବିପକ୍ଷରେ ପଞ୍ଚମ ଟି-୨୦ରେ କମାଲ ପ୍ରଦର୍ଶନ ମାଧ୍ୟମରେ ସମସ୍ତଙ୍କୁ ଚକିତ କରିଦେଇଛନ୍ତି । ୱାଙ୍ଖେଡେ ଷ୍ଟାଡିୟମରେ ଇଂଲଣ୍ଡ ବିପକ୍ଷରେ ୫୪ ବଲରୁ ୧୩୫ ରନର ଇନିଂସ ଖେଳି ଅଭିଷେକ ICC ପୁରୁଷ T20I ବ୍ୟାଟିଂ ରାଙ୍କିଂରେ ଏକ ବଡ଼ ଲମ୍ଫ ମାରିଛନ୍ତି ।
ୱାଙ୍ଖେଡେରେ ତାଙ୍କର ଚମତ୍କାର ପ୍ରଦର୍ଶନ ଯୋଗୁଁ ଅଭିଷେକ ୩୮ ସ୍ଥାନ ଉପରକୁ ଉଠି ଦ୍ୱିତୀୟ ସ୍ଥାନ ଅଧିକାର କରିଛନ୍ତି । ଅଷ୍ଟ୍ରେଲିଆର ଷ୍ଟାର ବ୍ୟାଟର ଟ୍ରାଭିସ୍ ହେଡ୍ ୮୫୫ ରେଟିଂ ସହିତ ନମ୍ବର ୧ ସ୍ଥାନରେ ଅଛନ୍ତି । ଅଭିଷେକ ଶର୍ମାଙ୍କ ରେଟିଂ ୮୨୯ ରହିଛି । ପୂର୍ବରୁ ଦ୍ୱିତୀୟ ସ୍ଥାନରେ ଥିବା ତିଲକ ବର୍ମା ଗୋଟିଏ ସ୍ଥାନ ତଳକୁ ଖସି ଯାଇଛନ୍ତି ଏବଂ ବର୍ତ୍ତମାନ ୮୦୩ ରେଟିଂ ସହିତ ତୃତୀୟ ସ୍ଥାନରେ ଅଛନ୍ତି । ଫିଲ୍ ସଲ୍ଟ ଏବଂ ସୂର୍ଯ୍ୟକୁମାର ଯାଦବ ଯଥାକ୍ରମେ ଚତୁର୍ଥ ଏବଂ ପଞ୍ଚମ ସ୍ଥାନରେ ଅଛନ୍ତି । ନିଜର ଦକ୍ଷତାକୁ ଆହୁରି ବଢ଼ାଇବା ସହ ଅଭିଷେକ ଶର୍ମା ଶୀର୍ଷ ସ୍ଥାନ ଅଧିକାର କରିବାକୁ ଆଶାବାଦୀ ଥିବା କୁହାଯାଉଛି ।
ନିକଟ ଭବିଷ୍ୟତରେ ଭାରତୀୟ ଦଳ କୌଣସି ଟି-୨୦ ଖେଳିବାର କାର୍ଯ୍ୟକ୍ରମ ନଥିବାରୁ, ୨୪ ବର୍ଷୀୟ ଖେଳାଳିଙ୍କୁ ଅପେକ୍ଷା କରିବାକୁ ପଡିବ । ଇଂଲଣ୍ଡ ବିପକ୍ଷରେ ୫ଟି ଟି-୨୦ ଖେଳିବା ସହ ଅଭିଷେକ ଶର୍ମା ସର୍ବାଧିକ ରନ ସଂଗ୍ରହକାରୀ ବ୍ୟାଟର ରହିଛନ୍ତି । ୨୭୯ ରନ ସ୍କୋର କରି, ସେ ଜସ୍ ବଟଲରଙ୍କଠାରୁ ଅଧିକ ରନ ସଂଗ୍ରହ କରିଛନ୍ତି, ଯିଏ ୫ଟି ଇନିଂସରେ ୧୪୬ ରନ କରି ଦ୍ୱିତୀୟ ସ୍ଥାନରେ ରହିଛନ୍ତି । ଏହା ବ୍ୟତୀତ, ଅଭିଷେକ ୫୪ ବଲରୁ ୧୩୫ ରନର ଇନିଂସ ଟି-୨୦ ଫର୍ମାଟରେ ଜଣେ ଭାରତୀୟ ପୁରୁଷ ଖେଳାଳିଙ୍କ ଦ୍ୱାରା କରାଯାଇଥିବା ସର୍ବାଧିକ ବ୍ୟକ୍ତିଗତ ସ୍କୋର ।
