ନୂଆଦିଲ୍ଲୀ,୨୩/୦୪: ପହଲଗାମରେ ଆତଙ୍କୀ ଆକ୍ରମଣ ପରେ ଉତ୍ତରାଞ୍ଚଳର ରାଜ୍ୟଗୁଡ଼ିକରେ ହାଇ ଆଲର୍ଟରେ ରହିଛି। ଏହାରି ମଧ୍ୟରେ ଜମ୍ମୁ-କାଶ୍ମୀରର ବାରମୁଲା ଜିଲ୍ଲା ଏଲଓସିରେ ଅନୁପ୍ରବେଶ ପ୍ରୟାସକୁ ଭାରତୀୟ ସେନା ବିଫଳ କରିଛି।
ବିବୃତିରେ ସେନା କହିଛି ଯେ, ୨୩ ଏପ୍ରିଲ ସକାଳେ ଉତ୍ତର କାଶ୍ମୀରର ଉରି ନାଲା ନିକଟ ସର୍ଜୀବନ ଅଞ୍ଚଳ ଦେଇ ଦୁଇରୁ ତିନି ଜଣ ଆତଙ୍କବାଦୀ ଅନୁପ୍ରବେଶ କରିବାକୁ ଚେଷ୍ଟା କରିଥିଲେ। ନିୟନ୍ତ୍ରଣ ରେଖାରେ ସତର୍କ ସୈନିକମାନେ ଅନୁପ୍ରବେଶକାରୀ ଦଳକୁ ଚ୍ୟାଲେଞ୍ଜ କରି ଅଟକାଇଥିଲେ, ଯାହା ଫଳରେ ଗୁଳିବିନିମୟ ହୋଇଥିବା ସେନା କହିଛି। ତେବେ ଆତଙ୍କୀଙ୍କ ଏହି ଅନୁପ୍ରବେଶ ପ୍ରୟାସ ପହଲଗାମ ନିକଟ ବୈସରନ ଉପତ୍ୟକାରେ ଘଟିଥିବା ନିର୍ମମ ଆତଙ୍କବାଦୀ ଆକ୍ରମଣର ଏକ ଦିନ ପରେ ହୋଇଛି । ଯେଉଁଥିରେ ୨୬ ଜଣଙ୍କ ମୃତ୍ୟୁ ହୋଇଛି। ଯେଉଁମାନଙ୍କ ମଧ୍ୟରେ ଭାରତୀୟ ଓ ବିଦେଶୀ ପର୍ଯ୍ୟଟକ ନିହତ ହୋଇଥିଲେ।
୨୦୧୯ରେ ପୁଲୱାମା ଆକ୍ରମଣ ପରେ ଜମ୍ମୁ-କାଶ୍ମୀରରେ ଏହା ସବୁଠାରୁ ଭୟଙ୍କର ଆକ୍ରମଣ ଥିଲା । ଅନ୍ୟପଟେ ଏହି ଆକ୍ରମଣ ପରେ ଦିଲ୍ଲୀ, ମୁମ୍ବାଇ, ଜୟପୁର ଏବଂ ଅମୃତସର ସମେତ ବିଭିନ୍ନ ସହର ହାଇ ଆଲର୍ଟରେ ରହିଛି। ଯେଉଁଠାରେ ସୁରକ୍ଷା ସଂସ୍ଥାଗୁଡ଼ିକ ନିରୀକ୍ଷଣ ଓ ସୀମାନ୍ତ ଯାଞ୍ଚକୁ ତୀବ୍ର କରିଛନ୍ତି। କେନ୍ଦ୍ରୀୟ ନେତୃତ୍ୱ ମଧ୍ୟ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
