ନୂଆଦିଲ୍ଲୀ : ଆଜି ଦକ୍ଷିଣ ଦିଲ୍ଲୀରେ ଅରବିନ୍ଦ କେଜ୍ରିୱାଲଙ୍କ ସହ ଘଟିଛି ଅଭାବନୀୟ ଘଟଣା। ତାଙ୍କ ଉପରେ ଜଣେ ବ୍ୟକ୍ତି ଲିକ୍ୱିଡ୍ ଫିଙ୍ଗି ହମଲା କରିବାକୁ ଚେଷ୍ଟା କରୁଥିଲେ। ଏହି ଘଟଣା ସେହି ସମୟରେ ହୋଇଛି, ଯେଉଁ ସମୟରେ ଅରବିନ୍ଦ କେଜ୍ରିୱାଲ ଗ୍ରେଟର କୈଳାସ ଅଞ୍ଚଳରେ ପଦଯାତ୍ରା କରୁଥିଲେ। ଏହି ସମୟରେ କେଜ୍ରିୱାଲଙ୍କ ପାଖରେ ଅନେକ ଲୋକ ଉପସ୍ଥିତ ଥିଲେ। ହେଲେ ଖୁବ୍ ଶୀଘ୍ର ଲୋକେ ଲିକ୍ୱିଡ୍ ଫିଙ୍ଗି ଥିବା ବ୍ୟକ୍ତିଙ୍କୁ ଧରି ପକାଇ ଥିଲେ। ଅନ୍ୟପଟେ ଆମ୍ ଆଦମୀ ପାର୍ଟି ଏହି ହମଲାକୁ ନେଇ ବଡ଼ା ଦାବି କରୁଛି।
ଆପ୍ର ନେତା ତଥା ଦିଲ୍ଲୀ ସରକାରଙ୍କର ମନ୍ତ୍ରୀ ସୌରଭ ଭରଦ୍ୱାଜ ଦାବି କରିଛନ୍ତି ଯେ ଅରବିନ୍ଦ କେଜ୍ରିୱାଲଙ୍କୁ ଜୀଅନ୍ତା ଜଳାଇବାକୁ ଚେଷ୍ଟା କରାଯାଉ ଥିଲା। ଯେଉଁ ବ୍ୟକ୍ତି କେଜ୍ରିୱାଲଙ୍କ ଉପରେ ଲିକ୍ୱିଡ୍ ଫିଙ୍ଗିଛନ୍ତି, ତାଙ୍କର ଗୋଟିଏ ହାତରେ ସ୍ପିରିଟ ଓ ଆଉ ଏକ ହାତରେ ଦିଆସିଲି ଥିଲା। ସେ ସ୍ପିରିଟ ଫିଙ୍ଗିବାରେ ତ ସଫଳ ହେଲା, ହେଲେ ଦିଆସିଲ ଜଳାଇ ପାରି ନଥିଲା। ଏହି ସ୍ପିରିଟ କେଜ୍ରିୱାଲ ଜୀ ଓ ମୋ ଉପରେ ପଡ଼ିଥିଲା।
ସେ କହିଛନ୍ତି , ଆଜି ଦିଲ୍ଲୀର ମଧ୍ୟ ଭାଗରେ ଅରବିନ୍ଦ କେଜ୍ରିୱାଲଙ୍କୁ ଜିଅନ୍ତା ଜଳାଇବାକୁ ଚେଷ୍ଟା ହୋଇଛି । ଏହା ବହୁତ ଗମ୍ଭୀର କଥା। ଯେବେ ଠାରୁ କେଜ୍ରିୱାଲ ପଦଯାତ୍ରା ଆରମ୍ଭ କରିଛନ୍ତି , ବିଜେପିକୁ ନିଦ ଆସିବା ବନ୍ଦ ହୋଇ ଯାଇଛି। ତାକୁ ୩ୟ ଥର ଦିଲ୍ଲୀରେ ପରାଜୟ ନଜର ଆସୁଛି। ଏଥିରେ ବିଜେପି ଖୁବ୍ ତଳକୁ ଓହ୍ଲାଇ ଆସିଛି।
ସେ କହିଛନ୍ତି ଏମିତି ହମଲା ପ୍ରଥମ ଥର ନୁହେଁ । ବିକାଶପୁରୀରେ କେଜ୍ରିୱାଲଙ୍କୁ ଉପରେ ପ୍ରାଣଘାତୀ ହମଲା ହୋଇଥିଲା। ପୁଲିସ ଦେଖି ହସୁଥିଲା। ନାଙ୍ଗଲୋଇରେ ବିଜେପିର ଗୁଣ୍ଡାମାନେ ହମଲା କଲେ। ବୁରାଡିରେ ମଧ୍ୟ ଆକ୍ରମଣର ଚେଷ୍ଟା କରାଗଲା । ଆଜି ମଧ୍ୟ ଅଧା ପ୍ରୟାସ ସଫଳ ହୋଇଛି।
